2020 йил декабрь ойида Коррупцияга қарши курашиш агентлиги ва Божхона қўмитаси ўртасида ўзаро ҳамкорлик Меморандуми имзолаган. Шундан буён Қўмита билан  божхона тизимида коррупцияга оид жиноятчиликка сабаб бўлаётган омилларни батараф этиш, манфаатлар тўқнашувининг олдини олиш ва ходимлар иш самарадорлигини ошириш борасида биргаликда иш олиб борилмоқда. 

Маълумот учун: 2022 йил якуни бўйича  коррупцияга қарши курашиш ишларининг самарадорлиги рейтингида Қўмитанинг фаолияти “яхши” (87 балл) деб баҳоланди.

Давлатимиз раҳбарининг 2022 йил 27 апрелдаги божхона маъмуриятчилигини янада такомиллаштиришга доир фармони эса божхона органларини  коррупциядан ҳоли тизимга айлантириш борасида истиқболдаги янги вазифа ва режаларни белгилаб берди.  

Бугун Коррупцияга қарши курашиш агентлиги раҳбарияти ва ходимлари божхона органларидаги рақамлаштириш ишларининг ижобий натижалари сифатида Божхона расмийлаштируви маркази фаолияти билан яқиндан танишди.

Ушбу мажмуада Маълумотларни қайта ишлаш маркази, Масофавий электрон декларациялаш пости, “Call-markaz”, Таргетлаш ва хавфларни бошқариш бўлимлари фаолияти ташкил этилган.

Хусусан, Маълумотларни қайта ишлаш маркази амалдаги захирага нисбатан катта ҳажмли замонавий серверлар, компьютер ва бошқа зарур ускуналар билан жиҳозланган бўлиб, бу алоқа каналлари тезлигини ошириш ва расмийлаштирув вақтини қисқартириш имконини бермоқда.  Бутун тизим киберҳужумлардан ҳимояланган. 

Таргетлаш ва хавфларни бошқариш бўлими  жаҳон божхона ташкилоти билан ҳамкорликда, ривожланган давлатлар тажрибаси асосида очилган. Бу ерда тезкор тузилмалар томонидан божхонанинг 50 та, Жаҳон божхона ташкилотининг 3 та ахборот дастури, 30 дан ортиқ идоралар ва хорижий божхоналарнинг маълумотлари таҳлил қилиниб, хавф-хатарлар баҳоланади ва барча божхона постлари фаолияти масофадан бошқарилади.

Масофавий электрон декларациялаш пости 3D-сканер, рентген, видеокузатув, сервер, транспорт тарозиси каби замонавий ускуналар билан жиҳозланган бўлиб, ахборот тизими орқали бошқариш ва маълумотларни онлайн режимда таҳлил қилиб бориш имконини бермоқда.  

Божхона ва юк операцияларини шу каби рақамли трансформация қилиш орқали инсон омилини  кескин қисқартиришга,  соҳада очиқлик, шаффофликни таъминлашга эришилмоқда. 

Қўмита раҳбарияти билан мулоқотда тизимни коррупциядан холи соҳага айлантириш борасидаги ишларни янада такомиллаштириш, бу каби илғор  ютуқларни барча соҳаларга татбиқ этиш ва оммалаштириш,  шунингдек, ўзаро ҳамкорликда келгусидаги режа ва мақсадлар юзасидан фикр алмашилди.

Коррупцияга қарши курашиш агентлиги

Ахборот хизмати