Коррупцияга қарши курашиш агентлиги давлат буюртмачилари томонидан амалга оширилаётган харидларни доимий равишда мониторинг тартибида ўрганиб келмоқда.

Масофавий мониторинг тадбирларида 2023 йил сентябрь ойида айрим давлат буюртмачилари 15 та ҳолатда жами 13,7 млрд сўмлик давлат харидларини амалга оширишда бир қатор қонунбузилиши ҳолатларига йўл қўйганлиги аниқланди.

Жумладан:

– Урганч олимпия ва паралимпия спорт турларига тайёрлаш маркази буюртмачилигида давлат харидлари электрон ахборот порталига 2023 йил 24 август куни (293492-сонли лот билан) жойлаштирилган 1,8 млрд сўмлик аутсорсинг хизматини амалга ошириш;

– Оққўрғон туман Мактабгача ва мактаб таълими бўлими буюртмачилигида давлат харидлари электрон ахборот порталига 2023 йил 31 август куни (295847-сонли лот билан) жойлаштирилган 250 млн сўмлик мебеллар харид қилиш;

– Денов туман Мактабгача ва мактаб таълими бўлими буюртмачилигида давлат харидлари электрон ахборот порталига 2023 йил 18 август куни (291484-сонли лот билан) бошланғич қиймати 712,1 млн сўмлик компьютер, электрон ва оптик қурилмалар харид қилиш;

– Бўстонлик тумани имконияти чекланган болалар учун 125-сонли ихтисослаштирилган ёрдамчи мактаб-интернати буюртмачилигида давлат харидлари электрон ахборот порталига 2023 йил 5сентябрь куни
(296754-сонли лот билан) жойлаштирилган бошланғич қиймати 200,5 млн сўмлик хомашёларни сотиб олиш;

– “Qarshi Xalqaro Aeroporti” МЧЖ буюртмачилигида 2023 йил 12 сентябрь куни (23110012271294-сонли лот бўйича) 434 млн сўмга иссиқлик тизимини модернизация қилиш хизматини амалга ошириш юзасидан ўтказилган давлат харидларини амалга оширишда қонунчиликка зид ҳолатлар аниқланди.

Хусусан, Ўзбекистон Республикаси “Давлат харидлари тўғрисида”ги Қонуннинг 10-моддаси (рақобат ва холислик принципи), 14-моддаси (манфаатлар тўқнашуви), 20-моддаси (харид комиссиясининг ҳуқуқ ва мажбуриятлари), 42-моддаси (Иштирокчини харид қилиш тартиб-таомилларида иштирок этишдан четлатиш шартлари) ва 46-моддаси (давлат харидлари жараёнидаги чекловлар) ҳамда Ўзбекистон Республикаси Вазирлар Маҳкамасининг “Давлат харидларини амалга ошириш билан боғлиқ тартиб-таомилларни ташкил этиш ва ўтказиш тартиби тўғрисида”ги Қарори билан тасдиқланган Низомнинг бир қатор талаблари бузилишига йўл қўйилган.  

Шу каби “Yashil Energiya” МЧЖ буюртмачилигида электрон ахборот порталида 2023-йил 1-август куни (23120012285652-сонли лот билан) жами қиймати 2,2 млрд сўмлик декларант хизматларидан фойдаланиш юзасидан ўтказилган давлат хариди ўрганилганда Ўзбекистон Республикаси “Давлат харидлари тўғрисида”ги Қонуннинг 32-моддаси (баҳолаш мезонларига ва тартиб-таомилларига тааллуқли қоидалар) ҳамда Ўзбекистон Республикаси Вазирлар Маҳкамасининг “Давлат харидларини амалга ошириш билан боғлиқ тартиб-таомилларни ташкил этиш ва ўтказиш тартиби тўғрисида”ги Қарори билан тасдиқланган Низом талабларига амал қилинмаганлиги маълум бўлди.

Юқоридаги ҳолатлар юзасидан Агентлик томонидан буюртмачиларга тақдимнома киритилиб, давлат харидлари бўйича харид комиссиясининг баённомалари бекор қилинди.

Коррупцияга қарши курашиш агентлиги

Ахборот хизмати