Шайх Тамим бин Ҳамад Ол Соний томонидан таъсис этилган “Коррупцияга қарши кураш соҳасида ютуқлари учун” халқаро мукофоти коррупцияга қарши кураш соҳасига ўзини бағишлаган ҳамда мазкур йўналишда илғор янгиликларни жорий этган шахслар ва ташкилотларга берилади.

Маълумот учун: Мукофот 2015 йилда Қатар ҳукумати ҳамда БМТ шафъелигида Қатарда ташкил этилган Қонун устуворлиги ва коррупцияга қарши кураш маркази томонидан таъсис этилган ҳамда Санкт-Петербургда бўлиб ўтган Коррупцияга қарши курашиш идоралари халқаро ассоциациясининг (IAACA) VIII конференциясида Қатар давлати раҳбари Шайх Тамим бин Ҳамад Ол Соний томонидан эълон қилинган.

Мукофотнинг асосий мақсади  дунё бўйлаб коррупцияга қарши курашиш бўйича намунали ва илғор моделларни тарғиб қилиш ҳамда аҳолининг хабардорлигини ошириш, коррупцияга қарши курашишни қўллаб-қувватлаш ва бирдамликни оширишдан иборат.

Ғолиблар 5 та номинация бўйича тақдирланади:  

• “Коррупцияга қарши курашишдаги ютуқлари ҳамда узоқ йиллик фаолияти учун”;
• “Коррупцияга қарши курашиш йўналишидаги таълим ва академик тадқиқотлар учун”;
• “Коррупцияга қарши курашишга оид ёшлар ташаббуслари ва ижоди учун”;
• “Инновациялар ва журналистик материаллар учун”;
• “Спортни коррупциядан ҳимоя қилиш”;

Номзодлар

Номзодлар қаторига давлат идоралари ва ташкилотлари, халқаро ташкилотлар, илмий муассасалар, нуфузли ва тегишли нодавлат нотижорат ташкилотлари ва профессионал бирлашмаларнинг масъул шахслари киради.

Номзодлар ҳукуматлардаги юқори даражадаги сиёсий лавозимларни эгаллаб турган амалдаги шахсларни (вазир даражаси ва ундан юқори деб белгиланган) ёки давлат идоралари ёки халқаро ташкилотлар ва идоралар раҳбарларини ўз ичига олмайди.

Номзодлар фақат учинчи шахслар томонидан, яъни номзоди кўрсатилаётган шахс ёки ташкилот эмас, бошқа ташкилотлар, илмий муассасалар томонидан кўрсатилади. 

Танловга ҳужжат топшириш

Номзод ва уни тақдим этаётган ташкилот ҳақидаги маълумотлар aceaward.com веб-сайтдаги онлайн шаклдаги ариза шаклини (инглиз тилида) тўлдириш орқали киритилади.

Ҳужжатларни айни вақтдан 30 сентябрь кунига қадар қабул қилинади.

Ҳужжатлар Мукофот котибияти томонидан қабул қилинади, Баҳолаш бўйича маслаҳат кенгаши ҳамда Олий даражадаги мукофот қўмитаси (Қатарнинг Қонун устуворлиги ва коррупцияга қарши курашиш маркази васийлик кенгаши аъзоларидан иборат) томонидан баҳоланади.

Муҳим эслатмалар:

1) Номзодларни фақат юридик шахслар тақдим этиши мумкин. Ўз-ўзини кўрсатган номзодлар ҳужжатлари кўриб чиқилмайди.

2) Аризага илова қилинган маълумотлар, ҳужжатлар, материаллар исталган тилда тақдим этилиши мумкин. Бироқ, улар мазмунини очиб берувчи инглиз тилидаги аннотация, маълумотнома билан биргаликда топширилиши керак.

3) Мукофот котибияти томонидан номзод ёки номзодни кўрсатган ташкилотларга қўшимча маълумотларни сўраб олиши мумкин.

4) Ғолиблар декабрь ойида эълон қилинади.

