Бугун Коррупцияга қарши курашиш агентлигида Агентлик ва Бирлашган Араб Амирликларининг G42 (Presight) компанияси вакиллари ўртасида учрашув бўлиб ўтди.

Мазкур компания давлат хизматлари, молия ҳамда спорт йўналишларига сунъий интеллект имкониятларини татбиқ этишга қаратилган лойиҳаларни ишлаб чиқиш ва амалга ошириш билан шуғулланади.

Хусусан, компания томонидан сунъий интеллект алгоритми ёрдамида аффилланганлик, манфаатлар тўқнашуви ҳолатларини аниқлаш, жиноий даромадларни легаллаштириш, давлат харидлари соҳасидаги қонунбузилиши ҳолатларининг олдини олишга доир дастурий маҳсулотлар яратилган.

Учрашувда Ўзбекистонда шундай платформаларни яратиш ҳамда Агентлик фаолиятига рақамли технологияларни кенг жорий этишда ўзаро ҳамкорлик алоқаларини йўлга қўйиш масалалари атрофлича муҳокама қилинди.

Таъкидланганидек, Агентлик томонидан ҳамкор ташкилотлар билан биргаликда бир қатор электрон дастур ва маҳсулотлар ишлаб чиқилган.

Давлат идораларининг коррупцияга қарши курашиш фаолиятини баҳоловчи e-antikor платформаси, давлат органлари очиқлигини баҳолашга мўлжалланган электрон дастур, фуқаролар томонидан йўлланадиган мурожаатларни қабул қилишга мўлжалланган электрон тизим шулар жумласидандир. Шунингдек, сунъий интеллект ёрдамида ижтимоий тармоқларни мониторинг қилиш имкониятини берувчи платформадан ҳам фойдаланиб келинмоқда.

Бундан ташқари, давлат харидлари, аксилкоррупция дастур ва стратегияларининг амалга оширилиши ҳамда бошқа йўналишларда сунъий интеллектга асосланган электрон платформаларни Агентлик фаолиятига жорий этиш режалаштирилмоқда.

Учрашув якунида Агентлик фаолиятини рақамлаштириш ва сунъий интеллектни жорий этиш бўйича ҳамкорликнинг аниқ йўналишларини белгилаб олишга келишиб олинди.

Коррупцияга қарши курашиш агентлиги

Ахборот хизмати