Korrupsiyaga qarshi kurashish agentligi direktori A.Burxanov boshchiligidagi Ishchi guruhi tomonidan korrupsiyaning oldini olish bo‘yicha amalga oshirilayotgan ishlar holati yuzasidan hududlarda o‘tkazib kelinayotgan o‘rganishlar 28-29 sentabr kunlari Buxoro viloyatida  davom ettirildi.

Bugun bo‘lib o‘tgan Buxoro viloyati korrupsiyaga qarshi kurashish hududiy kengashining navbatdagi yig‘ilishida mazkur o‘rganish yakunlari, hududiy kengashning 2023-yildagi faoliyati samaradorligi, viloyatda korrupsiyaga qarshi kurashish borasida amalga oshirilayotgan ishlar holati atroflicha muhokama qilindi.

Unda hududiy kengash va Agentlik Ishchi guruhi aʼzolari, hududiy boshqarma rahbarlari hamda ommaviy axborot vositalari vakillari ishtirok etdi.

Taʼkidlanganidek, bu korrupsiyaga qarshi kurashish bo‘yicha amalga oshirilayotgan ishlarni baholashga qaratilgan  turli reytinglarda Buxoro barqaror ijobiy natijalarni qayd etib kelmoqda. Biroq, korrupsion jinoyatlarning oldini olish, davlat xaridlarini amalga oshirish, davlat organlari va tashkilotlari ochiqligini taʼminlash kabi muhim yo‘nalishlarda saqlanib qolayotgan muammolar, bartaraf etilishi lozim bo‘lgan kamchilik va sustkashliklar ham mavjud.

Yig‘ilishda A.Burxanov davlat byudjeti mablag‘larining maqsadsiz sarflanish tendensiyasi ham hamon saqlanib qolayotganligini qayd etdi.  Jumladan, 2023-yil 8 oyida Agentlik tomonidan o‘tkazilgan masofaviy monitoring davomida viloyatdagi davlat buyurtmachilari tomonidan davlat xaridlari to‘g‘risidagi qonunchilik talablarini buzish holatlari yuzasidan 10 ta taqdimnoma va qonuniy chora ko‘rish bo‘yicha huquqni muhofaza qiluvchi organlarga 11 ta so‘rovnoma yuborilgan. Ushbu taʼsir choralari natijasida 5,4 mlrd so‘mlik xaridlarda yo‘l qo‘yilgan qonunbuzilishi bartaraf qilingan.

Muhokamalar mobaynida viloyat va tuman-shahar hokimliklari ayrim mansabdor shaxslarining tadbirkorlik faoliyati bilan shug‘ullanib kelayotganligi, ochiqlikni taʼminlashda sustkashlik va masʼuliyatsizliklarga yo‘l qo‘yilayotgani ham keskin tanqid qilinib, bu borada qonunchilik hujjatlari talablariga rioya etish, o‘z vazifasini lozim darajada bajarmagan masʼullarning javobgarligi masalasini ko‘rib chiqish lozimligi qayd etildi.

Yig‘ilishda  yuqoridagi masalalar yuzasidan viloyat prokurori, hududiy kengash kotibi va boshqa masʼullarning axboroti tinglandi.

So‘nggi paytlarda Korrupsiyaga qarshi kurashish hududiy kengashi faoliyatida sifat jihatdan o‘sishlar kuzatildi. Jumladan, viloyat 57,3 ball bilan 2023-yil birinchi yarim yillik yakunlariga ko‘ra hududiy kengashlar orasida eng yuqori natija ko‘rsatdi. Shu bilan birga NNTlarni qo‘llab-quvvatlash va ular bilan hamkorlikda ishlash borasida ham namunali faoliyat ko‘rsatmoqda.

Shunday bo‘lsa-da, qayd etilgan salbiy holatlar Hududiy kengash faoliyatini yana-da kuchaytirishni, yangi tashabbus va g‘oyalarni faol amalga oshirishni talab etmoqda. Shu nuqtai nazardan  viloyatda korrupsiyaga qarshi kurashish ishlarini har tomonlama samarali tashkil etish uchun bir qator takliflar ilgari surildi.

Jumladan, Buxoro davlat universiteti tashabbusi bilan korrupsiyaga qarshi kurashish ichki nazorat xizmati xodimlari uchun ishlab chiqilgan maxsus o‘quv kurslarida viloyatdagi barcha tashkilotlarda korrupsiyaga qarshi kurashishga masʼul  xodimlarning  o‘qishini muntazam ravishda tashkil etib borish va bu ijobiy tajribani viloyat misolida boshqa hududlarda ham amalga oshirish taklifi bildirildi.

Shuningdek, hududiy kengash raisi tomonidan hududda korrupsiyaga qarshi kurashish va oldini olish borasidagi jarayonlarni yaxshilash, bu borada Agentlik, Hududiy kengash, fuqarolik jamiyati institutlari hamda deputatlik korpusi vakillari bilan birgalikda monitoring tadbirlari va eshituvlarini tashkil etish, amalga oshirilayotgan ishlar natijalarini Hududiy kengash yig‘ilishida muhokama qilib borish yuzasidan ham aniq vazifalar belgilab olindi. 

Korrupsiyaga qarshi kurashish agentligi

Axborot xizmati