Сенатнинг Ахборот сиёсати ва давлат органларида очиқликни таъминлаш масалалари қўмитасининг жорий йил 1 ноябрь куни ўтказилган навбатдаги мажлисида “Давлат ҳокимияти ва бошқаруви органлари фаолиятининг очиқлиги тўғрисида”ги Қонуннинг Ўзбекистон Республикаси Камбағалликни қисқартириш ва бандлик вазирлиги ҳамда унинг тасарруфидаги ташкилотларда ижро этилиши ҳолати муҳокама қилинди.

Қўмита аъзолари, Коррупцияга қарши курашиш агентлиги ҳамда бошқа масъул идораларнинг ходимларидан иборат Ишчи гуруҳ томонидан вазирлик ва унинг тасарруфидаги ташкилотларда 2023 йилнинг ўтган 9 ойи давомида очиқликни таъминлаш йўналишида амалга оширилган ишлар ўрганилди.  

Ўрганиш ва таҳлил натижаларига кўра, ижтимоий аҳамиятга молик маълумотлар веб-сайт ҳамда очиқ маълумотлар порталига (data.egov.uz) ўз вақтида жойлаштириб борилган.

Ҳисобот даврида жамоатчиликни вазирлик томонидан амалга оширилаётган ишлардан хабардор қилиш мақсадида 20 та брифинг, 7 та пресс-тур ўтказилган.

Шу билан бирга мажлисда вазирлик, унинг таркибий ва ҳудудий бошқармаларида очиқликни таъминлаш йўналишида йўл қўйилган камчиликларга ҳам тўхталиб ўтилди.

Жумладан, айрим ҳудудий бош бошқармаларнинг расмий веб-сайтида ижтимоий аҳамиятга эга маълумотлар ўз муддатида жойлаштирмаган. Оила ва хотин-қизлар қўмитасининг ҳудудий бошқармаларида ахборот хизматлари ташкил этилмаган.

Маҳаллабай ишлаш ва тадбиркорликни ривожлантириш агентлигида бугунги кун ҳолатига кўра расмий веб-сайт фаолияти талаб даражасида эмас ҳамда ахборот хизматига масъул шахс тайинланмаган.

Вазирлик тизимидаги ташкилотларнинг аксариятида фаолиятига оид ҳисоботлар, харид комиссияларининг таркиби, мансабдор шахсларнинг хизмат сафарлари тўғрисидаги маълумотлар жойлаштирилмасдан келинган.

Йиғилишда шу каби камчилик ва сусткашликлар танқидий кўриб чиқилиб, очиқликни таъминлашга масъул бўлган ходимларнинг масъулиятини кучайтириш масалалари муҳокама қилинди.

Қўмита аъзолари томонидан очиқликни таъминлаш борасидаги ишларни янада такомиллаштириш, вазирлик фаолияти билан боғлиқ бўлган ахборотлардан жамоатчилик доимий хабардор бўлиши учун зарур чоралар кўриш бўйича тегишли тавсиялар берилди.

Коррупцияга қарши курашиш агентлиги

Ахборот хизмати