O‘zbekiston Respublikasi Prezidentining 2021-yil 4-martdagi “2021 — 2025 yillarda fuqarolik jamiyatini rivojlantirish konsepsiyasini tasdiqlash to‘g‘risida”gi Farmonida belgilangan vazifalar ijrosini taʼminlash, shuningdek, davlat organlari va muassasalari faoliyati ustidan jamoatchilik nazoratini kuchaytirish maqsadida Korrupsiyaga qarshi kurashish agentligi huzurida Jamoatchilik kengashining tarkibi kengaytirilmoqda.

Korrupsiyaga qarshi kurashish agentligi huzurida Jamoatchilik kengashini tashkil etishda shaffoflikni taʼminlash maqsadida Jamoatchilik kengashiga aʼzolik tanlov asosida amalga oshiriladi.

Tanlovga hujjatlar ikki xil usulda qabul qilinadi: 

1.Tanlovda o‘zi faoliyat yuritayotgan tashkilot yoki Korrupsiyaga qarshi kurashish agentligi huzurida Jamoatchilik kengashini tuzish va uning tarkibini shakllantirish bo‘yicha Maxsus komissiya aʼzolari tomonidan tavsiya qilingan fuqarolar;

2.Mamlakatimizda faoliyat yuritayotgan nodavlat notijorat tashkilotlari tomonidan tavsiya qilingan fuqarolar,

Nomzodlarga talablar quyidagilardan iborat:

- korrupsiyaga qarshi kurashish sohasida alohida bilim, ko‘nikmalarga ega bo‘lishi; 

- korrupsiyaga qarshi kurashish yo‘nalishida amaliy tajribaga ega bo‘lishi; 

- oliy maʼlumotga ega bo‘lishi;

- sohani rivojlantirishga qaratilgan amaliy takliflarni bera olishi; 

- sudlanmagan bo‘lishi;

- jamiyatda obro‘-eʼtiborga ega bo‘lishi, jamoaviylik asosida ishlash ko‘nikmasining mavjudligi; 

- Agentlikda va boshqa davlat tashkilotida namunali xizmat ko‘rsatgan mehnat faxriylari;

- nodavlat notijorat tashkilotlari, ommaviy axborot vositalari va fuqarolik jamiyatining boshqa institutlari vakillari;

- 18 yoshdan yuqori O‘zbekiston Respublikasi fuqarosi bo‘lishi.

Nomzodlarni tanlashda ularning korrupsiyaga murosasiz munosabatda ekanligi inobatga olinadi. Jumladan, nomzod avval korrupsiya bilan bog‘liq huquqbuzarliklar ishtirokchisi bo‘lmaganligiga alohida urg‘u beriladi.

Nomzodlar tomonidan taqdim etiladigan hujjatlar:

1. Maʼlumotnoma (obyektivka) bog‘lanish raqami ko‘rsatilgan holda.

2. Tavsiyanoma (NNT yoki o‘zi ishlayotgan muassasa tomonidan taqdim etilgan bo‘lishi lozim).

3. Korrupsiyaga qarshi kurashish yo‘nalishida qilgan amaliy ishlari to‘g‘risida maʼlumot.

4. Kengash aʼzosi sifatida amalga oshirmoqchi bo‘lgan ishlari to‘g‘risida maʼlumot.

Jamoatchilik kengashi aʼzoligiga nomzodlarning arizalari yoki nomzodlarga berilgan tavsiyalar 2023-yil  21-oktabrga qadar info@anticorruption.uz elektron pochtasi orqali qabul qilinadi:  

Tanlov yakunida Korrupsiyaga qarshi kurashish agentligi huzurida Jamoatchilik kengashini tuzish va uning tarkibini shakllantirish bo‘yicha Maxsus komissiya tomonidan tanlov shartlari talablariga javob beradigan nomzod Agentlik huzuridagi Jamoatchilik kengashi aʼzoligiga tavsiya etiladi. Bunda O‘zbekiston Respublikasi Korrupsiyaga qarshi kurashish agentligi huzuridagi jamoatchilik kengashi to‘g‘risidagi nizomga asosan, qabul qilinuvchi aʼzolarning eng ko‘p miqdori 6 tani tashkil etadi. 

Murojaat uchun:

Telefon raqami  – 71 202-04-02 (423)
Elektron pochta – info@anticorruption.uz.

Korrupsiyaga qarshi kurashish agentligi

Axborot xizmati