Korrupsiyaga qarshi kurashish bo‘yicha viloyat hududiy kengashining 5-oktabr kuni bo‘lib o‘tgan yig‘ilishida viloyatda aksilkorrupsiya siyosatiga oid islohotlarning amalga tatbiq etish borasidagi ishlar hududiy kengash aʼzolari, Agentlik Ishchi guruhi aʼzolari, hududiy boshqarma rahbarlari hamda ommaviy axborot vositalari vakillari ishtirokida tanqidiy muhokama qilinib, amalga oshirilishi lozim bo‘lgan maqsad va vazifalar belgilab olindi.

Yig‘ilish avvalida Korrupsiyaga qarshi kurashish agentligi direktori A.Burxanov Ishchi guruh tomonidan viloyatda o‘tkazilgan o‘rganish yakunlari,  korrupsiyaga qarshi kurashish ishlari samaradorligiga salbiy taʼsir ko‘rsatayotgan, korrupsiya xavf-xatarlarini keltirib chiqarayotgan masalalarga to‘xtalib o‘tdi. 

Qayd etilganidek, respublika miqyosida byudjet mablag‘larini maqsadli sarflash bilan bog‘liq moliyaviy xato va kamchiliklarning eng yuqori ulushi Surxondaryo viloyati hissasiga to‘g‘ri keladi. Bu esa davlat tashkilotlari masʼul shaxslarining byudjet mablag‘larini rejalashtirish bo‘yicha faoliyati talab darajasida emasligini ko‘rsatadi.

Korrupsiyaga qarshi kurashish borasidagi ishlar samarali tashkil etilmaganligi hamda mansabdor shaxslar tomonidan belgilangan vazifalarga masʼuliyat bilan yondashilmayotganligi turli reytinglarda viloyatning ko‘rsatkichlari qoniqarsiz baholanayotgani misolida ham o‘z isbotini topmoqda. 

Jumladan, Ochiqlik indeksida Surxondaryo viloyati “sariq” toifadan joy egallagan. Agentlik tomonidan viloyatda ochiqlikni taʼminlash choralarini ko‘rish hamda ijobiy tajribalarni ommalashtirish bo‘yicha tavsiyalar ishlab chiqildi va amaliyotga tatbiq etilishi taʼminlandi. Natijada joriy yilning 2-choragi yakuniga ko‘ra ochiq maʼlumotlar sifatida eʼlon qilinishi lozim bo‘lgan ijtimoiy ahamiyatga molik maʼlumotlarning eʼlon qilinishi o‘rganilganda ijobiy o‘zgarishlar kuzatildi.

Muhokamalar jarayonida mazkur masalalarga jiddiy eʼtibor qaratilib,  bu borada qonunchilik hujjatlari talablariga rioya etish, o‘z vazifasini lozim darajada bajarmagan masʼullarning javobgarligi masalasini ko‘rib chiqish lozimligi qayd etildi.

Yig‘ilishda Korrupsiyaga qarshi kurashish hududiy kengashi tomonidan o‘tgan davr mobaynida tanlovlar tashkil etish, NNTlar bilan ishlash, targ‘ibot-tashviqot ishlarini tashkil etish, so‘rovlar o‘tkazish kabi yo‘nalishlarda yetarli tashabbus qilinmagani, ham tanqidiy ko‘rib chiqildi.

Yuqoridagi masalalar yuzasidan viloyat prokurori, hududiy kengash kotibi va boshqa masʼullarning axboroti tinglandi.

Muhokamalar yakuni bo‘yicha  viloyatda korrupsiyaga qarshi kurashish tizimini tubdan qayta ko‘rib chiqish, bu borada ayniqsa, hududiy Kengash faolligini oshirish, uning aʼzolari masʼuliyatini kuchaytirish yuzasidan bir qator takliflar ilgari surildi. Jumladan, hududdagi korrupsiya holatlari yuqori bo‘lgan sohalar va tuman shaharlardagi korrupsiya holatlari va oldini olish bo‘yicha ko‘rilayotgan choralar tizimli ravishda Hududiy kengash yig‘ilishida muhokama qilib borish lozimligi bildirildi.

Kengash o‘z faoliyatida monitoring va nazorat tadbirlarini  o‘tkazish, eshituvlar tashkil etish kabi instrumentlardan samarali foydalanishi zarurligi alohida taʼkidlandi.

Agentlik vakillari tomonidan nodavlat notijorat tashkilotlari, ommaviy axborot vositalari bilan o‘zaro hamkorlikni mustahkamlash orqali korrupsiyaga qarshi kurashish jarayoniga aholini keng jalb etish ishlarini yanada kuchaytirish yuzasidan ham qator tavsiyalar berildi.

Korrupsiyaga qarshi kurashish agentligi

Axborot xizmati