Жорий йилнинг 2 ноябрь куни Коррупцияга қарши курашиш агентлиги томонидан БМТнинг Гиёҳванд моддалар ва жиноятчиликка қарши курашиш бошқармаси кўмагида “Марказий Осиёда БМТ Коррупцияга қарши конвенциясининг амалга оширилишини жадаллаштириш бўйича Минтақавий конференция” ташкил этилди.

Унда Марказий Осиё давлатларининг коррупцияга қарши курашиш бўйича масъул давлат идоралари раҳбар ва ходимлари, халқаро ва нодавлат ташкилотларнинг етакчи экспертлари, оммавий ахборот воситалари вакиллари иштирок этди.

Конференциядан кўзланган асосий мақсад — Марказий Осиёда БМТ Коррупцияга қарши конвенциясининг амалга оширилишини жадаллаштириш, бу борада Минтақавий платформани ишга тушириш масалаларини муҳокама қилиш, таклиф ва тавсиялар ишлаб чиқиш, келгусидаги мақсад ва вазифаларни белгилаб олишдан иборат.

Таъкидланганидек, минтақадаги барча давлатлар коррупцияга қарши курашишнинг муҳим аҳамиятидан келиб чиқиб, БМТ Коррупцияга қарши конвенцияси талаблари бажарилиши бўйича обзорларда, Истанбул ҳаракат режасида (IAP) иштирок этиб келмоқда.

Коррупцияга қарши конвенция талабларини амалга ошириш минтақадаги барча давлатлар иштирок этадиган ягона халқаро коррупцияга қарши механизм эканлигини ҳисобга олган ҳолда, БМТнинг Гиёҳванд моддалар ва жиноятчиликка қарши курашиш бошқармаси томонидан Марказий Осиёда Коррупцияга қарши конвенцияни жадал амалга ошириш бўйича минтақавий платформани ишга тушириш кўзда тутилмоқда.

Минтақавий платформанинг мақсади Платформа ишида иштирок этувчи мамлакатлар томонидан БМТнинг Коррупцияга қарши Конвенцияси қоидаларини янада самарали амалга оширишга кўмаклашиш, бу борада минтақа мамлакатларининг ўзаро ҳамкорлигини мустаҳкамлаш ва ривожлантиришдан иборат.

Платформа фаолияти коррупцияга қарши курашиш бўйича самарали профилактик чора-тадбирлар, хусусий секторда коррупциянинг олдини олиш ва унга қарши курашиш, активларни қайтариш ва халқаро ҳамкорлик каби йўналишларни қамраб олади.

Платформанинг ўзига хос вазифалари ўзаро ахборот ва таълим алмашиш, билимларни бошқариш ва минтақада коррупцияга қарши кураш сиёсатининг устувор йўналишлари бўйича келишувлар учун форум ташкил этиш, ҳамкорликни мувофиқлаштиришни такомиллаштиришга қаратилади.

Тадбирда дастлаб БМТ коррупцияга қарши конвенциясини Марказий Осиё давлатларида амалга оширишни жадаллаштириш бўйича Минтақавий платформа Низоми лойиҳаси ҳамда Платформанинг тематик йўналишлари тақдимот қилинди. Шунингдек, Платформа бўйича икки йиллик ҳаракатлар режаси лойиҳаси ҳам кўриб чиқилиб, иштирокчи-давлатлар вакиллари томонидан тақдим этилган таклифлар муҳокама қилинди.

Конференцияда иштирокчи мамлакатларнинг вакиллари томонидан Платформанинг мақсадлари, иш ҳажми ва аниқ Ҳаракатлар режаси, иштирокчи мамлакатлар ўртасидаги ўзаро ҳамкорлик формати ва йўналишлари тўғрисида фикр-мулоҳаза ва таклифлар билдирилди.

Йиғилишда Бирлашган Миллатлар Ташкилоти Коррупцияга қарши конвенциясини жадал амалга ошириш учун Тошкент шаҳрида Марказий Осиё Минтақавий платформасини ишга тушириш тўғрисида қарор қабул қилинди.

Коррупцияга қарши курашиш агентлиги

Ахборот хизмати