Агентлик томонидан давлат харидлари соҳасида ўтказиб келинаётган ўрганишлар жараёнида Тошкент вилоятининг Бўстонлиқ тумани имконияти чекланган болалар учун 125-сонли ихтисослаштирилган ёрдамчи мактаб-интернатининг  200,5 млн сўмлик, Фарғона вилояти тарихи ва маданияти Давлат музейининг 245,5 млн сўмлик ҳамда Сурхондарё вилоят Эндокринология диспансерининг 313,9 млн сўмлик давлат харидларида қонунбузилиши ҳолатларига йўл қўйилганлиги аниқланди.

Маълумот ўрнида: Бўстонлиқ тумани имконияти чекланган болалар учун 125-сонли ихтисослаштирилган ёрдамчи мактаб-интернати буюртмачилигидаги давлат хариди  2023 йил 5 сентябрь куни тумандаги 125-сонли мактаб-интернати учун керакли хом ашёларни сотиб олиш, Фарғона вилояти тарихи ва маданияти Давлат музейи буюртмачилигидаги давлат хариди 2023 йил 8 сентябрь куни мебель жиҳозлари харид қилиш ҳамда Сурхондарё вилоят Эндокринология диспансери буюртмачилигидаги давлат хариди 2023 йил 26 сентябрь куни иссиқ овқат ташкил қилиш хизмати юзасидан ўтказилган. 

“Давлат харидлари тўғрисида”ги қонунга кўра, мазкур давлат харидлари рақобат ва холислик принципи, манфаатлар тўқнашуви, харид комиссиясининг ҳуқуқ ва мажбуриятлари, Иштирокчини харид қилиш тартиб-таомилларида иштирок этишдан четлатиш шартлари ва давлат харидлари жараёнидаги чекловларга зид тарзда амалга оширилган. Шунингдек, Ўзбекистон Республикаси Вазирлар Маҳкамасининг “Давлат харидларини амалга ошириш билан боғлиқ тартиб-таомилларни ташкил этиш ва ўтказиш тартиби тўғрисида”ги қарори билан тасдиқланган Низомнинг бир қатор талабларига амал қилинмаган.

Хусусан, ушбу харидларда иштирок этган талабгорларнинг ҳужжатлари Харид комиссияси аъзолари фойдаланган қурилмалар (IP-манзиллари бир хил) орқали электрон платформага юкланганлиги аниқланган.

Мазкур ҳолатлар бўйича (баённома тасдиқланган куннинг ўзида) харид комиссиясининг баённомасини бекор қилиш тўғрисида буюртмачиларга тақдимномалар киритилди ва тўпланган ҳужжатлар қонуний чора кўриш учун Бош прокуратура ҳузуридаги Иқтисодий жиноятларга қарши курашиш департаментига юборилди.

Агентликнинг тақдимномаларига биноан харид комиссияларининг юқорида ўтказилган харидлар юзасидан расмийлаштирилган баённомалари бекор қилинди.

Агентлик томонидан давлат буюртмачилари томонидан амалга оширилаётган харидларда қонунчилик талабларига риоя қилиниши ҳолатларини мониторинг қилиш ишлари давом эттирилмоқда.

Коррупцяига қарши курашиш агентлиги
 Ахборот хизмати