Bugun Korrupsiyaga qarshi kurashish agentligi xodimlari uchun ekspertlar ishtirokida yangi tahrirdagi Konstitutsiyaning mazmun-mohiyatini keng o‘rganishga qaratilgan o‘quv seminari o‘tkazildi.

Mazkur tadbir mamlakatimiz Prezidentining “Yangi tahrirdagi O‘zbekiston Respublikasi Konstitutsiyasini amalga oshirish bo‘yicha birinchi navbatdagi chora-tadbirlar to‘g‘risida” 2023 yil 8 maydagi PF–67-son Farmonida belgilangan maqsad-vazifalarning ijrosini taʼminlash maqsadida tashkil etildi. Xususan, Farmonda Yangi tahrirdagi Konstitutsiyani so‘zsiz va to‘liq amalga oshirish barcha darajadagi davlat organlari va tashkilotlarining birinchi navbatdagi ustuvor vazifasi etib belgilangan.

Shundan kelib chiqqan holda o‘quv seminarida Konstitutsiyada belgilangan asosiy prinsiplar, jamiyat va shaxs masalalari, xususan davlat xizmatchilari uchun belgilangan huquqiy normalar hamda ularni davlat xizmatchisining har kunlik faoliyatiga tatbiq etish to‘g‘risida maʼruza va taqdimot qilindi.

Muloqotlar mobaynida ekspertlar tomonidan O‘zbekistonning milliy taraqqiyotida korrupsiyaga qarshi murosasiz kurashishga qaratilgan izchil islohotlar tobora muhim ahamiyat kasb etib borayotgani va buning yorqin dalili sifatida korrupsiyaga qarshi kurashish bilan bog‘liq normalar yangilangan konstitutsiyada mustahkamlanganiga alohida urg‘u berildi.

O‘quv seminari mobaynida boshqaruvda konstitutsiyaviy normalarning ijrosini to‘liq taʼminlash, ularni davlat xizmatchisining har kunlik faoliyatiga tatbiq etish masalalari yuzasidan ham o‘zaro fikr almashildi.

Korrupsiyaga qarshi kurashish agentligi

Axborot xizmati