Коррупцияга қарши курашиш агентлиги  делегацияси  БМТнинг Тараққиёт Дастури кўмагида жорий йилнинг 11-16 сентябрь  кунлари ишчи ташриф билан Корея Республикасида бўлди.

Ташриф доирасида Кореянинг Коррупцияга қарши кураш ва фуқаролик ҳуқуқлари комиссияси (АСРС), Коррупцияга қарши курашиш тренинг институти, KOICA, БМТ ТДнинг Сеулдаги ваколатхонаси вакиллари билан коррупцияга қарши курашиш соҳасида ўзаро тажриба алмашиш, икки мамлакат масъул идоралари ўртасида соҳада яқин ҳамкорликни йўлга қўйиш, шу жумладан, қўшма лойиҳаларни амалга ошириш масалалари юзасидан икки томонлама учрашувлар ташкил этилди.

Хусусан, Кореянинг Коррупцияга қарши кураш ва фуқаролик ҳуқуқлари комиссияси (АСРС) вакиллари билан учрашувда ACRC томонидан ишлаб чиқилган “Clean Portal” (“Шаффоф портал”) платформасининг илғор ютуқлари, замонавий қулайликларини Ўзбекистонда фуқароларнинг коррупция фактлари тўғрисида тезкор хабардор қилиш имконини берувчи “EAnticor.uz” платформасига татбиқ этиш масалалари муҳокама қилинди.

Қайд этилганидек, платформага кирувчилар коррупция ҳамда жамоатчилик манфаатларига зарар етказувчи ҳолатлар тўғрисида мурожаат қайси ташкилотга тааллуқлилигидан қатъий назар онлайн мурожаат қолдириши мумкин. Шунингдек, мурожаатчи ўзи учун компенсация (рағбатлантириш) ва ҳимоя сўрай олади.  Рақамли тизим мурожаатчининг шахсий маълумотларини сир тутган ҳолда мурожаатни ишончли шахслар орқали қабул қилади.

Фуқаролар ушбу дастур орқали коррупция тўғрисида кўп юборилаётган мурожаатлар тенденцияси, соҳалар ва ҳудудлар кесимида базага келиб тушган мурожаатлар сони ва ҳал этилганлиги юзасидан статистик маълумотларни олиш имконига эга. Давлат органлари учун  эса  мурожаатларнинг мазмуни, соҳаси, органи, ОАВда  эълон қилинган хабар ва мурожаатларнинг ҳал этилиши ҳолати, коррупция содир этганликда айбланиб, ишдан четлатилган давлат хизматчилари тўғрисида ва бошқа турдаги маълумотларни олиш қулайлиги яратилган.

Мулоқотлар мобайнида ҳамкорлик алоқаларини янада мустаҳкамлаш мақсадида Комиссия ва Агентлик ўртасида ўзаро англашув меморандуми имзоланди.

Меморандумда  коррупцияга қарши кураш чоралари ва фуқаролик ҳуқуқларини ҳимоя қилиш билан боғлиқ ахборот (тажриба, амалиёт, тадқиқот натижалари) алмашиш мақсадида қўшма лойиҳалар ташкил этиш каби кенг кўламли ҳамкорликка оид мақсад ва вазифалар белгиланган.

Делегация вакиллари Коррупцияга қарши курашиш тренинг институтида бўлиб,  Кореянинг давлат хизматчилари ҳамда жамоатчилик вакилларини коррупцияга қарши ўқитиш масалалари билан яқиндан танишди.

Мамлакатда коррупцияга қарши ўқитишга ихтисослашган ягона таълим маркази саналган мазкур Институтда дарслар коррупцияга қарши курашишга масъул  давлат органларининг раҳбар ва ходимлари учун оффлайн шаклда ташкил этилади. (бошқа ходимлар учун онлайн шаклда).

Маълумот берилишича,  2023 йилга мўлжалланган давлат дастурига кўра, 265 минг нафар давлат хизматчилари ва болалар, ўсмирлар, чет эл давлат хизматчилари учун мўлжалланган 50 та дастурлар ишлаб чиқилган бўлиб, дарслар интенсив тарзда амалга оширилмоқда. 

Институт вакиллари билан учрашувда ушбу ўқув курсларида Ўзбекистон вакилларининг  иштирок этиши бўйича келишувга эришилди.

Айтиш жоиз, бугунги кунда  Ўзбекистон KOICA билан “Country partnership strategy” Давлат билан ҳамкорлик стратегияси асосида таълим, соғлиқни сақлаш ва давлат бошқаруви каби йўналишларда бир қатор лойиҳаларни амалга ошириб келмоқда.   KOICA раҳбарияти билан учрашувда Агентлик вакиллари томонидан  ўтказилган тақдимотда  Ўзбекистонда коррупцияга қарши курашиш борасидаги ислоҳотлар қаторида Корея тажрибаси асосида йўлга қўйилган шу каби ташаббуслар ва уларнинг натижаларига алоҳида урғу берилди. 

Учрашув давомида давлат бошқаруви йўналишидаги лойиҳаларда Агентлик ва коррупцияга қарши курашишга масъул бошқа давлат идоралари ходимларининг малакасини оширишни ташкил этиш бўйича музокаралар олиб борилди. Жумладан, вакилларимиз томонидан айни йўналишда қисқа муддатли коррупцияга қарши курашиш соҳасидаги ўқув курсларини ишлаб чиқиш бўйича таклиф берилди.

KOICAнинг Стратегик ҳамкорлик бўйича бош директори Сын Хун Кан Корея ва Ўзбекистон ўртасида стратегик ҳамкорлик ва унинг самараларини эътироф этган ҳолда бу каби ҳамкорлик ташаббусларини қўллаб-қувватлашга тайёр эканлигини билдирди. 

БМТ Тараққиёт дастурининг Сеулдаги ваколатхонаси  раҳбари Энн Юпнер фикрича, Ўзбекистонда коррупцияга қарши курашиш ишлари самарадорлигини рейтинг баҳолаш тизимини жорий этиш бўйича амалга оширилган натижалар бошқа давлатлар учун ижобий тажриба бўла олади. Ваколатхона вакиллари билан учрашувда Корея билан соҳадаги ўзаро ҳамкорликнинг шу каби самаралари муҳокама қилиниб, келгусидаги ҳамкорлик режалари белгилаб олинди.

Учрашувлар якуни бўйича Корея томони Агентлик делегацияси томонидан  илгари сурилган ўзаро манфаатли таклифларни қўллаб-қувватлаб, уларни истиқболда амалга оширишга тайёр эканлигини билдирди.

Коррупцияга қарши курашиш агентлиги

Ахборот хизмати