Давлат раҳбарининг шу йил 24 майдаги "Ёқилғи-энергетика соҳасида бозор механизмларини жорий этишнинг қўшимча чора-тадбирлари тўғрисида"ги Фармонида  Коррупцияга қарши курашиш агентлигига юклатилган вазифалардан келиб чиқиб, Агентлик Ишчи гуруҳи вакиллари “Ҳудудгаз Бухоро” газ таъминоти филиалида бўлди.

Бу ерда Ишчи гуруҳи томонидан автомобилларга газ тўлдириш компрессор шохобчаларида ўрнатилган газ ҳисоблаш ускуналарининг табиий газ назорати ва ҳисобининг автоматлаштирилган тизимга тўлиқ уланганлиги ҳолати ўрганилди.

Мутахассислар томонидан тизимда яратилаётган шаффофлик ва барча амалий жараёнларнинг онлайн режимга ўтганлиги тўғрисида батафсил маълумотлар берилди.

Маълум қилинишича, филиалнинг “Вазиятлар маркази”да  бу борадаги иш жараёнлари онлайн тизим орқали амалга ошириб келинмоқда. 

Аҳолига газ баллонларини етказиб беришда тўловлар ҳам онлайн қабул қилиниши йўлга қўйилган, табиий газ назорати ва ҳисоби автоматлаштирилган тизимга тўлиқ уланган.

Шунингдек, уй ичи газ жиҳозларига кўрсатилаётган хизматга онлайн дастур орқали ҳисоб-китоб қилинади. 

Ишчи гуруҳ томонидан АГТКШлар томонидан табиий газ тармоқларига ноқонуний уланиш, ёқилғи-энергия ресурсларини талон-торож қилиш ва ноқонуний истеъмол қилишнинг бошқа ҳолатларини, шунингдек, уларни содир этишга имкон берувчи сабаб ва шарт-шароитларни аниқлаш, бартараф этиш ва олдини олиш бўйича назорат тадбирларини кучайтириш бўйича қатор тавсиялар берилди.

Ўрганиш мобайнида Ишчи гуруҳи газ таъминотининг ҳар куни 24 соат давомида 1104 рақами остида фаолият олиб бораётган  “Call-markazi”да ҳам бўлиб, операторлар иш жараёни билан танишди.

Коррупцияга қарши курашиш агентлиги

Ахборот хизмати