Коррупцияга қарши курашиш бўйича вилоят ҳудудий кенгашининг 5-октябрь куни бўлиб ўтган йиғилишида вилоятда аксилкоррупция сиёсатига оид ислоҳотларнинг амалга татбиқ этиш борасидаги ишлар ҳудудий кенгаш аъзолари, Агентлик Ишчи гуруҳи аъзолари, ҳудудий бошқарма раҳбарлари ҳамда оммавий ахборот воситалари вакиллари иштирокида танқидий муҳокама қилиниб, амалга оширилиши лозим бўлган мақсад ва вазифалар белгилаб олинди.

Йиғилиш аввалида Коррупцияга қарши курашиш агентлиги директори А.Бурханов Ишчи гуруҳ томонидан вилоятда ўтказилган ўрганиш якунлари,  коррупцияга қарши курашиш ишлари самарадорлигига салбий таъсир кўрсатаётган, коррупция хавф-хатарларини келтириб чиқараётган масалаларга тўхталиб ўтди. 

Қайд этилганидек, республика миқёсида бюджет маблағларини мақсадли сарфлаш билан боғлиқ молиявий хато ва камчиликларнинг энг юқори улуши Сурхондарё вилояти ҳиссасига тўғри келади. Бу эса давлат ташкилотлари масъул шахсларининг бюджет маблағларини режалаштириш бўйича фаолияти талаб даражасида эмаслигини кўрсатади.

Коррупцияга қарши курашиш борасидаги ишлар самарали ташкил этилмаганлиги ҳамда мансабдор шахслар томонидан белгиланган вазифаларга масъулият билан ёндашилмаётганлиги турли рейтингларда вилоятнинг кўрсаткичлари қониқарсиз баҳоланаётгани мисолида ҳам ўз исботини топмоқда. 

Жумладан, Очиқлик индексида Сурхондарё вилояти “сариқ” тоифадан жой эгаллаган. Агентлик томонидан вилоятда очиқликни таъминлаш чораларини кўриш ҳамда ижобий тажрибаларни оммалаштириш бўйича тавсиялар ишлаб чиқилди ва амалиётга татбиқ этилиши таъминланди. Натижада жорий йилнинг 2-чораги якунига кўра очиқ маълумотлар сифатида эълон қилиниши лозим бўлган ижтимоий аҳамиятга молик маълумотларнинг эълон қилиниши ўрганилганда ижобий ўзгаришлар кузатилди.

Муҳокамалар жараёнида мазкур масалаларга жиддий эътибор қаратилиб,  бу борада қонунчилик ҳужжатлари талабларига риоя этиш, ўз вазифасини лозим даражада бажармаган масъулларнинг жавобгарлиги масаласини кўриб чиқиш лозимлиги қайд этилди.

Йиғилишда Коррупцияга қарши курашиш ҳудудий кенгаши томонидан ўтган давр мобайнида танловлар ташкил этиш, ННТлар билан ишлаш, тарғибот-ташвиқот ишларини ташкил этиш, сўровлар ўтказиш каби йўналишларда етарли ташаббус қилинмагани, ҳам танқидий кўриб чиқилди.

Юқоридаги масалалар юзасидан вилоят прокурори, ҳудудий кенгаш котиби ва бошқа масъулларнинг ахбороти тингланди.

Муҳокамалар якуни бўйича  вилоятда коррупцияга қарши курашиш тизимини тубдан қайта кўриб чиқиш, бу борада айниқса, ҳудудий Кенгаш фаоллигини ошириш, унинг аъзолари масъулиятини кучайтириш юзасидан бир қатор таклифлар илгари сурилди. Жумладан, ҳудуддаги коррупция ҳолатлари юқори бўлган соҳалар ва туман шаҳарлардаги коррупция ҳолатлари ва олдини олиш бўйича кўрилаётган чоралар тизимли равишда Ҳудудий кенгаш йиғилишида муҳокама қилиб бориш лозимлиги билдирилди.

Кенгаш ўз фаолиятида мониторинг ва назорат тадбирларини  ўтказиш, эшитувлар ташкил этиш каби инструментлардан самарали фойдаланиши зарурлиги алоҳида таъкидланди.

Агентлик вакиллари томонидан нодавлат нотижорат ташкилотлари, оммавий ахборот воситалари билан ўзаро ҳамкорликни мустаҳкамлаш орқали коррупцияга қарши курашиш жараёнига аҳолини кенг жалб этиш ишларини янада кучайтириш юзасидан ҳам қатор тавсиялар берилди.

Коррупцияга қарши курашиш агентлиги

Ахборот хизмати