Ayni paytda Korrupsiyaga qarshi kurashish agentligi direktori A.Burxanov boshchiligidagi Ishchi guruh Surxondaryo viloyatida korrupsiyaga qarshi kurashish borasida amalga oshirilayotgan ishlar bilan tanishish hamda bu boradagi chora-tadbirlarni belgilab olishga ko‘maklashish yuzasidan o‘rganishlar o‘tkazmoqda.

Ishchi guruh dastlab Termiz davlat universitetida korrupsiyaning oldini olish va unga qarshi kurashish borasida olib borilayotgan chora-tadbirlar, xususan, "Korrupsiyasiz soha" loyihasining ijrosi bilan tanishdi.

Universitetda barcha o‘quv jarayonlari HEMIS axborot tizimi orqali to‘liq raqamlashtirilgan holda amalga oshirilmoqda.   O‘quv auditoriyalari (jami 402 ta auditoriya) IP kameralar, dars jarayonlari bir nuqtadan boshqarish simulyatsiya markazi orqali kuzatib borilmoqda (саmera.tersu.uz).

Dars jadvallari va imtihonlar ro‘yxatini eʼlon qilib borish uchun maxsus info.tersu.uz tizimi va telegram boti yaratilgan.

Korrupsiyaning oldini olish, ochiqlik vashaffoflikni taʼminlash maqsadida universitetga qabul jarayonlari, ijodiy imtihonlar, davlat attestatsiyasi imtihonlari internet tarmog‘i orqali efirga uzatilishi yo‘lga qo‘yilgan (kamera.tersu.uz).

Yangi o‘quv yili oldidan talabalar turar joylariga masofadan joylashish uchun murojaat qilish imkonini beruvchi maxsus platforma yaratildi.Shuningdek, Termiz shahri bo‘yicha talabalarni ijara xonadonlariga joylashtirish va ularni monitoringini olib borish uchun maxsus tizim yaratilgan.  (ttj.tersu.uz, admintjj.tersu.uz)

O‘rganish mobaynida Ishchi guruh Universitet xodimlari hamda talabalar o‘rtasida korrupsiyaning oldini olish va unga nisbatan murosasiz munosabatni shakllantirishga qaratilgan chora-tadbirlar sifati va salmog‘ini yana-da oshirish, jumladan, korrupsiya va uning oqibatlariga qarshi kurashishni kuchaytirishga qaratilgan targ‘ibot materiallari tayyorlash yuzasidan tavsiyalar berildi.

Viloyat perinatal markazida olib borilgan o‘rganishlarda "Korrupsiyasiz soha" loyihasi doirasida qator ishlar amalga oshirilganligiga guvoh bo‘lindi.

Masʼullar qayd etishicha, Markazda Korrupsiyaga qarshi kurashish bo‘yicha kengash aʼzolari va jamoat kengashlari tuzilgan. Davlat tibbiyot muassasalarida byudjet mablag‘lari hisobidan imtiyozli toifaga kiruvchi shaxslarga kvota asosida order berishni to‘liq elektron shaklda amalga oshirish mexanizmi joriy etilgan.

O‘rganish mobaynida maʼlumot berilishicha, 10 dan ortiq xizmat turlari to‘la elektron shaklga o‘tkazilib, davolash-profilaktika muassasalarining tasdiqlangan pulli xizmatlari miqdori boshqarmaning rasmiy veb-saytiga joylashtirilishi taʼminlangan.

Viloyat xokimligi hamda viloyat xuquqni muxofaza qiluvchi tashkilotlar bilan hamkorlikda tug‘uruq muassasalarida taʼmagirlik holatlariga barham berish maqsadida tug‘uruq bo‘limlari, qabulxona, koridorlar, shifokorlar xonasi, muolaja xonalari va chaqaloqlarni uyga kuzatuv xonalariga qo‘shimcha ravishda video-kuzatuv moslamalari o‘rnatilgan.

Ishchi guruh Markaz tomonidan bemorlar va aholi o‘rtasida korrupsiya holatlarini aniqlash borasida  o‘tkazib kelinayotgan anonim so‘rov va ularning natijalari tahliliga alohida eʼtibor qaratdi.

Bu kabi so‘rovlarni muntazam tashkil etib borish orqali aholining fikrini o‘rganib borish zarurligi hamda so‘rov yakunlari bo‘yicha  korrupsiyaviy jinoyatlar sodir etilishiga imkon yaratayotgan hamda sohada korrupsiya xavflarining yuzaga kelishiga sabab bo‘layotgan omillarni bartaraf etish bo‘yicha o‘z vaqtida  choralar ko‘rish muhimligi yuzasidan tavsiyalar berildi.

Korrupsiyaga qarshi kurashish agentligi

Axborot xizmati