Коррупцияга қарши курашиш агентлиги директори А.Бурханов бошчилигидаги Ишчи гуруҳи томонидан коррупциянинг олдини олиш бўйича амалга оширилаётган ишлар ҳолати юзасидан ҳудудларда ўтказиб келинаётган ўрганишлар 28-29 сентябрь кунлари Бухоро вилоятида  давом эттирилди.

Бугун бўлиб ўтган Бухоро вилояти коррупцияга қарши курашиш ҳудудий кенгашининг навбатдаги йиғилишида мазкур ўрганиш якунлари, ҳудудий кенгашнинг 2023 йилдаги фаолияти самарадорлиги, вилоятда коррупцияга қарши курашиш борасида амалга оширилаётган ишлар ҳолати атрофлича муҳокама қилинди.

Унда ҳудудий кенгаш  ва Агентлик Ишчи гуруҳи аъзолари, ҳудудий бошқарма раҳбарлари ҳамда оммавий ахборот воситалари вакиллари иштирок этди.

Таъкидланганидек, бу коррупцияга қарши курашиш бўйича амалга оширилаётган ишларни баҳолашга қаратилган  турли рейтингларда Бухоро барқарор ижобий натижаларни қайд этиб келмоқда. Бироқ, коррупцион жиноятларнинг олдини олиш, давлат харидларини амалга ошириш, давлат органлари ва ташкилотлари очиқлигини таъминлаш каби муҳим йўналишларда сақланиб қолаётган муаммолар, бартараф этилиши лозим бўлган камчилик ва сусткашликлар ҳам мавжуд.

Йиғилишда А.Бурханов давлат бюджети маблағларининг мақсадсиз сарфланиш тенденцияси ҳам ҳамон сақланиб қолаётганлигини қайд этди.  Жумладан, 2023 йил 8 ойида Агентлик томонидан ўтказилган масофавий мониторинг давомида вилоятдаги давлат буюртмачилари томонидан давлат харидлари тўғрисидаги қонунчилик талабларини бузиш ҳолатлари юзасидан 10 та тақдимнома ва қонуний чора кўриш бўйича ҳуқуқни муҳофаза қилувчи органларга 11 та сўровнома юборилган. Ушбу таъсир чоралари натижасида 5,4 млрд сўмлик харидларда йўл қўйилган қонунбузилиши бартараф қилинган.

Муҳокамалар мобайнида вилоят ва туман-шаҳар ҳокимликлари айрим мансабдор шахсларининг тадбиркорлик фаолияти билан шуғулланиб келаётганлиги, очиқликни таъминлашда сусткашлик ва масъулиятсизликларга йўл қўйилаётгани ҳам кескин танқид қилиниб, бу борада қонунчилик ҳужжатлари талабларига риоя этиш, ўз вазифасини лозим даражада бажармаган масъулларнинг жавобгарлиги масаласини кўриб чиқиш лозимлиги қайд этилди.

Йиғилишда  юқоридаги масалалар юзасидан вилоят прокурори, ҳудудий кенгаш котиби ва бошқа масъулларнинг ахбороти тингланди.

Сўнгги пайтларда Коррупцияга қарши курашиш ҳудудий кенгаши фаолиятида сифат жиҳатдан ўсишлар кузатилди. Жумладан, вилоят 57,3 балл билан 2023 йил биринчи ярим йиллик якунларига кўра ҳудудий кенгашлар орасида энг юқори натижа кўрсатди. Шу билан бирга ННТларни қўллаб-қувватлаш ва улар билан ҳамкорликда ишлаш борасида ҳам намунали фаолият кўрсатмоқда.

Шундай бўлса-да, қайд этилган салбий ҳолатлар Ҳудудий кенгаш фаолиятини янада кучайтиришни, янги ташаббус ва ғояларни фаол амалга оширишни талаб этмоқда. Шу нуқтаи назардан вилоятда коррупцияга қарши курашиш ишларини ҳар томонлама самарали ташкил этиш учун бир қатор таклифлар илгари сурилди.

Жумладан, Бухоро давлат университети ташаббуси билан коррупцияга қарши курашиш ички назорат хизмати ходимлари учун ишлаб чиқилган махсус ўқув курсларида вилоятдаги барча ташкилотларда коррупцияга қарши курашишга масъул  ходимларнинг  ўқишини мунтазам равишда ташкил этиб бориш ва бу ижобий тажрибани вилоят мисолида бошқа ҳудудларда ҳам амалга ошириш таклифи билдирилди.

Шунингдек, ҳудудий кенгаш раиси томонидан ҳудудда коррупцияга қарши курашиш ва олдини олиш борасидаги жараёнларни яхшилаш, бу борада Агентлик, Ҳудудий кенгаш, фуқаролик жамияти институтлари ҳамда депутатлик корпуси вакиллари билан биргаликда мониторинг тадбирлари ва эшитувларини ташкил этиш, амалга оширилаётган ишлар натижаларини Ҳудудий кенгаш йиғилишида муҳокама қилиб бориш юзасидан ҳам аниқ вазифалар белгилаб олинди. 

Коррупцияга қарши курашиш агентлиги

Ахборот хизмати