Французларнинг 64% мамлакатда коррупция кенг тарқалган деб ҳисоблайди

2022 йил баҳорида ўтказилган Эуробарометр тадқиқотига кўра, французларнинг 64% Францияда коррупция кенг тарқалган деб ҳисоблайди,  7%  фуқаролар аллақачон бу иллатнинг «қурбони» бўлганликларини билдирган,  деб хабар бермоқда Франция Антикоррупция агентлиги. Бу рақамлар мамлакат иқтисодиётининг шаффофлиги ва барқарорлигини таъминлаш, институтлар ва демократияга бўлган ишончни мустаҳкамлаш учун ҳалолликка қарши ҳужумларга нисбатан самарали ва қатъий кураш зарурлигини кўрсатмоқда, деб қайт этмоқда Франция Антикоррупция агентлиги.

Хитой банкининг собиқ раиси пора ва бошқа имтиёзлар олиш учун ўз лавозимидан фойдаланган

Лю Ляньгэ Хитой президенти Си Цзиньпиннинг коррупцияга қарши кураш кампаниясида қўлга олинган сўнгги молиявий раҳбардир.

Хитой давлат оммавий ахборот воситаларининг хабар беришича, Хитой банкининг собиқ раиси Лю Ляньгэ коррупцияда айбланиб ҳибсга олинган.

2019 йилдан шу йилнинг мартигача давлат банкини бошқарган Лю Ляньгэ Олий халқ прокуратураси томонидан порахўрлик ва ноқонуний кредитлар беришда гумонланиб ҳибсга олинган, дея хабар беради Синхуа агентлиги.

Люнинг ҳибсга олиниши мамлакатнинг коррупцияга қарши кураш хизмати томонидан ҳуқуқбузарлик айбловлари ортидан ҳукмрон Хитой Коммунистик партиясидан чиқариб юборилганидан бир ҳафта ўтгач содир бўлди.

Интизомни текшириш бўйича марказий комиссия Люни бир қатор ноқонуний фаолиятда, жумладан, ноқонуний кредитлар беришда, мамлакатга тақиқланган нашрларни олиб киришда ҳамда пора ва бошқа имтиёзлар олиш учун ўз лавозимидан фойдаланганликда айблади.

Лю Хитой молия доираларининг таниқли шахси бўлиб, илгари Хитойнинг марказий банки ва экспорт-импорт банкида юқори лавозимларда ишлаган.

Хитой раҳбари Си Цзиньпин 2012 йилда ҳокимиятга келганидан бери коррупцияни йўқ қилиш бўйича кенг қамровли кампания олиб борди.

Си Цзиньпиннинг коррупцияга қарши кураши давлат банкларининг бир қатор таниқли молиявий раҳбарларини тузоққа туширди.

Албаниянинг собиқ бош вазири ва унинг куёви ерни хусусийлаштириш можаросида коррупцияда айбланмоқда

Албаниянинг собиқ бош вазири Сали Бериша ва унинг куёви Тирандаги мулк билан боғлиқ ер битими бўйича коррупция ва пул ювишда айбланмоқда.

79 ёшли Беришанинг айтишича, у ҳам, унинг куёви 50 ёшли Жамарбер Маллтези ҳам айбсиз.

Коррупция ва уюшган жиноятчиликка қарши махсус прокуратура идораси қайд этишича, Беришанинг куёви унинг бош вазир лавозимидан фойдаланиб, мамлакат Мудофаа вазирлигига тегишли бўлган Тиранадаги ерни хусусийлаштириб, аввалги эгаларига қайтариб берган, улар эса ерни дарҳол арзон нархда сотиб юборган ва бу жойга кўп қаватли уйлар қурилган.

Бериша 2005-2013 йилларда Албания бош вазири, 1992-1997 йилларда эса президент лавозимларида ишлаган. У 2021 йил апрель ойида бўлиб ўтган парламент сайловида Демократик партиядан депутат этиб қайта сайланган.

2021 йилнинг май ойида АҚШ ҳукумати Бериша ва унинг яқин оиласини коррупцияга алоқадорликда айблаб, мамлакатга киришни тақиқлаган.

АҚШ Давлат котиби Энтони Блинкеннинг айтишича, Беришанинг 2005-2013 йиллардаги бош вазирлик даврида сиёсатчи "ўз ҳокимиятидан ўз манфаати учун ҳамда сиёсий иттифоқчилари ва оила аъзоларини бойитиш учун" фойдаланган.

