21-октябрь — Ўзбек тили байрами куни муносабати билан Коррупцияга қарши курашиш агентлиги ходимлари учун порофессор Раҳимжон Жуманиёзов иштирокида  “Ўзбек тили — миллий ўзлигимиз ва мустақил давлатчилигимиз тимсоли!” шиори остида маънавий-маърифий тадбир бўлиб ўтди. 

Таъкидланганидек, мамлакатимизда яратилаётган янги тарих, янги тараққиёт даврида барча соҳа ва тармоқлар каби она тилимиз қадри ва нуфузини янада ошириш борасидаги амалий ишлар тобора ривожланиб бормоқда. Бунинг тасдиғини ўзбек тилининг давлат тили сифатидаги мақоми ва обрў-эътиборини тубдан ошириш бўйича қабул қилинган тарихий фармон ва қарорлар мисолида яққол кўриш мумкин.

Бу каби саъй-ҳаракатлар натижасида ўзбек тили нафақат мамлакатимизда, балки жаҳон миқёсида ҳам ўзининг муносиб ўрни ва мавқеига эга бўлиб бормоқда. Айниқса, она тилимиз Бирлашган Миллатлар Ташкилотининг юксак минбарида, улкан сиёсий саммит ва учрашувларда баралла янграб, тинчлик, дўстлик ва ҳамкорлик воситасига айланиб бораётгани қувонарлидир.

Тадбирда ўзбек тилининг бой тарихи, унинг жозибаси ва таъсир кучи, чексиз имкониятлари муҳим маълумотлар, аниқ мисоллар орқали тушунтириб берилди.  

Мулоқотлар давомида  ўзбек тилини янада ривожлантириш, унинг давлат тили сифатидаги ўрни ва нуфузини янада мустаҳкамлаш борасида олдимизда турган катта ва масъулиятли вазифалар юзасидан ҳам ўзаро фикр алмашилди. 

Шунингдек, профессор томонидан сўз  қудрати, нотиқлик санъати, улардан кундалик ҳаётда ва айниқса, давлат хизматида ўз ўрнида ва унумли фойдаланиш юзасидан қатор амалий тавсиялар, фойдали маълумотлар берилди.  

Коррупцияга қарши курашиш агентлиги 
Ахборот хизмати