Bugun Korrupsiyaga qarshi kurashish agentligida “Korrupsiyaning oldini olishga qaratilgan innovatsion va zamon talablariga javob beradigan yechimlarni rivojlantirish masalalari” mavzusida akademik doira vakillarining muloqoti tashkil etildi.

Taʼkidlanganidek, korrupsiyaga qarshi kurashish yo‘nalishida amalga oshirilayotgan choralarning samaradorligini oshirishda ilmiy yondashuvning o‘rni muhim. Aynan korrupsiyani keltirib chiqarayotgan sabablarni o‘rganish, tahlil qilish, ularni bartaraf etish bo‘yicha asoslangan takliflarga ehtiyoj yuqori. Bu esa mazkur yo‘nalishdagi ilmiy tadqiqotlar, o‘rganishlar ko‘lamini oshirishni talab etadi.

Shu maqsadda Korrupsiyaga qarshi kurashish agentligi huzurida akademik doira vakillaridan iborat Ekspertlar guruhi tashkil etildi hamda ushbu muloqot doirasida guruhning taʼsis yig‘ilishi o‘tkazildi.

Ekspertlar guruhi faoliyatidan ko‘zlangan asosiy maqsad yuqoridagi vazifalarni muvofiqlashtirish va korrupsiyaga qarshi kurashishning ilmiy asoslarini takomillashtirish, sohaga oid ilmiy tadqiqotlarni tashkil etish, shuningdek, Agentlik va ilmiy doira vakillari, ixtisoslashgan taʼlim muassasalari o‘rtasida o‘zaro muloqotni rivojlantirishdan iborat.

Muloqot mobaynida quyidagilar Ekspertlar guruhining asosiy faoliyat yo‘nalishlari etib belgilandi:

Ochiqlik indeksi platformasining ishlash mexanizmidagi kamchiliklarni tahlil qilish;

Korrupsiyaga qarshi uzoq, o‘rta, qisqa muddatli, aniq maqsadlarni SWOT tahlil qilish;

Yoshlarda korrupsiyaga qarshi murosasiz muhitni shakllantirishga oid choralarni belgilash;

Korrupsiyaga qarshi kurashish hududiy kengashlari faoliyatini tahlil qilish va boshqalar.

Shuningdek, Guruhdan kutilayotgan asosiy natijalar sifatida korrupsiyaviy xatti-harakatlarning rivojlanish tendensiyalari va shakllari, ularning oldini olish bo‘yicha ilmiy isbotlangan, innovatsion vositalar, usullar va yechimlarni shakllantirish ekanligi qayd etildi.

Guruh aʼzolari tomonidan ushbu maqsadni amalga oshirish, qolaversa, Guruhni tashkiliy-uslubiy jihatdan qo‘llab-quvvatlash bo‘yicha bir qator taklif va tavsiyalar bildirildi.

Shuningdek, yig‘ilishda tashkiliy masalalar ham ko‘rib chiqildi. Unga ko‘ra, Ichki ishlar vazirligi Akademiyasi Jazoni ijro etish kafedrasi professori Tursunov Axtam Salomovich Ekspertlar guruhining raisi etib saylandi.

Korrupsiyaga qarshi kurashish agentligi

Axborot xizmati