28-sentabr kuni Korrupsiyaga qarshi kurashish agentligi direktori o‘rinbosari U.Tuxtasheva hamda Xelsinki universiteti huzuridagi Qonun ustuvorligi markazi direktori Tuiya Braks o‘rtasida uchrashuv bo‘lib o‘tdi.

Uchrashuv davomida O‘zbekistonda korrupsiyaning oldini olish va unga qarshi kurashish sohasidagi islohotlar, erishilgan natijalar hamda dolzarb vazifalar haqida so‘z yuritildi. Shuningdek, ikki mamlakat masʼul idoralari o‘rtasida mazkur sohada yaqin hamkorlikni yo‘lga qo‘yish, shu jumladan, qo‘shma loyihalarni amalga oshirish imkoniyatlari yuzasidan muzokaralar olib borildi.

Tuiya Braks taʼkidlashicha, korrupsiyaga qarshi kurashishda demokratiya, ochiq jamiyat va faol OAV vakillari muhim ahamiyat kasb etadi va bu jihatdan O‘zbekistonda davlat organlari va fuqarolik jamiyati institutlarining birgalikdagi faoliyati, kuchli jamoatchilik nazoratini olib borish, jumladan, OAV bilan hamkorlik yo‘nalishlarida amalga oshirilayotgan chora-tadbirlar eʼtiborga sazovor.

Muzokaralar mobaynida Finlyandiya davlat idoralarining korrupsiyaga qarshi faoliyatini muvofiqlashtirish bo‘yicha tajribasini o‘rganish, shu jumladan, “Korrupsiyaga qarshi kurash milliy hamkorlik tarmog‘i” (Anticorruption Network) ijobiy tajribasini yurtimizda joriy etish, Korrupsiyaga qarshi kurashish Milliy kengashi bilan yaqin aloqalarni o‘rnatish muhimligi qayd etildi.

Shuningdek, Finlyandiyaning “Qonun ustuvorligi” loyihasi doirasida O‘zbekistonda korrupsiyaning oldini olish va unga qarshi kurashish bo‘yicha yangi qo‘shma loyihalarni ishlab chiqish masalasi ko‘rib chiqildi hamda bu borada masʼul idoralar bilan tegishli chora-tadbirlarni belgilab olishga kelishildi.

Yakunda mazkur vazifalarni samarali amalga oshirish hamda hamkorlik aloqalarini kengaytirish maqsadida Korrupsiyaga qarshi kurashish agentligi hamda Markaz o‘rtasida Memorandum imzolashga kelishib olindi.

Korrupsiyaga qarshi kurashish agentligi

Axborot xizmati