Shayx Tamim bin Hamad Ol Soniy tomonidan taʼsis etilgan “Korrupsiyaga qarshi kurash sohasida yutuqlari uchun” xalqaro mukofoti korrupsiyaga qarshi kurash sohasiga o‘zini bag‘ishlagan hamda mazkur yo‘nalishda ilg‘or yangiliklarni joriy etgan shaxslar va tashkilotlarga beriladi.

Maʼlumot uchun: Mukofot 2015 yilda Qatar hukumati hamda BMT shafyeligida Qatarda tashkil etilgan Qonun ustuvorligi va korrupsiyaga qarshi kurash markazi tomonidan taʼsis etilgan hamda Sankt-Peterburgda bo‘lib o‘tgan Korrupsiyaga qarshi kurashish idoralari xalqaro assotsiatsiyasining (IAACA) VIII konferensiyasida Qatar davlati rahbari Shayx Tamim bin Hamad Ol Soniy tomonidan eʼlon qilingan.

Mukofotning asosiy maqsadi  dunyo bo‘ylab korrupsiyaga qarshi kurashish bo‘yicha namunali va ilg‘or modellarni targ‘ib qilish hamda aholining xabardorligini oshirish, korrupsiyaga qarshi kurashishni qo‘llab-quvvatlash va birdamlikni oshirishdan iborat.

G‘oliblar 5 ta nominatsiya bo‘yicha taqdirlanadi:  

-  “Korrupsiyaga qarshi kurashishdagi yutuqlari hamda uzoq yillik faoliyati uchun”;

-  “Korrupsiyaga qarshi kurashish yo‘nalishidagi taʼlim va akademik tadqiqotlar uchun”;

-  “Korrupsiyaga qarshi kurashishga oid yoshlar tashabbuslari va ijodi uchun”;

-  “Innovatsiyalar va jurnalistik materiallar uchun”;

-  “Sportni korrupsiyadan himoya qilish”;

Nomzodlar

Nomzodlar qatoriga davlat idoralari va tashkilotlari, xalqaro tashkilotlar, ilmiy muassasalar, nufuzli va tegishli nodavlat notijorat tashkilotlari va professional birlashmalarning masʼul shaxslari kiradi.

Nomzodlar hukumatlardagi yuqori darajadagi siyosiy lavozimlarni egallab turgan amaldagi shaxslarni (vazir darajasi va undan yuqori deb belgilangan) yoki davlat idoralari yoki xalqaro tashkilotlar va idoralar rahbarlarini o‘z ichiga olmaydi.

Nomzodlar faqat uchinchi shaxslar tomonidan, yaʼni nomzodi ko‘rsatilayotgan shaxs yoki tashkilot emas, boshqa tashkilotlar, ilmiy muassasalar tomonidan ko‘rsatiladi. 

Tanlovga hujjat topshirish

Nomzod va uni taqdim etayotgan tashkilot haqidagi maʼlumotlar aceaward.com veb-saytdagi onlayn shakldagi ariza shaklini (ingliz tilida) to‘ldirish orqali kiritiladi.

Hujjatlarni ayni vaqtdan 30 sentyabr kuniga qadar qabul qilinadi.

Hujjatlar Mukofot kotibiyati tomonidan qabul qilinadi, Baholash bo‘yicha maslahat kengashi hamda Oliy darajadagi mukofot qo‘mitasi (Qatarning Qonun ustuvorligi va korrupsiyaga qarshi kurashish markazi vasiylik kengashi aʼzolaridan iborat) tomonidan baholanadi.

Muhim eslatmalar:

1) Nomzodlarni faqat yuridik shaxslar taqdim etishi mumkin. O‘z-o‘zini ko‘rsatgan nomzodlar hujjatlari ko‘rib chiqilmaydi.

2) Arizaga ilova qilingan maʼlumotlar, hujjatlar, materiallar istalgan tilda taqdim etilishi mumkin. Biroq, ular mazmunini ochib beruvchi ingliz tilidagi annotatsiya, maʼlumotnoma bilan birgalikda topshirilishi kerak.

3) Mukofot kotibiyati tomonidan nomzod yoki nomzodni ko‘rsatgan tashkilotlarga qo‘shimcha maʼlumotlarni so‘rab olishi mumkin.

