O‘zbekiston Respublikasi Prezidenti Shavkat Mirziyoyevning 1-2-oktabr kunlari Qatar davlatiga tashrifi mobaynida mamlakat Amiri shayx Tamim bin Hamad Ol Soniy bilan oliy darajadagi ikki tomonlama muzokaralar o‘tkazilib, hamkorlikning turli sohalarini qamrab oluvchi bir qator hujjatlar imzolandi.

Xususan, O‘zbekiston Respublikasi Korrupsiyaga qarshi kurashish agentligi va Qatar davlati Maʼmuriy nazorat va shaffoflik boshqarmasi o‘rtasida o‘zaro anglashuv memorandumi imzolandi.

Mazkur Memorandumda korrupsiyaga qarshi kurashish, halollik va shaffoflikni kuchaytirish hamda bu borada eng yuqori xalqaro standartlarga erishish borasida ilg‘or amaliyot va tajriba almashishga qaratilgan muhim maqsadlar ko‘zda tutilgan.

Jumladan:

✔️xodimlarning malakasini oshirish maqsadida qo‘shma o‘quv kurslari, seminarlar yoki konferensiyalar tashkil etish va o‘tkazish;

✔️ilg‘or amaliyot almashish maqsadida ikki idora xodimlari uchun tashriflar, stajirovkalar va boshqa xizmat safarlarini tashkil qilish;

✔️korrupsiyaga qarshi kurashish masalalari bo‘yicha axborot, normativ hujjatlar, o‘quv-uslubiy qo‘llanmalar, shuningdek, korrupsiyaning oldini olish va unga qarshi kurashish sohasidagi boshqa kasbiy hujjatlar bilan almashish;

✔️korrupsiyaga qarshi kurashishga jalb etilgan boshqa davlat organlari bilan professional aloqalarni o‘rnatish va o‘zaro hamkorlik qilishga ko‘maklashish.

Korrupsiyaga qarshi kurashish agentligi
Axborot xizmati