Korrupsiyaga qarshi kurashish agentligi tomonidan “Mintaqaviy muloqot”  xalqaro nodavlat nohukumat tashkiloti bilan hamkorlikda joriy yilning 11-12 sentabr kunlari jurnalist va blogerlar, nodavlat notijorat tashkilotlari, jamoatchilik faollari, davlat idora va tashkilotlari matbuot kotiblari uchun AQSHning  “Boston Globe” gazetasi muharriri Rashel Koen ishtirokida treninglar tashkil etildi.

Maʼlumot uchun: “Boston Globe” AQSHning eng yirik nashrlaridan biri bo‘lib, qariyb 151 yillik tarixga ega. Boston.com sahifasi doimiy ravishda Amerikadagi eng yaxshi 10 ta gazeta veb-saytlari qatoriga kiradi va ko‘plab mukofotlarni qo‘lga kiritgan, jumladan, videolari uchun 2009 yilda ikkita mintaqaviy Emmi mukofotiga sazovor bo‘lgan. Gazeta muharriri Rashel Koen Pulitser mukofoti sohibi, jurnalistikada 50 yildan oshiq ish tajribasiga ega. Associated Press, Boston Herald kabi dunyoning yirik media nashrlarida faoliyat yuritgan. Hukumat ochiqligi, korrupsiya, siyosat va boshqa muhim yo‘nalishlarda jurnalistik surishtiruvlar olib borgan. AQSH Oliy sudi media qo‘mitasining hamraisi hisoblanadi.

Mazkur treninglar orqali korrupsiyaga qarshi kurashish jarayonlariga davlat organlari va tashkilotlari, shuningdek, fuqarolik jamiyati institutlari, xususan, OAV, NNT vakillarini keng jalb qilish, sohadagi islohotlar ijrosini taʼminlashda ularning ishtirokini kuchaytirish va faolligini oshirish, shuningdek, bu yo‘nalishda o‘zaro hamkorlik aloqalarini yana-da mustahkamlash  maqsad qilingan.  

Trening mashg‘ulotlarining dastlabki kuni  jurnalist va blogerlar, nodavlat notijorat tashkilotlari, jamoatchilik faollari ishtirokida “Davlat organlarining shaffofligini taʼminlash hamda korrupsiyaga qarshi kurashishda OAV va NNTlarning roli” mavzusida o‘tkazildi. Unda taʼkidlanganidek, OAV va NNTlar korrupsiyaga qarshi kurashishda jamoatchilik nazoratini amalga oshirishda, ochiqlik va shaffoflikni taʼminlashda samarali kuch va imkoniyatlarga ega. Shu bois bugungi globallashuv sharoitida ularning bu boradagi salohiyati va tajribasini kuchaytirishga qaratilgan strategiyalarni ishlab chiqish, ilg‘or tajribalarni ommalashtirish tobora muhim ahamiyat kasb etmoqda.  

Shu nuqtai nazardan treningda korrupsiyaga qarshi kurashish bo‘yicha tashabbuslarni ilgari surish va bunda shaffoflik, hisobdorlikni taʼminlash, NNTlarning korrupsiyaga qarshi kurashishdagi tashkiliy salohiyati va tajribasini kuchaytirishga qaratilgan strategiyalar,  xalqaro va transchegaraviy hamkorlikni amalga oshirish masalalari, shuningdek, korrupsiyaviy holatlarni aniqlashda jurnalistik surishtiruvning o‘rni, OAV va internet orqali korrupsiyaning oldini olish va halollikni shakllantirishda o‘ziga xos mexanizmlar yuzasidan batafsil maʼlumot berildi.

Rashel Koen media vakillari bilan korrupsiyaga oid materiallar tayyorlashda maʼlumotlar to‘plash, ulardan foydalanish, tahlil qilish va jamoatchilikka taqdim etishda qonunchilik  talablari  va kasb etikasiga rioya etish borasida o‘z tajribasini o‘rtoqlashdi. 

Davlat idora va tashkilotlari matbuot kotiblari uchun tashkil etilgan“Korrupsiyaga nisbatan murosasizlik kayfiyati va korrupsiyaga oid infomuhitni shakllantirishda davlat organlari matbuot xizmatlarining o‘rni” mavzusidagi bo‘lib o‘tgan treningda esa davlat organlari matbuot xizmatlarining aholida korrupsiyaga qarshi murosasiz munosabatni shakllantirishdagi roli, korrupsiyaga qarshi choralar to‘g‘risidagi xabarlarni jamoatchilikka samarali yetkazish strategiyalari ko‘rib chiqildi.

Matbuot kotiblari xorijlik mutaxassisdan matbuot xizmatlarining korrupsiyani fosh etish va bartaraf etish borasidagi harakatlarida shaffoflikni taʼminlash, fuqarolik jamiyati institutlari va OAV bilan korrupsiyaga nisbatan murosasizlikni targ‘ib qilish bo‘yicha hamkorlik masalalarida ham o‘zlarini qiziqtirgan savollarga javob olishdi.

Maʼruzachi tomonidan matbuot xizmatlari korrupsiyaga nisbatan murosasizlik muhitini yaratish bo‘yicha o‘z missiyalarini amalga oshirishda duch keladigan muammolar va ularni yengib o‘tishga doir tavsiyalar berildi.

Treninglarda Agentlik hamda davlat organlari, ommaviy axborot vositalari, nodavlat notijorat tashkilotlarining o‘zaro hamkorlik mexanizmlarini kuchaytirish choralari ham atroflicha muhokama etildi.

Mazkur masalada ishtirokchilar tomonidan bir qator takliflar ilgari surildi. Unga ko‘ra, bu kabi treninglarni ko‘proq amaliy faoliyat bilan bog‘liq mashg‘ulotlar orqali muntazam tashkil etish, ayni yo‘nalishga qiziquvchi jurnalist va blogerlar doirasini kengaytirish, ular bilan doimiy muloqotlar o‘tkazishga kelishib olindi. 

Treninglar yakunida tashkilotchilar tomonidan ishtirokchilarga sertifikat topshirildi.

Korrupsiyaga qarshi kurashish agentligi

Axborot xizmati