21-oktabr — O‘zbek tili bayrami kuni munosabati bilan Korrupsiyaga qarshi kurashish agentligi xodimlari uchun porofessor Rahimjon Jumaniyozov ishtirokida “O‘zbek tili — milliy o‘zligimiz va mustaqil davlatchiligimiz timsoli!” shiori ostida maʼnaviy-maʼrifiy tadbir bo‘lib o‘tdi. 

Taʼkidlanganidek, mamlakatimizda yaratilayotgan yangi tarix, yangi taraqqiyot davrida barcha soha va tarmoqlar kabi ona tilimiz qadri va nufuzini yana-da oshirish borasidagi amaliy ishlar tobora rivojlanib bormoqda. Buning tasdig‘ini o‘zbek tilining davlat tili sifatidagi maqomi va obro‘-eʼtiborini tubdan oshirish bo‘yicha qabul qilingan tarixiy farmon va qarorlar misolida yaqqol ko‘rish mumkin.

Bu kabi saʼy-harakatlar natijasida o‘zbek tili nafaqat mamlakatimizda, balki jahon miqyosida ham o‘zining munosib o‘rni va mavqeiga ega bo‘lib bormoqda. Ayniqsa, ona tilimiz Birlashgan Millatlar Tashkilotining yuksak minbarida, ulkan siyosiy sammit va uchrashuvlarda baralla yangrab, tinchlik, do‘stlik va hamkorlik vositasiga aylanib borayotgani quvonarlidir. 

Tadbirda o‘zbek tilining boy tarixi, uning jozibasi va taʼsir kuchi, cheksiz imkoniyatlari muhim maʼlumotlar, aniq misollar orqali tushuntirib berildi.  

Muloqotlar davomida  o‘zbek tilini yana-da rivojlantirish, uning davlat tili sifatidagi o‘rni va nufuzini yana-da mustahkamlash borasida oldimizda turgan katta va masʼuliyatli vazifalar yuzasidan ham o‘zaro fikr almashildi. 

Shuningdek, professor tomonidan so‘z  qudrati, notiqlik sanʼati, ulardan kundalik hayotda va ayniqsa, davlat xizmatida o‘z o‘rnida va unumli foydalanish yuzasidan qator amaliy tavsiyalar, foydali maʼlumotlar berildi.  

Korrupsiyaga qarshi kurashish agentligi 
Axborot xizmati