Бугун Коррупцияга қарши курашиш агентлиги ходимлари учун экспертлар иштирокида янги таҳрирдаги Конституциянинг мазмун-моҳиятини кенг ўрганишга қаратилган ўқув семинари ўтказилди.

Мазкур тадбир мамлакатимиз Президентининг “Янги таҳрирдаги Ўзбекистон Республикаси Конституциясини амалга ошириш бўйича биринчи навбатдаги чора-тадбирлар тўғрисида” 2023 йил 8 майдаги ПФ–67-сон Фармонида белгиланган мақсад-вазифаларнинг ижросини таъминлаш мақсадида ташкил этилди. Хусусан, Фармонда Янги таҳрирдаги Конституцияни сўзсиз ва тўлиқ амалга ошириш барча даражадаги давлат органлари ва ташкилотларининг биринчи навбатдаги устувор вазифаси этиб белгиланган.

Шундан келиб чиққан ҳолда ўқув семинарида Конституцияда белгиланган асосий принциплар, жамият ва шахс масалалари, хусусан давлат хизматчилари учун белгиланган ҳуқуқий нормалар ҳамда уларни давлат хизматчисининг ҳар кунлик фаолиятига татбиқ этиш тўғрисида маъруза ва тақдимот қилинди.

Мулоқотлар мобайнида экспертлар томонидан Ўзбекистоннинг миллий тараққиётида коррупцияга қарши муросасиз курашишга қаратилган изчил ислоҳотлар тобора муҳим аҳамият касб этиб бораётгани ва бунинг ёрқин далили сифатида коррупцияга қарши курашиш билан боғлиқ нормалар янгиланган конституцияда мустаҳкамланганига алоҳида урғу берилди.

Ўқув семинари мобайнида бошқарувда конституциявий нормаларнинг ижросини тўлиқ таъминлаш, уларни давлат хизматчисининг ҳар кунлик фаолиятига татбиқ этиш масалалари юзасидан ҳам ўзаро фикр алмашилди.

Коррупцияга қарши курашиш агентлиги

Ахборот хизмати