4) G‘oliblar dekabr oyida eʼlon qilinadi.

Baholash mezonlari

1. Korrupsiyaga qarshi kurashishdagi yutuqlari hamda uzoq yillik faoliyati uchun:

- Korrupsiyaga qarshi kurash bo‘yicha mahalliy va/yoki xalqaro darajada faoliyati yoki butun umrlik faoliyati;

- Korrupsiyaning oldini olish va qarshi kurashishdagi qatʼiyati;

- Shaxsiy va professional halollikni ko‘rsatish;

- Korrupsiyaning oldini olish yoki bartaraf etishga qaratilgan harakatlar, tashabbuslar va ishlarni bajarish;

- Boshqalar uchun namuna bo‘lib xizmat qilish.

2. Korrupsiyaga qarshi kurashish yo‘nalishidagi taʼlim va akademik tadqiqotlar uchun:

- Korrupsiyaga qarshi kurashish sohasidagi taniqli tadqiqot va nashrlari uchun tan olingan muassasa;

- Tadqiqotlar, nashrlar va taʼlim bilan bog‘liq faoliyat orqali korrupsiyaga qarshi kurashish bo‘yicha bilimlarning o‘sishiga hissa qo‘shish;

- Jamiyatning korrupsiyaga qarshi kurashish bo‘yicha xabardorligini oshirishga katta hissa qo‘shish.

3. Korrupsiyaga qarshi kurashishga oid yoshlar tashabbuslari va ijodi uchun:

- Yoshlar tomonidan yoki yoshlar uchun ishlab chiqilgan va boshqariladigan loyihalar, xususan, nodavlat tashkilotlar yoki fuqarolik jamiyati tomonidan qo‘llab-quvvatlanadigan loyihalar uchun (loyihalar yoshlar boshchiligidagi korrupsiyaga qarshi tashabbuslar, yozgi lagerlar yoki maktablar va yoshlar tomonidan muvofiqlashtirilgan xabardorlikni oshirish kampaniyalaridan iborat bo‘lishi mumkin);

- Yoshlar yoki jamiyat o‘rtasida korrupsiyaning oldini olish va unga qarshi kurashish bo‘yicha xabardorlikni oshirish, korrupsiyaning oldini olish va unga qarshi kurashish bo‘yicha yangi yechimlarni taklif qilishga qaratilgan individual yoki jamoaviy faoliyat, loyihalar yoki tashabbuslarni ishlab chiqish va amalga oshirishda yetakchilik qilish.

4. Innovatsiyalar va jurnalistik materiallar uchun:

- Korrupsiyaga qarshi kurashish yoki xabardorlikni oshirishga qaratilgan transformativ yechimlar, yondashuvlarni ishlab chiqish va/yoki ulardan foydalanish (yechimlar, yondashuvlar IT va kommunikatsiya texnologiyalaridan hamda boshqa innovatsion metodologiyalardan foydalanishni o‘z ichiga olishi mumkin);

- Korrupsiya va korrupsionerlarni fosh qilish va hujjatlarni tahlil qilish orqali korrupsiyaga qarshi kurashishga o‘z hissasini qo‘shgan sog‘lom va xolis jurnalistik surishtiruvlar.

5. Sportni korrupsiyadan himoya qilish (sport tadbirlari va assotsiatsiyalari spektri bilan bog‘liq):

- Yirik sport tadbirlaridagi korrupsiyani aniqlash va yoki bartaraf etish;

- Noqonuniy pul tikishni aniqlash yoki bartaraf etish;

- Sport musobaqalarini manipulyatsiya qilinganini aniqlash yoki bartaraf etish;

- Sportdagi korrupsiya va suiisteʼmolliklarni aniqlash va bartaraf etish;

- Sportdagi gender va korrupsiya.

Mukofotga oid qo‘shimcha maʼlumotlar bilan aceaward.com sayti orqali tanishishingiz mumkin.

Korrupsiyaga qarshi kurashish agentligi Mukofot va unga hujjat topshirish jarayonlari bo‘yicha metodik tavsiyalarni berishi mumkin.

Murojaat uchun raqamlar: 71 202 04 02 (421, 423, 442).

Korrupsiyaga qarshi kurashish agentligi

Axborot xizmati