Коррупцияга қарши курашиш агентлиги томонидан Данғара туман йўллардан фойдаланиш унитар корхонаси буюртмачилигида 2023 йил 24 июль куни (“Б-синфига оид бўлган 10 тонна асфальтобетон аралашмаси харид қилиш” бўйича) ўтказилган 6,0 млрд  сўмлик давлат харидида қатор қонунбузилиши ҳолатларига йўл қўйилганлиги аниқланди.

Хусусан, ушбу харидда иштирок этиб, ғолиб бўлган талабгорнинг ҳужжатлари харид комиссияси раиси ва аъзолари фойдаланган қурилма (IP-манзиллари бир хил) орқали электрон платформага юкланган.

Натижада Ўзбекистон Республикаси “Давлат харидлари тўғрисида”ги Қонуннинг 10-моддаси (рақобат ва холислик принципи), 14-моддаси (манфаатлар тўқнашуви), 20-моддаси (харид комиссиясининг ҳуқуқ ва мажбуриятлари), 46-моддаси (давлат харидлари жараёнидаги чекловлар) ҳамда Ўзбекистон Республикаси Вазирлар Маҳкамасининг “Давлат харидларини амалга ошириш билан боғлиқ тартиб-таомилларни ташкил этиш ва ўтказиш тартиби тўғрисида”ги Қарори билан тасдиқланган Низомнинг бир қатор талаблари бузилган. 

Мазкур ҳолатлар бўйича 2023 йил 1 август куни (баённома тасдиқланган куннинг ўзида) харид комиссиясининг баённомасини бекор қилиш тўғрисида буюртмачига тақдимнома киритилди ва тўпланган ҳужжатлар қонуний чора кўриш учун Бош прокуратура ҳузуридаги Иқтисодий жиноятларга қарши курашиш департаментига юборилди.

Агентликнинг тақдимномасига биноан Данғара туман йўллардан фойдаланиш унитар корхонаси томонидан 8 август куни харид комиссиясининг баённомаси бекор қилинди.

Коррупцияга қарши курашиш агентлиги

Ахборот хизмати