Ўзбекистон Республикаси Президенти Шавкат Мирзиёевнинг 1-2 октябрь кунлари Қатар давлатига ташрифи мобайнида мамлакат Амири шайх Тамим бин Ҳамад Ол Соний билан олий даражадаги икки томонлама музокаралар ўтказилиб, ҳамкорликнинг турли соҳаларини қамраб олувчи бир қатор ҳужжатлар имзоланди.

Хусусан, Ўзбекистон Республикаси Коррупцияга қарши курашиш агентлиги ва Қатар давлати Маъмурий назорат ва шаффофлик бошқармаси ўртасида ўзаро англашув меморандуми имзоланди.

Мазкур Меморандумда коррупцияга қарши курашиш, ҳалоллик ва шаффофликни кучайтириш ҳамда бу борада энг юқори халқаро стандартларга эришиш борасида илғор амалиёт ва тажриба алмашишга қаратилган муҳим мақсадлар кўзда тутилган.

Жумладан:

✔️ходимларнинг малакасини ошириш мақсадида қўшма ўқув курслари, семинарлар ёки конференциялар ташкил этиш ва ўтказиш;

✔️илғор амалиёт алмашиш мақсадида икки идора ходимлари учун ташрифлар, стажировкалар ва бошқа хизмат сафарларини ташкил қилиш;

✔️коррупцияга қарши курашиш масалалари бўйича ахборот, норматив ҳужжатлар, ўқув-услубий қўлланмалар, шунингдек, коррупциянинг олдини олиш ва унга қарши курашиш соҳасидаги бошқа касбий ҳужжатлар билан алмашиш;

✔️коррупцияга қарши курашишга жалб этилган бошқа давлат органлари билан профессионал алоқаларни ўрнатиш ва ўзаро ҳамкорлик қилишга кўмаклашиш.


Коррупцияга қарши курашиш агентлиги
Ахборот хизмати