Жорий йилнинг 3-4 август кунлари давлат органлари ва ташкилотлари, шу жумладан Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг коррупцияга қарши ички назорат тузилмалари (комплаенс-назорат)нинг (100 нафар)   ходимлари учун  айни мавзуда икки кунлик ўқув-семинар ўтказилди.

Мазкур тадбир Коррупцияга қарши курашиш агентлиги томонидан Конрад Аденауэр номидаги жамғарманинг Марказий Осиёдаги ваколатхонаси ҳамкорлигида ташкил этилди. 

Маълумки, Ўзбекистон Республикаси Президентининг 2021 йил 6 июлдаги ПҚ-5177-сон Қарорига мувофиқ,   Агентлик давлат органлари ва ташкилотларида коррупцияга қарши ички назорат тузилмаларини жорий этиш ҳамда самарали фаолият юритишини ташкиллаштириш вазифасини амалга ошириб келмоқда. Бугунги кунда 92  та давлат органлари ва ташкилотлари, шу жумладан банкларда мазкур тузилмалар фаолият олиб бормоқда.

Агентлик томонидан мунтазам равишда уларнинг фаолиятини такомиллаштириш бўйича услубий ва амалий кўмак кўрсатиб келинмоқда.

Хусусан, ушбу ўқув-семинар орқали мазкур тузилмалар фаолиятига амалий кўмак кўрсатишни изчил давом эттириш, ички назорат тузилмалари ходимларининг билим ва кўникмаларини ошириш мақсад қилинган.

Шу боисдан тренинг давомида хорижлик ва маҳаллий экспертлар томонидан давлат ташкилотлари фаолиятида коррупциявий хавф-хатарларни тўғри баҳолаш, манфаатлар тўқнашувини аниқлаш ва бошқариш, давлат фуқаролик хизмати ҳамда давлат харидлари жараёнида манфаатлар тўқнашуви ва коррупция хавф-хатарларини аниқлаш ва олдини олиш, давлат фуқаролик хизматида совға сиёсати, норматив-ҳуқуқий ҳужжатлар ва улар лойиҳаларининг коррупцияга қарши экспертизаси ҳақида ва бошқа муҳим мавзуларда тақдимотлар ўтказилди.  

Маълумки, жорий йилда Ўзбекистон Республикаси Президентининг 2022 йил 12 январдаги ПҚ-81-сон қарорига мувофиқ, давлат органлари ва ташкилотларида коррупцияга қарши курашиш ишларининг самарадорлиги рейтинг баҳолашдан ўтказилиб, март ойида жамоатчиликка эълон қилинди. Унда 62 та давлат ташкилотининг коррупцияга қарши курашиш ишларининг самарадорлиги 0 баллдан 100 баллгача рейтингда баҳоланиб, 12 та ташкилотнинг фаолият самарадорлиги “яхши” – (81-100 балл), 30 та ташкилот “қониқарли” – (55-80 балл) ва 20 та ташкилот “қониқарсиз” – (55 баллдан паст) тоифаларга ажратилди.

Шунингдек, Ўзбекистон Республикаси Президентининг 2022 йил 11 майдаги ПҚ-240-сон қарорига асосан, 39 та вазирлик ва идораларнинг умумий 1701 та функцияларидаги коррупциявий хавф-хатарлар баҳолашдан ўтказилиб, коррупциявий хавф-хатарлар даражаси  177 та функцияларда “юқори”,  475 та функцияларда “ўрта”,  1049 та функцияларда “паст” дея баҳоланди.

Машғулотлар мобайнида мазкур янги тизимлар бўйича хорижий тажриба, рейтинг баҳолаш йўналишлари ва индикатор кўрсаткичларини таҳлил қилиш усуллари ва аниқ мезонлари ҳам кўриб чиқилди.

Ўқув-семинар дастуридан  маҳаллий ва халқаро экспертларнинг Ўзбекистон Республикасининг “Манфаатлар тўқнашуви тўғрисида”ги ва Ўзбекистон Республикасининг “Норматив-ҳуқуқий ҳужжатлар ва улар лойиҳаларининг коррупцияга қарши экспертизаси тўғрисида"ги Қонунларининг мақсади ва аҳамиятига оид маърузалар ўрин олди.     

Иштирокчиларга “Давлат фуқаролик хизматчиси томонидан хизмат сафарлари, халқаро ва бошқа расмий тадбирлар муносабати билан олиниши мумкин бўлган совға қиймати, шунингдек уни тасарруф этиш тартиби тўғрисидаги низом”ни амалиётда қўллаш масалаларида ҳам зарур маълумотлар, керакли тавсиялар берилди.    

Ўқув-семинар давомида давлат органлари ва ташкилотларида коррупцияга қарши ички  назорат тизимини самарали жорий этишда учраётган муаммолар, фаолиятни тартибга солувчи меъёрий ҳужжатларни амалиётга татбиқ этишда йўл қўйилаётган хато ва камчиликлар ўрганиш ва таҳлил натижалари асосида очиқ муҳокама қилиниб, фаолиятни янада такомиллаштириш бўйича таклиф ва тавсиялар ишлаб чиқилди.

Якунда иштирокчиларга Коррупцияга қарши курашиш агентлиги томонидан Конрад Аденауэр номидаги жамғарманинг Марказий Осиёдаги ваколатхонаси томонидан сертификат топширилди.

Коррупцияга қарши курашиш агентлиги

Ахборот хизмати