Коррупцияга қарши курашиш агентлиги томонидан “Минтақавий мулоқот”  халқаро нодавлат ноҳукумат ташкилоти билан ҳамкорликда жорий йилнинг 11-12 сентябрь кунлари журналист ва блогерлар, нодавлат нотижорат ташкилотлари, жамоатчилик фаоллари, давлат идора ва ташкилотлари матбуот котиблари учун АҚШнинг  “Boston Globe” газетаси муҳаррири Рашел Коэн иштирокида тренинглар ташкил этилди.

Маълумот учун: “Boston Globe” АҚШнинг энг йирик нашрларидан бири бўлиб, қарийб 151 йиллик тарихга эга. Boston.com саҳифаси доимий равишда Америкадаги энг яхши 10 та газета веб-сайтлари қаторига киради ва кўплаб мукофотларни қўлга киритган, жумладан, видеолари учун 2009 йилда иккита минтақавий Эмми мукофотига сазовор бўлган. Газета муҳаррири Рашел Коэн Пулицер мукофоти соҳиби, журналистикада 50 йилдан ошиқ иш тажрибасига эга. Associated Press, Boston Herald каби дунёнинг йирик медиа нашрларида фаолият юритган. Ҳукумат очиқлиги, коррупция, сиёсат ва бошқа муҳим йўналишларда журналистик суриштирувлар олиб борган. АҚШ Олий суди медиа қўмитасининг ҳамраиси ҳисобланади.

Мазкур тренинглар орқали коррупцияга қарши курашиш жараёнларига давлат органлари ва ташкилотлари, шунингдек, фуқаролик жамияти институтлари, хусусан, ОАВ, ННТ вакилларини кенг жалб қилиш, соҳадаги ислоҳотлар ижросини таъминлашда уларнинг иштирокини кучайтириш ва фаоллигини ошириш, шунингдек, бу йўналишда ўзаро ҳамкорлик алоқаларини янада мустаҳкамлаш  мақсад қилинган.  

Тренинг машғулотларининг дастлабки куни  журналист ва блогерлар, нодавлат нотижорат ташкилотлари, жамоатчилик фаоллари иштирокида “Давлат органларининг шаффофлигини таъминлаш ҳамда коррупцияга қарши курашишда ОАВ ва ННТларнинг роли” мавзусида ўтказилди. Унда таъкидланганидек, ОАВ ва ННТлар коррупцияга қарши курашишда жамоатчилик назоратини амалга оширишда, очиқлик ва шаффофликни таъминлашда самарали куч ва имкониятларга эга. Шу боис бугунги глобаллашув шароитида уларнинг бу борадаги салоҳияти ва тажрибасини кучайтиришга қаратилган стратегияларни ишлаб чиқиш, илғор тажрибаларни оммалаштириш тобора муҳим аҳамият касб этмоқда.  

Шу нуқтаи назардан тренингда коррупцияга қарши курашиш бўйича ташаббусларни илгари суриш ва бунда шаффофлик, ҳисобдорликни таъминлаш, ННТларнинг коррупцияга қарши курашишдаги ташкилий салоҳияти ва тажрибасини кучайтиришга қаратилган стратегиялар,  халқаро ва трансчегаравий ҳамкорликни амалга ошириш масалалари, шунингдек, коррупциявий ҳолатларни аниқлашда журналистик суриштирувнинг ўрни, ОАВ ва интернет орқали коррупциянинг олдини олиш ва ҳалолликни шакллантиришда ўзига хос механизмлар юзасидан батафсил маълумот берилди.

Рашел Коэн медиа вакиллари билан коррупцияга оид материаллар тайёрлашда маълумотлар тўплаш, улардан фойдаланиш, таҳлил қилиш ва жамоатчиликка тақдим этишда қонунчилик  талаблари  ва касб этикасига риоя этиш борасида ўз тажрибасини ўртоқлашди. 

Давлат идора ва ташкилотлари матбуот котиблари учун ташкил этилган “Коррупцияга нисбатан муросасизлик кайфияти ва коррупцияга оид инфомуҳитни шакллантиришда давлат органлари матбуот хизматларининг ўрни” мавзусидаги бўлиб ўтган тренингда эса давлат органлари матбуот хизматларининг аҳолида коррупцияга қарши муросасиз муносабатни шакллантиришдаги роли, коррупцияга қарши чоралар тўғрисидаги хабарларни жамоатчиликка самарали етказиш стратегиялари кўриб чиқилди.

Матбуот котиблари хорижлик мутахассисдан матбуот хизматларининг коррупцияни фош этиш ва бартараф этиш борасидаги ҳаракатларида шаффофликни таъминлаш, фуқаролик жамияти институтлари ва ОАВ билан коррупцияга нисбатан муросасизликни тарғиб қилиш бўйича ҳамкорлик масалаларида ҳам ўзларини қизиқтирган саволларга жавоб олишди.

Маърузачи томонидан матбуот хизматлари коррупцияга нисбатан муросасизлик муҳитини яратиш бўйича ўз миссияларини амалга оширишда дуч келадиган муаммолар ва уларни енгиб ўтишга доир тавсиялар берилди.

Тренингларда Агентлик ҳамда давлат органлари, оммавий ахборот воситалари, нодавлат нотижорат ташкилотларининг ўзаро ҳамкорлик механизмларини кучайтириш чоралари ҳам атрофлича муҳокама этилди.

Мазкур масалада иштирокчилар томонидан бир қатор таклифлар илгари сурилди. Унга кўра, бу каби тренингларни кўпроқ амалий фаолият билан боғлиқ машғулотлар орқали мунтазам ташкил этиш, айни йўналишга қизиқувчи журналист ва блогерлар доирасини кенгайтириш, улар билан доимий мулоқотлар ўтказишга келишиб олинди. 

Тренинглар якунида ташкилотчилар томонидан иштирокчиларга сертификат топширилди.

Коррупцияга қарши курашиш агентлиги

Ахборот хизмати