Жорий йилнинг 29 сентябрь куни Коррупцияга қарши курашиш агентлиги директори ўринбосари Умида Тухташева ҳамда БМТ ТДнинг Ўзбекистондаги раҳбари ўринбосари Анас Карман ўртасида учрашув бўлиб ўтди.

Учрашувда ўтган давр мобайнидаги ўзаро ҳамкорлик натижалари, икки томон ўртасидаги мустаҳкам алоқаларни янада ривожлантириш ва ҳамкорликдаги лойиҳалар кўламини кенгайтириш масалалари юзасидан фикр алмашилди.

Мулоқот аввалида У.Тухташева А.Карманни Ўзбекистонда фаолият бошлагани билан табриклаб, унинг салоҳият ва тажрибаси коррупцияга қарши курашиш тизимини ривожлантиришга қаратилган ўзаро ҳамкорлик самарадорлигини янада ошириш учун хизмат қилишига умид билдирди.

Таъкидланганидек, ўтган давр мобайнида БМТ ТД билан ҳамкорликда коррупцияга қарши курашиш сиёсатига оид ҳужжатлар, соҳада электрон дастурлар ишлаб чиқилди, давлат органлари ва ташкилотларида коррупцияга қарши курашиш ички назорат тузилмалари жорий этилишида биргаликда ишлар амалга оширилди.

БМТ ТД техник кўмагида коррупцияга қарши курашишда хотин-қизлар ва ёшларнинг ролини кучайтириш, фаоллигини оширишга қаратилган тадбирлар амалга оширилди.

Ўтган ойда Агентлик делегацияси БМТ ТД билан биргаликда Кореянинг соҳадаги тажрибаси билан яқиндан танишди ва бунинг самараси ўлароқ бугунги кунда фуқароларнинг коррупция фактлари тўғрисида тезкор хабардор қилиш имконини берувчи платформани мазкур мамлакат тажрибаси асосида такомиллаштириш ишлари олиб борилмоқда.

У.Тухташева икки томон ўртасида ана шундай мустаҳкам алоқаларни эндиликда янги босқичга олиб чиқиш муҳим эканлигини таъкидлаб, ўзаро манфаатли таклифлар ва фикр-мулоҳазаларни илгари сурди.

Ўз навбатида, А.Карман ҳам келгусидаги фаолиятда коррупцияга қарши курашиш жараёнларига фуқаролик жамияти институтларини жалб этиш, бу борада айниқса, нодавлат нотижорат ташкилотларининг имкониятларидан унумли фойдаланиш, фуқароларнинг ҳуқуқий билимини ошириш, ушбу иллатга қарши муросасизликни шакллантиришга қаратилган чораларни фаол давом эттириш зарурлигига алоҳида урғу бериб ўтди.

Учрашув якунларига кўра, биргаликда амалга ошириладиган янги лойиҳа ва режалар билан икки томонлама ҳамкорликни янада ривожлантиришга келишиб олинди.

Коррупцияга ыарши курашиш агентлиги

Ахборот хизмати