Davlat rahbarining shu yil 24-maydagi "Yoqilg‘i-energetika sohasida bozor mexanizmlarini joriy etishning qo‘shimcha chora-tadbirlari to‘g‘risida"gi Farmonida Korrupsiyaga qarshi kurashish agentligiga yuklatilgan vazifalardan kelib chiqib, Agentlik Ishchi guruhi vakillari “Hududgaz Buxoro” gaz taʼminoti filialida bo‘ldi.

Bu yerda Ishchi guruhi tomonidan avtomobillarga gaz to‘ldirish kompressor shoxobchalarida o‘rnatilgan gaz hisoblash uskunalarining tabiiy gaz nazorati va hisobining avtomatlashtirilgan tizimga to‘liq ulanganligi holati o‘rganildi.

Mutaxassislar tomonidan tizimda yaratilayotgan shaffoflik va barcha amaliy jarayonlarning onlayn rejimga o‘tganligi to‘g‘risida batafsil maʼlumotlar berildi.

Maʼlum qilinishicha, filialning “Vaziyatlar markazi”da  bu boradagi ish jarayonlari onlayn tizim orqali amalga oshirib kelinmoqda. 

Aholiga gaz ballonlarini yetkazib berishda to‘lovlar ham onlayn qabul qilinishi yo‘lga qo‘yilgan, tabiiy gaz nazorati va hisobi avtomatlashtirilgan tizimga to‘liq ulangan.

Shuningdek, uy ichi gaz jihozlariga ko‘rsatilayotgan xizmatga onlayn dastur orqali hisob-kitob qilinadi. 

Ishchi guruh tomonidan AGTKSHlar tomonidan tabiiy gaz tarmoqlariga noqonuniy ulanish, yoqilg‘i-energiya resurslarini talon-toroj qilish va noqonuniy isteʼmol qilishning boshqa holatlarini, shuningdek, ularni sodir etishga imkon beruvchi sabab va shart-sharoitlarni aniqlash, bartaraf etish va oldini olish bo‘yicha nazorat tadbirlarini kuchaytirish bo‘yicha qator tavsiyalar berildi.

O‘rganish mobaynida Ishchi guruhi gaz taʼminotining har kuni 24 soat davomida 1104 raqami ostida faoliyat olib borayotgan  “Call-markazi”da ham bo‘lib, operatorlar ish jarayoni bilan tanishdi.

Korrupsiyaga qarshi kurashish agentligi

Axborot xizmati