Agentlik tomonidan davlat xaridlari sohasida o‘tkazib kelinayotgan o‘rganishlar jarayonida Toshkent viloyatining Bo‘stonliq tumani imkoniyati cheklangan bolalar uchun 125-sonli ixtisoslashtirilgan yordamchi maktab-internatining 200,5 mln so‘mlik, Farg‘ona viloyati tarixi va madaniyati Davlat muzeyining 245,5 mln so‘mlik hamda Surxondaryo viloyat Endokrinologiya dispanserining 313,9 mln so‘mlik davlat xaridlarida qonunbuzilishi holatlariga yo‘l qo‘yilganligi aniqlandi.

Maʼlumot o‘rnida: Bo‘stonliq tumani imkoniyati cheklangan bolalar uchun 125-sonli ixtisoslashtirilgan yordamchi maktab-internati buyurtmachiligidagi davlat xaridi 2023-yil 5-sentabr kuni tumandagi 125-sonli maktab-internati uchun kerakli xom ashyolarni sotib olish, Farg‘ona viloyati tarixi va madaniyati Davlat muzeyi buyurtmachiligidagi davlat xaridi 2023-yil 8-sentabr kuni mebel jihozlari xarid qilish hamda Surxondaryo viloyat Endokrinologiya dispanseri buyurtmachiligidagi davlat xaridi 2023-yil 26-sentabr kuni issiq ovqat tashkil qilish xizmati yuzasidan o‘tkazilgan.

“Davlat xaridlari to‘g‘risida”gi qonunga ko‘ra, mazkur davlat xaridlari raqobat va xolislik prinsipi, manfaatlar to‘qnashuvi, xarid komissiyasining huquq va majburiyatlari, Ishtirokchini xarid qilish tartib-taomillarida ishtirok etishdan chetlatish shartlari va davlat xaridlari jarayonidagi cheklovlarga zid tarzda amalga oshirilgan. Shuningdek, O‘zbekiston Respublikasi Vazirlar Mahkamasining “Davlat xaridlarini amalga oshirish bilan bog‘liq tartib-taomillarni tashkil etish va o‘tkazish tartibi to‘g‘risida”gi qarori bilan tasdiqlangan Nizomning bir qator talablariga amal qilinmagan.

Xususan, ushbu xaridlarda ishtirok etgan talabgorlarning hujjatlari Xarid komissiyasi aʼzolari foydalangan qurilmalar (IP-manzillari bir xil) orqali elektron platformaga yuklanganligi aniqlangan.

Mazkur holatlar bo‘yicha (bayonnoma tasdiqlangan kunning o‘zida) xarid komissiyasining bayonnomasini bekor qilish to‘g‘risida buyurtmachilarga taqdimnomalar kiritildi va to‘plangan hujjatlar qonuniy chora ko‘rish uchun Bosh prokuratura huzuridagi Iqtisodiy jinoyatlarga qarshi kurashish departamentiga yuborildi.

Agentlikning taqdimnomalariga binoan xarid komissiyalarining yuqorida o‘tkazilgan xaridlar yuzasidan rasmiylashtirilgan bayonnomalari bekor qilindi.

Agentlik tomonidan davlat buyurtmachilari tomonidan amalga oshirilayotgan xaridlarda qonunchilik talablariga rioya qilinishi holatlarini monitoring qilish ishlari davom ettirilmoqda.

Korrupsyaiga qarshi kurashish agentligi

Axborot xizmati