Ўзбекистон Республикаси Коррупцияга қарши курашиш агентлиги делегацияси Хитойнинг Назорат бўйича Миллий Комиссияси таклифига биноан 17-18 октябрь кунлари Пекин шаҳрида ташкил этилган “Бир макон – бир йўл” Форумида иштирок этди ва “Тоза Ипак йўли” мавзусига бағишланган форум сессиясида Агентлик директори А.Бурханов нутқ сўзлади.

Мазкур сессияда “Тоза ипак йўли”ни яратиш ташаббуси қўллаб-қувватланиши ҳамда у ҳозирги ва келажак авлодлар эҳтиёжларини қондира оладиган инновацион ва барқарор лойиҳалар намунасига айланиши мумкинлиги таъкидлаб ўтилди. Бундан ташқари, коррупцияга қарши курашиш соҳасида фаол ҳамкорлик қилиш, иштирокчи давлатлар билан тажриба алмашиш муҳим эканлиги қайд этилди.

Шу билан бир қаторда, форумда иштирок этган 30 дан мамлакатлар ва халқаро ташкилотлар вакиллари томонидан Ўзбекистоннинг ижобий ва аниқ истиқболларга эга муносабатлари, қолаверса Ипак йўли, унинг Шарқ ва Ғарбни боғлашдаги аҳамияти алоҳида таъкидланди.

Шунингдек, форум доирасида БМТ Бош котибининг ўринбосари, БМТнинг Гиёҳвандлик ва жиноятчилик бўйича бошқармаси ижрочи директори Гада Фатхи Вали билан икки томонлама учрашув ташкил этилиб, жорий йилнинг 2-ноябрь куни Тошкент шаҳрида Коррупцияга қарши курашиш бўйича Минтақавий платформанинг ишга туширилиши масалалари муҳокама қилинди.

Сафар доирасида коррупцияга қарши курашувчи хорижий ва халқаро ташкилотлар раҳбарлари билан икки томонлама учрашувлар ўтказилди. Жумладан, Хитой Назорат бўйича Миллий Комиссияси раиси ўринбосари — Фу Куй, БМТнинг гиёҳвандлик ва жиноятчилик бўйича бошқармаси Жанубий-Шарқий Осиё ва Тинч океани бўйича минтақавий вакили — Джереми Дуглас, Африка иттифоқи коррупцияга қарши парламентарийларининг раиси — Шакил Шаббир Ахмед, Малайзия коррупцияга қарши курашиш комиссияси Бош комиссари — Тан Сри Дато Сри Аъзам бин Баки, Қозоғистон коррупцияга қарши курашиш агентлиги раҳбари — Асхат Джумагали ва бошқа хорижий давлатларнинг коррупцияга қарши курашиши идоралари раҳбарлари билан келгусидаги ҳамкорлик истиқболлари муҳокама қилинди.

Коррупцияга қарши курашиш агентлиги

Ахборот хизмати