Korrupsiyaga qarshi kurashish agentligi davlat buyurtmachilari tomonidan amalga oshirilayotgan xaridlarni doimiy ravishda monitoring tartibida o‘rganib kelmoqda.

Masofaviy monitoring tadbirlarida 2023-yil sentabr oyida ayrim davlat buyurtmachilari 15 ta holatda jami 13,7 mlrd so‘mlik davlat xaridlarini amalga oshirishda bir qator qonunbuzilishi holatlariga yo‘l qo‘yganligi aniqlandi.

Jumladan:

– Urganch olimpiya va paralimpiya sport turlariga tayyorlash markazi buyurtmachiligida davlat xaridlari elektron axborot portaliga 2023-yil 24-avgust kuni (293492-sonli lot bilan) joylashtirilgan 1,8 mlrd so‘mlik autsorsing xizmatini amalga oshirish;

– Oqqo‘rg‘on tuman Maktabgacha va maktab taʼlimi bo‘limi buyurtmachiligida davlat xaridlari elektron axborot portaliga 2023-yil 31-avgust kuni (295847-sonli lot bilan) joylashtirilgan 250 mln so‘mlik mebellar xarid qilish;

– Denov tuman Maktabgacha va maktab taʼlimi bo‘limi buyurtmachiligida davlat xaridlari elektron axborot portaliga 2023-yil 18-avgust kuni (291484-sonli lot bilan) boshlang‘ich qiymati 712,1 mln so‘mlik kompyuter, elektron va optik qurilmalar xarid qilish;

– Bo‘stonlik tumani imkoniyati cheklangan bolalar uchun 125-sonli ixtisoslashtirilgan yordamchi maktab-internati buyurtmachiligida davlat xaridlari elektron axborot portaliga 2023-yil 5-sentabr kuni (296754-sonli lot bilan) joylashtirilgan boshlang‘ich qiymati 200,5 mln so‘mlik xomashyolarni sotib olish;

– “Qarshi Xalqaro Aeroporti” MCHJ buyurtmachiligida 2023-yil 12-sentabr kuni (23110012271294-sonli lot bo‘yicha) 434 mln so‘mga issiqlik tizimini modernizatsiya qilish xizmatini amalga oshirish yuzasidan o‘tkazilgan davlat xaridlarini amalga oshirishda qonunchilikka zid holatlar aniqlandi.

Xususan, O‘zbekiston Respublikasi “Davlat xaridlari to‘g‘risida”gi Qonunning 10-moddasi (raqobat va xolislik prinsipi), 14-moddasi (manfaatlar to‘qnashuvi), 20-moddasi (xarid komissiyasining huquq va majburiyatlari), 42-moddasi (Ishtirokchini xarid qilish tartib-taomillarida ishtirok etishdan chetlatish shartlari) va 46-moddasi (davlat xaridlari jarayonidagi cheklovlar) hamda O‘zbekiston Respublikasi Vazirlar Mahkamasining “Davlat xaridlarini amalga oshirish bilan bog‘liq tartib-taomillarni tashkil etish va o‘tkazish tartibi to‘g‘risida”gi Qarori bilan tasdiqlangan Nizomning bir qator talablari buzilishiga yo‘l qo‘yilgan.  

Shu kabi “Yashil Energiya” MCHJ buyurtmachiligida elektron axborot portalida 2023-yil 1-avgust kuni (23120012285652-sonli lot bilan) jami qiymati 2,2 mlrd so‘mlik deklarant xizmatlaridan foydalanish yuzasidan o‘tkazilgan davlat xaridi o‘rganilganda O‘zbekiston Respublikasi “Davlat xaridlari to‘g‘risida”gi Qonunning 32-moddasi (baholash mezonlariga va tartib-taomillariga taalluqli qoidalar) hamda O‘zbekiston Respublikasi Vazirlar Mahkamasining “Davlat xaridlarini amalga oshirish bilan bog‘liq tartib-taomillarni tashkil etish va o‘tkazish tartibi to‘g‘risida”gi Qarori bilan tasdiqlangan Nizom talablariga amal qilinmaganligi maʼlum bo‘ldi.

Yuqoridagi holatlar yuzasidan Agentlik tomonidan buyurtmachilarga taqdimnoma kiritilib, davlat xaridlari bo‘yicha xarid komissiyasining bayonnomalari bekor qilindi.

Korrupsiyaga qarshi kurashish agentligi

Axborot xizmati