28-сентябрь куни Коррупцияга қарши курашиш агентлиги директори ўринбосари У.Тухташева ҳамда Хелсинки университети ҳузуридаги Қонун устуворлиги маркази директори Туия Бракс ўртасида учрашув бўлиб ўтди.

Учрашув давомида Ўзбекистонда коррупциянинг олдини олиш ва унга қарши курашиш соҳасидаги ислоҳотлар, эришилган натижалар ҳамда долзарб вазифалар ҳақида сўз юритилди. Шунингдек, икки мамлакат масъул идоралари ўртасида мазкур соҳада яқин ҳамкорликни йўлга қўйиш, шу жумладан, қўшма лойиҳаларни амалга ошириш имкониятлари юзасидан музокаралар олиб борилди.

Туия Бракс таъкидлашича, коррупцияга қарши курашишда демократия, очиқ жамият ва фаол ОАВ вакиллари муҳим аҳамият касб этади ва бу жиҳатдан Ўзбекистонда давлат органлари ва фуқаролик жамияти институтларининг биргаликдаги фаолияти, кучли жамоатчилик назоратини олиб бориш, жумладан, ОАВ билан ҳамкорлик йўналишларида амалга оширилаётган чора-тадбирлар эътиборга сазовор.

Музокаралар мобайнида Финляндия давлат идораларининг коррупцияга қарши фаолиятини мувофиқлаштириш бўйича тажрибасини ўрганиш, шу жумладан, “Коррупцияга қарши кураш миллий ҳамкорлик тармоғи” (Anticorruption Network) ижобий тажрибасини юртимизда жорий этиш, Коррупцияга қарши курашиш Миллий кенгаши билан яқин алоқаларни ўрнатиш муҳимлиги қайд этилди.

Шунингдек, Финляндиянинг “Қонун устуворлиги” лойиҳаси доирасида Ўзбекистонда коррупциянинг олдини олиш ва унга қарши курашиш бўйича янги қўшма лойиҳаларни ишлаб чиқиш масаласи кўриб чиқилди ҳамда бу борада масъул идоралар билан тегишли чора-тадбирларни белгилаб олишга келишилди.

Якунда мазкур вазифаларни самарали амалга ошириш ҳамда ҳамкорлик алоқаларини кенгайтириш мақсадида Коррупцияга қарши курашиш агентлиги ҳамда Марказ ўртасида Меморандум имзолашга келишиб олинди.

Коррупцияга қарши курашиш агентлиги

Ахборот хизмати