Бугун Коррупцияга қарши курашиш агентлигида “Коррупциянинг олдини олишга қаратилган инновацион ва замон талабларига жавоб берадиган ечимларни ривожлантириш масалалари” мавзусида академик доира вакилларининг мулоқоти ташкил этилди.
Таъкидланганидек, коррупцияга қарши курашиш йўналишида амалга оширилаётган чораларнинг самарадорлигини оширишда илмий ёндашувнинг ўрни муҳим. Айнан коррупцияни келтириб чиқараётган сабабларни ўрганиш, таҳлил қилиш, уларни бартараф этиш бўйича асосланган таклифларга эҳтиёж юқори. Бу эса мазкур йўналишдаги илмий тадқиқотлар, ўрганишлар кўламини оширишни талаб этади.
Шу мақсадда Коррупцияга қарши курашиш агентлиги ҳузурида академик доира вакилларидан иборат Экспертлар гуруҳи ташкил этилди ҳамда ушбу мулоқот доирасида гуруҳнинг таъсис йиғилиши ўтказилди.
Экспертлар гуруҳи фаолиятидан кўзланган асосий мақсад юқоридаги вазифаларни мувофиқлаштириш ва коррупцияга қарши курашишнинг илмий асосларини такомиллаштириш, соҳага оид илмий тадқиқотларни ташкил этиш, шунингдек, Агентлик ва илмий доира вакиллари, ихтисослашган таълим муассасалари ўртасида ўзаро мулоқотни ривожлантиришдан иборат.
Мулоқот мобайнида қуйидагилар Экспертлар гуруҳининг асосий фаолият йўналишлари этиб белгиланди:
Очиқлик индекси платформасининг ишлаш механизмидаги камчиликларни таҳлил қилиш;
Коррупцияга қарши узоқ, ўрта, қисқа муддатли, аниқ мақсадларни SWOT таҳлил қилиш;
Ёшларда коррупцияга қарши муросасиз муҳитни шакллантиришга оид чораларни белгилаш;
Коррупцияга қарши курашиш ҳудудий кенгашлари фаолиятини таҳлил қилиш ва бошқалар.
Шунингдек, Гуруҳдан кутилаётган асосий натижалар сифатида коррупциявий хатти-ҳаракатларнинг ривожланиш тенденциялари ва шакллари, уларнинг олдини олиш бўйича илмий исботланган, инновацион воситалар, усуллар ва ечимларни шакллантириш эканлиги қайд этилди.
Гуруҳ аъзолари томонидан ушбу мақсадни амалга ошириш, қолаверса, Гуруҳни ташкилий-услубий жиҳатдан қўллаб-қувватлаш бўйича бир қатор таклиф ва тавсиялар билдирилди.
Шунингдек, йиғилишда ташкилий масалалар ҳам кўриб чиқилди. Унга кўра, Ички ишлар вазирлиги Академияси Жазони ижро этиш кафедраси профессори Турсунов Ахтам Саломович Экспертлар гуруҳининг раиси этиб сайланди.
Коррупцияга қарши курашиш агентлиги
Ахборот хизмати