Joriy yilning 29-sentabr kuni Korrupsiyaga qarshi kurashish agentligi direktori o‘rinbosari Umida Tuxtasheva hamda BMT TDning O‘zbekistondagi rahbari o‘rinbosari Anas Karman o‘rtasida uchrashuv bo‘lib o‘tdi.

Uchrashuvda o‘tgan davr mobaynidagi o‘zaro hamkorlik natijalari, ikki tomon o‘rtasidagi mustahkam aloqalarni yana-da rivojlantirish va hamkorlikdagi loyihalar ko‘lamini kengaytirish masalalari yuzasidan fikr almashildi.

Muloqot avvalida U.Tuxtasheva A.Karmanni O‘zbekistonda faoliyat boshlagani bilan tabriklab, uning salohiyat va tajribasi korrupsiyaga qarshi kurashish tizimini rivojlantirishga qaratilgan o‘zaro hamkorlik samaradorligini yanada oshirish uchun xizmat qilishiga umid bildirdi.

Taʼkidlanganidek, o‘tgan davr mobaynida BMT TD bilan hamkorlikda korrupsiyaga qarshi kurashish siyosatiga oid hujjatlar, sohada elektron dasturlar ishlab chiqildi, davlat organlari va tashkilotlarida korrupsiyaga qarshi kurashish ichki nazorat tuzilmalari joriy etilishida birgalikda ishlar amalga oshirildi.

BMT TD texnik ko‘magida korrupsiyaga qarshi kurashishda xotin-qizlar va yoshlarning rolini kuchaytirish, faolligini oshirishga qaratilgan tadbirlar amalga oshirildi.

O‘tgan oyda Agentlik delegatsiyasi BMT TD bilan birgalikda Koreyaning sohadagi tajribasi bilan yaqindan tanishdi va buning samarasi o‘laroq bugungi kunda fuqarolarning korrupsiya faktlari to‘g‘risida tezkor xabardor qilish imkonini beruvchi platformani mazkur mamlakat tajribasi asosida takomillashtirish ishlari olib borilmoqda.

U.Tuxtasheva ikki tomon o‘rtasida ana shunday mustahkam aloqalarni endilikda yangi bosqichga olib chiqish muhim ekanligini taʼkidlab, o‘zaro manfaatli takliflar va fikr-mulohazalarni ilgari surdi.

O‘z navbatida, A.Karman ham kelgusidagi faoliyatda korrupsiyaga qarshi kurashish jarayonlariga fuqarolik jamiyati institutlarini jalb etish, bu borada ayniqsa, nodavlat notijorat tashkilotlarining imkoniyatlaridan unumli foydalanish, fuqarolarning huquqiy bilimini oshirish, ushbu illatga qarshi murosasizlikni shakllantirishga qaratilgan choralarni faol davom ettirish zarurligiga alohida urg‘u berib o‘tdi.

Uchrashuv yakunlariga ko‘ra, birgalikda amalga oshiriladigan yangi loyiha va rejalar bilan ikki tomonlama hamkorlikni yana-da rivojlantirishga kelishib olindi.

Korrupsiyaga iarshi kurashish agentligi

Axborot xizmati