Bugun Korrupsiyaga qarshi kurashish agentligida Agentlik va Birlashgan Arab Amirliklarining G42 (Presight) kompaniyasi vakillari o'rtasida uchrashuv bo‘lib o‘tdi.

Mazkur kompaniya davlat xizmatlari, moliya hamda sport yo‘nalishlariga sunʼiy intellekt imkoniyatlarini tatbiq etishga qaratilgan loyihalarni ishlab chiqish va amalga oshirish bilan shug‘ullanadi.

Xususan, kompaniya tomonidan sunʼiy intellekt algoritmi yordamida affillanganlik, manfaatlar to‘qnashuvi holatlarini aniqlash, jinoiy daromadlarni legallashtirish, davlat xaridlari sohasidagi qonunbuzilishi holatlarining oldini olishga doir dasturiy mahsulotlar yaratilgan.

Uchrashuvda O‘zbekistonda shunday platformalarni yaratish hamda Agentlik faoliyatiga raqamli texnologiyalarni keng joriy etishda o‘zaro hamkorlik aloqalarini yo‘lga qo‘yish masalalari atroflicha muhokama qilindi.

Taʼkidlanganidek, Agentlik tomonidan hamkor tashkilotlar bilan birgalikda bir qator elektron dastur va mahsulotlar ishlab chiqilgan.

Davlat idoralarining korrupsiyaga qarshi kurashish faoliyatini baholovchi e-antikor platformasi, davlat organlari ochiqligini baholashga mo‘ljallangan elektron dastur, fuqarolar tomonidan yo‘llanadigan murojaatlarni qabul qilishga mo‘ljallangan elektron tizim shular jumlasidandir. Shuningdek, sunʼiy intellekt yordamida ijtimoiy tarmoqlarni monitoring qilish imkoniyatini beruvchi platformadan ham foydalanib kelinmoqda.

Bundan tashqari, davlat xaridlari, aksilkorrupsiya dastur va strategiyalarining amalga oshirilishi hamda boshqa yo‘nalishlarda sunʼiy intellektga asoslangan elektron platformalarni Agentlik faoliyatiga joriy etish rejalashtirilmoqda.

Uchrashuv yakunida Agentlik faoliyatini raqamlashtirish va sunʼiy intellektni joriy etish bo‘yicha hamkorlikning aniq yo‘nalishlarini belgilab olishga kelishib olindi.

Korrupsiyaga qarshi kurashish agentligi

Axborot xizmati