Блинкен, шунингдек, Беришани "мустақил терговлар, коррупцияга қарши ҳаракатлар ва жавобгарлик чораларига" аралашишда айблади. Унинг сўзларига кўра, Беришанинг “коррупцион ҳаракатлари Албанияда демократияга путур етказган”.

Бериша коррупцияга алоқадорлиги сабабли АҚШга кириши тақиқланган албаниянинг тўртинчи юқори лавозимли амалдори.

ФВВ ходимлари “Ҳалоллик текшируви”дан ўтади

Қозоғистон Республикаси Фавқулодда вазиятлар вазири Сирим Шарипхонов қозоғистонликлардан ходимларнинг коррупцияга чидамлилигини текширишда иштирок этишни сўради, деб ёзади BaigeNews.kz.

Сирим Шарипхоновнинг айтишича, вазирлик тизимидаги бошқармаларда коррупцияга қарши курашиш самарадорлигини ошириш мақсадида жорий йилнинг октябрь ойида ходимларни “Ҳалоллик текшируви”дан ўтказиш бўйича тажриба лойиҳаси жорий этилган. Лойиҳа ҳалол бўлмаган ходимларни ўз вақтида аниқлаш ва коррупцияга оид ҳуқуқбузарликларга чек қўйиш имконини беради.

“Ҳалоллик текшируви” ишга туширилгандан бери биз ходимлардан номаълум шахслардан ўз ҳисоб рақамларига пул маблағлари тушгани ҳақида 17 та хабар олдик, бу уларнинг коррупцияга чидамлилигини кўрсатади. Ғурур билан таъкидламоқчиманки, ходимларимизнинг 99,9 фоизини ҳар куни ўз ҳаёти ва соғлиғини хавф остига қўйиб, ўз хизматини шараф ва муносиб адо этувчи ҳалол, виждонли инсонлар ташкил этади. Лекин, афсуски, сафимизда ноҳалол ходимлар ҳам бўлиши мумкин.

“Фавқулодда вазиятлар вазирлиги фуқаро муҳофазаси органларидаги коррупцияга қатъий чек қўйишга қаратилган. Жамоатчиликни сафимизда коррупцияга қарши курашишда фаол иштирок этишга таклиф қиламан. Фавқулодда вазиятлар вазирлиги сафларида ноқонуний хатти-ҳаракатларни сезсангиз, албатта бизга хабар беринг.  Биз одамларга ёрдам берадиган хизматмиз, шунинг учун жамоатчилик ишончи биз учун устувор аҳамиятга эга. Одамларни қутқаришдек эзгу ишимизда коррупцияга йўл қўйилмайди”, — деди Шарипхонов.

Соғлиқни сақлаш вазирининг собиқ ўринбосари порадан 88 миллион рубль “ишлаб топган”

Доғистонда Соғлиқни сақлаш вазирининг собиқ ўринбосари Мазай Рамазонов йирик пора билан қўлга олинди. Собиқ амалдор давлат шартномаларидан деярли 88 миллион рубль "ишлаб олди", деб хабар беради SHOT.

Рамазонов 2018 йилда Доғистон соғлиқни сақлаш вазири ўринбосари лавозимига тайинланган ва бир йилдан камроқ вақт ўтгач, у йирик пора олиш схемасини ишга туширган. У маҳаллий 48 ёшли тадбиркор аёл Наталя Дроздовага фойдали давлат шартномаларини олишга ёрдам берган ва ундан ҳар бир битимнинг 10 фоизини олган.

Шубҳасиз, бу схемалар давом этиши мумкин эди, аммо 2022 йилнинг январида Рамазонов лавозимидан четлатилди. Ҳаммаси фош бўлгач, “Бир гуруҳ шахслар томонидан олдиндан тил бириктириб, катта миқдорда пора олиш” моддаси бўйича жиноий иш қўзғатилди. Ҳозирча собиқ давлат хизматчиси уй қамоғига олинган, бироқ у 15 йилгача қамоқ жазосига ҳукм қилиниши мумкин. "Ёрдамчилар"ни ҳам ўн йилдан ортиқ қамоқ жазоси кутмоқда.

Коррупцияга қарши курашиш агентлиги

Ахборот хизмати