Korrupsiyaga qarshi kurashish agentligi  delegatsiyasi  BMTning Taraqqiyot Dasturi ko‘magida joriy yilning 11-16-sentabr  kunlari ishchi tashrif bilan Koreya Respublikasida bo‘ldi.

Tashrif doirasida Koreyaning Korrupsiyaga qarshi kurash va fuqarolik huquqlari komissiyasi (АСРС), Korrupsiyaga qarshi kurashish trening instituti, KOICA, BMT TDning Seuldagi vakolatxonasi vakillari bilan korrupsiyaga qarshi kurashish sohasida o‘zaro tajriba almashish, ikki mamlakat masʼul idoralari o‘rtasida sohada yaqin hamkorlikni yo‘lga qo‘yish, shu jumladan, qo‘shma loyihalarni amalga oshirish masalalari yuzasidan ikki tomonlama uchrashuvlar tashkil etildi.

Xususan, Koreyaning Korrupsiyaga qarshi kurash va fuqarolik huquqlari komissiyasi (АСРС) vakillari bilan uchrashuvda ACRC tomonidan ishlab chiqilgan “Clean Portal” (“Shaffof portal”) platformasining ilg‘or yutuqlari, zamonaviy qulayliklarini O‘zbekistonda fuqarolarning korrupsiya faktlari to‘g‘risida tezkor xabardor qilish imkonini beruvchi “EAnticor.uz” platformasiga tatbiq etish masalalari muhokama qilindi.

Qayd etilganidek, platformaga kiruvchilar korrupsiya hamda jamoatchilik manfaatlariga zarar yetkazuvchi holatlar to‘g‘risida murojaat qaysi tashkilotga taalluqliligidan qatʼiy nazar onlayn murojaat qoldirishi mumkin. Shuningdek, murojaatchi o‘zi uchun kompensatsiya (rag‘batlantirish) va himoya so‘ray oladi.  Raqamli tizim murojaatchining shaxsiy maʼlumotlarini sir tutgan holda murojaatni ishonchli shaxslar orqali qabul qiladi.

Fuqarolar ushbu dastur orqali korrupsiya to‘g‘risida ko‘p yuborilayotgan murojaatlar tendensiyasi, sohalar va hududlar kesimida bazaga kelib tushgan murojaatlar soni va hal etilganligi yuzasidan statistik maʼlumotlarni olish imkoniga ega. Davlat organlari uchun  esa  murojaatlarning mazmuni, sohasi, organi, OAVda  eʼlon qilingan xabar va murojaatlarning hal etilishi holati, korrupsiya sodir etganlikda ayblanib, ishdan chetlatilgan davlat xizmatchilari to‘g‘risida va boshqa turdagi maʼlumotlarni olish qulayligi yaratilgan.

Muloqotlar mobaynida hamkorlik aloqalarini yana-da mustahkamlash maqsadida Komissiya va Agentlik o‘rtasida o‘zaro anglashuv memorandumi imzolandi.

Memorandumda  korrupsiyaga qarshi kurash choralari va fuqarolik huquqlarini himoya qilish bilan bog‘liq axborot (tajriba, amaliyot, tadqiqot natijalari) almashish maqsadida qo‘shma loyihalar tashkil etish kabi keng ko‘lamli hamkorlikka oid maqsad va vazifalar belgilangan.

Delegatsiya vakillari Korrupsiyaga qarshi kurashish trening institutida bo‘lib,  Koreyaning davlat xizmatchilari hamda jamoatchilik vakillarini korrupsiyaga qarshi o‘qitish masalalari bilan yaqindan tanishdi.

Mamlakatda korrupsiyaga qarshi o‘qitishga ixtisoslashgan yagona taʼlim markazi sanalgan mazkur Institutda darslar korrupsiyaga qarshi kurashishga masʼul  davlat organlarining rahbar va xodimlari uchun offlayn shaklda tashkil etiladi. (boshqa xodimlar uchun onlayn shaklda).

Maʼlumot berilishicha,  2023-yilga mo‘ljallangan davlat dasturiga ko‘ra, 265 ming nafar davlat xizmatchilari va bolalar, o‘smirlar, chet el davlat xizmatchilari uchun mo‘ljallangan 50 ta dasturlar ishlab chiqilgan bo‘lib, darslar intensiv tarzda amalga oshirilmoqda. 

Institut vakillari bilan uchrashuvda ushbu o‘quv kurslarida O‘zbekiston vakillarining  ishtirok etishi bo‘yicha kelishuvga erishildi.

Aytish joiz, bugungi kunda  O‘zbekiston KOICA bilan “Country partnership strategy” Davlat bilan hamkorlik strategiyasi asosida taʼlim, sog‘liqni saqlash va davlat boshqaruvi kabi yo‘nalishlarda bir qator loyihalarni amalga oshirib kelmoqda.  KOICA rahbariyati bilan uchrashuvda Agentlik vakillari tomonidan o‘tkazilgan taqdimotda  O‘zbekistonda korrupsiyaga qarshi kurashish borasidagi islohotlar qatorida Koreya tajribasi asosida yo‘lga qo‘yilgan shu kabi tashabbuslar va ularning natijalariga alohida urg‘u berildi. 

Uchrashuv davomida davlat boshqaruvi yo‘nalishidagi loyihalarda Agentlik va korrupsiyaga qarshi kurashishga masʼul boshqa davlat idoralari xodimlarining malakasini oshirishni tashkil etish bo‘yicha muzokaralar olib borildi. Jumladan, vakillarimiz tomonidan ayni yo‘nalishda qisqa muddatli korrupsiyaga qarshi kurashish sohasidagi o‘quv kurslarini ishlab chiqish bo‘yicha taklif berildi.

KOICAning Strategik hamkorlik bo‘yicha bosh direktori Sin Xun Kan Koreya va O‘zbekiston o‘rtasida strategik hamkorlik va uning samaralarini eʼtirof etgan holda bu kabi hamkorlik tashabbuslarini qo‘llab-quvvatlashga tayyor ekanligini bildirdi. 

BMT Taraqqiyot dasturining Seuldagi vakolatxonasi  rahbari Enn Yupner fikricha, O‘zbekistonda korrupsiyaga qarshi kurashish ishlari samaradorligini reyting baholash tizimini joriy etish bo‘yicha amalga oshirilgan natijalar boshqa davlatlar uchun ijobiy tajriba bo‘la oladi. Vakolatxona vakillari bilan uchrashuvda Koreya bilan sohadagi o‘zaro hamkorlikning shu kabi samaralari muhokama qilinib, kelgusidagi hamkorlik rejalari belgilab olindi.

Uchrashuvlar yakuni bo‘yicha Koreya tomoni Agentlik delegatsiyasi tomonidan  ilgari surilgan o‘zaro manfaatli takliflarni qo‘llab-quvvatlab, ularni istiqbolda amalga oshirishga tayyor ekanligini bildirdi.

Korrupsiyaga qarshi kurashish agentligi

Axborot xizmati