Ўзбекистон Республикаси Президентининг 2021 йил 4 мартдаги “2021 — 2025 йилларда фуқаролик жамиятини ривожлантириш концепциясини тасдиқлаш тўғрисида”ги Фармонида белгиланган вазифалар ижросини таъминлаш, шунингдек, давлат органлари ва муассасалари фаолияти устидан жамоатчилик назоратини кучайтириш мақсадида Коррупцияга қарши курашиш агентлиги ҳузурида Жамоатчилик кенгашининг таркиби кенгайтирилмоқда.

Коррупцияга қарши курашиш агентлиги ҳузурида Жамоатчилик кенгашини ташкил этишда шаффофликни таъминлаш мақсадида Жамоатчилик кенгашига аъзолик танлов асосида амалга оширилади.

Танловга ҳужжатлар икки хил усулда қабул қилинади: 

1.Танловда ўзи фаолият юритаётган ташкилот ёки Коррупцияга қарши курашиш агентлиги ҳузурида Жамоатчилик кенгашини тузиш ва унинг таркибини шакллантириш бўйича Махсус комиссия аъзолари томонидан тавсия қилинган фуқаролар;

2.Мамлакатимизда фаолият юритаётган нодавлат нотижорат ташкилотлари томонидан тавсия қилинган фуқаролар,

Номзодларга талаблар қуйидагилардан иборат:

- коррупцияга қарши курашиш соҳасида алоҳида билим, кўникмаларга эга бўлиши; 

- коррупцияга қарши курашиш йўналишида амалий тажрибага эга бўлиши; 

- олий маълумотга эга бўлиши;

- соҳани ривожлантиришга қаратилган амалий таклифларни бера олиши; 

- судланмаган бўлиши;

- жамиятда обрў-эътиборга эга бўлиши, жамоавийлик асосида ишлаш кўникмасининг мавжудлиги; 

- Агентликда ва бошқа давлат ташкилотида намунали хизмат кўрсатган меҳнат фахрийлари;

- нодавлат нотижорат ташкилотлари, оммавий ахборот воситалари ва фуқаролик жамиятининг бошқа институтлари вакиллари;

- 18 ёшдан юқори Ўзбекистон Республикаси фуқароси бўлиши.

Номзодларни танлашда уларнинг коррупцияга муросасиз муносабатда эканлиги инобатга олинади. Жумладан, номзод аввал коррупция билан боғлиқ ҳуқуқбузарликлар иштирокчиси бўлмаганлигига алоҳида урғу берилади.

Номзодлар томонидан тақдим этиладиган ҳужжатлар:

1. Маълумотнома (объективка) боғланиш рақами кўрсатилган ҳолда.

2. Тавсиянома (ННТ ёки ўзи ишлаётган муассаса томонидан тақдим этилган бўлиши лозим).

3. Коррупцияга қарши курашиш йўналишида қилган амалий ишлари тўғрисида маълумот.

4. Кенгаш аъзоси сифатида амалга оширмоқчи бўлган ишлари тўғрисида маълумот.

Жамоатчилик кенгаши аъзолигига номзодларнинг аризалари ёки номзодларга берилган тавсиялар 2023 йил  21 октябрга қадар, info@anticorruption.uz электрон почтаси орқали қабул қилинади:  

Танлов якунида Коррупцияга қарши курашиш агентлиги ҳузурида Жамоатчилик кенгашини тузиш ва унинг таркибини шакллантириш бўйича Махсус комиссия томонидан танлов шартлари талабларига жавоб берадиган номзод Агентлик ҳузуридаги Жамоатчилик кенгаши аъзолигига тавсия этилади. Бунда Ўзбекистон Республикаси Коррупцияга қарши курашиш агентлиги ҳузуридаги жамоатчилик кенгаши тўғрисидаги низомга асосан, қабул қилинувчи аъзоларнинг энг кўп миқдори 6 тани ташкил этади. 

Мурожаат учун:

Телефон рақами – 71 202-04-02 (423);
 Электрон почта – info@anticorruption.uz.

Коррупцияга қарши курашиш агентлиги

Ахборот хизмати