Агентлик тақдимномасига асосан Қарши шаҳар ҳокимининг ўзини рағбатлантириш учун 75 миллион сўм маблағ ажратганига оид қарор бекор қилинди

Ижтимоий тармоқларда Қарши шаҳар ҳокими ўзини рағбатлантириш учун 75 миллион сўм маблағ ажратганига оид хабарлар эълон қилиниб, кенг муҳокамаларга сабаб бўлган эди. 

Мазкур хабар юзасидан Коррупцияга қарши курашиш агентлиги ва Қашқадарё вилояти ҳокимлигининг коррупцияга қарши ички назорат тузилмаси томонидан ўрганиш ўтказилди. 

Ўрганишда Қарши шаҳар ҳокимининг 2023-йил 25-августдаги 251-4-69-Қ/23-сонли қарори амалдаги қонунчилик ҳужжатлари талабларига зид тарзда қабул қилинганлиги аниқланди. 

Агентлик томонидан вилоят ҳокимлигига коррупцияни келтириб чиқарувчи сабаб ва шарт-шароитларни бартараф этиш чораларини кўриш тўғрисида тақдимнома киритилди. 

Тақдимномага асосан, вилоят ҳокимининг 2023 йил 19 сентябрь куни 414-4-0-Q/23-сон қарори билан Қарши шаҳар ҳокимининг ушбу қарори бекор қилинди. 

Шунингдек, мазкур ҳолатда қонунбузилишига йўл қўйган шахсларга тегишли қонуний чора кўриш учун Агентлик томонидан тўпланган ҳужжатлар Ўзбекистон Республикаси Бош прокуратураси ҳамда Иқтисодиёт ва молия вазирлигига юборилди. 

Агентлик фуқаролик жамияти вакилларининг жамоатчилик назорати ва фаол фуқаролик позициясини  қўллаб-қувватлайди ҳамда давлат органлари ва ташкилотларидаги ҳар қандай кўринишдаги коррупциявий хавф-хатарларга муросасиз муносабатда бўлишга чорлайди. 

Коррупцияга қарши курашиш агентлиги

Ахборот хизмати