Баҳолаш мезонлари

1. Коррупцияга қарши курашишдаги ютуқлари ҳамда узоқ йиллик фаолияти учун:

- Коррупцияга қарши кураш бўйича маҳаллий ва/ёки халқаро даражада фаолияти ёки бутун умрлик фаолияти;

- Коррупциянинг олдини олиш ва қарши курашишдаги қатъияти;

- Шахсий ва профессионал ҳалолликни кўрсатиш;

- Коррупциянинг олдини олиш ёки бартараф этишга қаратилган ҳаракатлар, ташаббуслар ва ишларни бажариш;

- Бошқалар учун намуна бўлиб хизмат қилиш.

2. Коррупцияга қарши курашиш йўналишидаги таълим ва академик тадқиқотлар учун:

- Коррупцияга қарши курашиш соҳасидаги таниқли тадқиқот ва нашрлари учун тан олинган муассаса;

- Тадқиқотлар, нашрлар ва таълим билан боғлиқ фаолият орқали коррупцияга қарши курашиш бўйича билимларнинг ўсишига ҳисса қўшиш;

- Жамиятнинг коррупцияга қарши курашиш бўйича хабардорлигини оширишга катта ҳисса қўшиш.

3. Коррупцияга қарши курашишга оид ёшлар ташаббуслари ва ижоди учун:

- Ёшлар томонидан ёки ёшлар учун ишлаб чиқилган ва бошқариладиган лойиҳалар, хусусан, нодавлат ташкилотлар ёки фуқаролик жамияти томонидан қўллаб-қувватланадиган лойиҳалар учун (лойиҳалар ёшлар бошчилигидаги коррупцияга қарши ташаббуслар, ёзги лагерлар ёки мактаблар ва ёшлар томонидан мувофиқлаштирилган хабардорликни ошириш кампанияларидан иборат бўлиши мумкин);

- Ёшлар ёки жамият ўртасида коррупциянинг олдини олиш ва унга қарши курашиш бўйича хабардорликни ошириш, коррупциянинг олдини олиш ва унга қарши курашиш бўйича янги ечимларни таклиф қилишга қаратилган индивидуал ёки жамоавий фаолият, лойиҳалар ёки ташаббусларни ишлаб чиқиш ва амалга оширишда етакчилик қилиш.

4. Инновациялар ва журналистик материаллар учун:

- Коррупцияга қарши курашиш ёки хабардорликни оширишга қаратилган трансформатив ечимлар, ёндашувларни ишлаб чиқиш ва/ёки улардан фойдаланиш (ечимлар, ёндашувлар IT ва коммуникация технологияларидан ҳамда бошқа инновацион методологиялардан фойдаланишни ўз ичига олиши мумкин);

- Коррупция ва коррупционерларни фош қилиш ва ҳужжатларни таҳлил қилиш орқали коррупцияга қарши курашишга ўз ҳиссасини қўшган соғлом ва холис журналистик суриштирувлар.

5. Спортни коррупциядан ҳимоя қилиш (спорт тадбирлари ва ассоциациялари спектри билан боғлиқ):

- Йирик спорт тадбирларидаги коррупцияни аниқлаш ва ёки бартараф этиш;

- Ноқонуний пул тикишни аниқлаш ёки бартараф этиш;

- Спорт мусобақаларини манипуляция қилинганини аниқлаш ёки бартараф этиш;

- Спортдаги коррупция ва суиистеъмолликларни аниқлаш ва бартараф этиш;

- Спортдаги гендер ва коррупция.

Мукофотга оид қўшимча маълумотлар билан aceaward.com сайти орқали танишишингиз мумкин.

Коррупцияга қарши курашиш агентлиги Мукофот ва унга ҳужжат топшириш жараёнлари бўйича методик тавсияларни бериши мумкин.

Мурожаат учун рақамлар: 71 202 04 02 (421, 423, 442).

Коррупцияга қарши курашиш агентлиги

Ахборот хизмати