Ijtimoiy tarmoqlarda Qarshi shahar hokimi o‘zini rag‘batlantirish uchun 75 million so‘m mablag‘ ajratganiga oid xabarlar eʼlon qilinib, keng muhokamalarga sabab bo‘lgan edi.

Mazkur xabar yuzasidan Korrupsiyaga qarshi kurashish agentligi va Qashqadaryo viloyati hokimligining korrupsiyaga qarshi ichki nazorat tuzilmasi tomonidan o‘rganish o‘tkazildi.

O‘rganishda Qarshi shahar hokimining 2023-yil 25-avgustdagi 251-4-69-Q/23-sonli qarori amaldagi qonunchilik hujjatlari talablariga zid tarzda qabul qilinganligi aniqlandi.

Agentlik tomonidan viloyat hokimligiga korrupsiyani keltirib chiqaruvchi sabab va shart-sharoitlarni bartaraf etish choralarini ko‘rish to‘g‘risida taqdimnoma kiritildi.

Taqdimnomaga asosan, viloyat hokimining 2023-yil 19-sentabr kuni 414-4-0-Q/23-son qarori bilan Qarshi shahar hokimining ushbu qarori bekor qilindi.

Shuningdek, mazkur holatda qonunbuzilishiga yo‘l qo‘ygan shaxslarga tegishli qonuniy chora ko‘rish uchun Agentlik tomonidan to‘plangan hujjatlar O‘zbekiston Respublikasi Bosh prokuraturasi hamda Iqtisodiyot va moliya vazirligiga yuborildi.

Agentlik fuqarolik jamiyati vakillarining jamoatchilik nazorati va faol fuqarolik pozitsiyasini qo‘llab-quvvatlaydi hamda davlat organlari va tashkilotlaridagi har qanday ko‘rinishdagi korrupsiyaviy xavf-xatarlarga murosasiz munosabatda bo‘lishga chorlaydi.

Korrupsiyaga qarshi kurashish agentligi

Axborot xizmati