Айни пайтда Коррупцияга қарши курашиш агентлиги директори А.Бурханов бошчилигидаги Ишчи гуруҳ Сурхондарё вилоятида коррупцияга қарши курашиш борасида амалга оширилаётган ишлар билан танишиш ҳамда бу борадаги чора-тадбирларни белгилаб олишга кўмаклашиш юзасидан ўрганишлар ўтказмоқда.

Ишчи гуруҳ дастлаб Термиз давлат университетида коррупциянинг олдини олиш ва унга қарши курашиш борасида олиб борилаётган чора-тадбирлар, хусусан, "Коррупциясиз соҳа" лойиҳасининг ижроси билан танишди.

Университетда барча ўқув жараёнлари  HEMIS ахборот тизими орқали тўлиқ рақамлаштирилган ҳолда амалга оширилмоқда.   Ўқув аудиториялари (жами 402 та аудитория) IP камералар, дарс жараёнлари бир нуқтадан бошқариш симуляция маркази орқали кузатиб борилмоқда (саmera.tersu.uz).

Дарс жадваллари ва имтиҳонлар рўйхатини эълон қилиб бориш учун махсус info.tersu.uz тизими ва телеграм боти яратилган.

Коррупциянинг олдини олиш, очиқлик вашаффофликни таъминлаш мақсадида университетга қабул жараёнлари, ижодий имтиҳонлар, давлат аттестацияси имтиҳонлари интернет тармоғи орқали эфирга узатилиши йўлга қўйилган (kamera.tersu.uz).

Янги ўқув йили олдидан талабалар турар жойларига масофадан жойлашиш учун мурожаат қилиш имконини берувчи махсус платформа яратилди.Шунингдек, Термиз шаҳри бўйича талабаларни ижара хонадонларига жойлаштириш ва уларни мониторингини олиб бориш учун махсус тизим яратилган.  (ttj.tersu.uz, admintjj.tersu.uz)

Ўрганиш мобайнида Ишчи гуруҳ Университет ходимлари ҳамда талабалар ўртасида коррупциянинг олдини олиш ва унга нисбатан муросасиз муносабатни шакллантиришга қаратилган чора-тадбирлар сифати ва салмоғини янада ошириш, жумладан, коррупция ва унинг оқибатларига қарши курашишни кучайтиришга қаратилган тарғибот материаллари тайёрлаш юзасидан тавсиялар берилди.

Вилоят перинатал марказида олиб борилган ўрганишларда "Коррупциясиз соҳа" лойиҳаси доирасида қатор ишлар амалга оширилганлигига гувоҳ бўлинди.

Масъуллар қайд этишича, Марказда Коррупцияга қарши курашиш бўйича кенгаш аъзолари ва жамоат кенгашлари тузилган. Давлат тиббиёт муассасаларида бюджет маблағлари ҳисобидан имтиёзли тоифага кирувчи шахсларга квота асосида ордер беришни тўлиқ электрон шаклда амалга ошириш механизми жорий этилган.

Ўрганиш мобайнида маълумот берилишича, 10 дан ортиқ хизмат турлари тўла электрон шаклга ўтказилиб, даволаш-профилактика муассасаларининг тасдиқланган пулли хизматлари миқдори бошқарманинг расмий веб-сайтига жойлаштирилиши таъминланган.

Вилоят хокимлиги ҳамда вилоят хуқуқни мухофаза қилувчи ташкилотлар билан ҳамкорликда туғуруқ муассасаларида таъмагирлик ҳолатларига барҳам бериш мақсадида туғуруқ бўлимлари, қабулхона, коридорлар, шифокорлар хонаси, муолажа хоналари ва чақалоқларни уйга кузатув хоналарига қўшимча равишда видео-кузатув мосламалари ўрнатилган.

Ишчи гуруҳ Марказ томонидан беморлар ва аҳоли ўртасида коррупция ҳолатларини аниқлаш борасида  ўтказиб келинаётган аноним сўров ва уларнинг натижалари таҳлилига алоҳида эътибор қаратди.

Бу каби сўровларни мунтазам ташкил этиб бориш орқали аҳолининг фикрини ўрганиб бориш зарурлиги ҳамда сўров якунлари бўйича  коррупциявий жиноятлар содир этилишига имкон яратаётган ҳамда соҳада коррупция хавфларининг юзага келишига сабаб бўлаётган омилларни бартараф этиш бўйича ўз вақтида  чоралар кўриш муҳимлиги юзасидан тавсиялар берилди.

Коррупцияга қарши курашиш агентлиги

Ахборот хизмати