Коррупцияга қарши курашиш миллий кенгаши мажлисининг

2021 йил 19 августдаги 4-сонли баённомасига 2-илова

Қорақалпоғистон Республикаси, вилоятлар ва Тошкент шаҳар Коррупцияга қарши курашиш ҳудудий кенгашлари тўғрисидаги
НИЗОМ

I. УМУМИЙ ҚОИДАЛАР

1. Қорақалпоғистон Республикаси, вилоятлар ва Тошкент шаҳар Коррупцияга қарши курашиш ҳудудий кенгашлари (кейинги ўринларда – Ҳудудий кенгашлар) коррупцияга қарши курашиш бўйича фаолиятни амалга оширувчи ва унда иштирок этувчи ҳудудий органлар ҳамда ташкилотлар фаолиятини мувофиқлаштирувчи орган ҳисобланади. Ҳудудий кенгаш томонидан қабул қилинадиган қарорлар жойлардаги барча давлат ҳокимияти ва бошқаруви органлари, жамоат бирлашмалари ва бошқа ташкилотлар томонидан ижро этилиши мажбурийдир.

2. Ҳудудий кенгаш ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталари қарорларига, Ўзбекистон Республикаси Президенти фармонлари ва қарорларига ҳамда ушбу Низомга ва бошқа қонун ҳужжатларига, шунингдек Ўзбекистон Республикаси Коррупцияга қарши курашиш миллий кенгаши (кейинги ўринларда – Миллий кенгаш) қарорларига амал қилади.

3. Ҳудудий кенгаш ўз фаолиятини жойлардаги давлат органлари ва бошқа ташкилотлар билан ўзаро ҳамкорликда амалга оширади.

II. ҲУДУДИЙ КЕНГАШНИНГ АСОСИЙ ВАЗИФАЛАРИ

4. Ҳудудий кенгашнинг асосий вазифалари қуйидагилардан иборат:

коррупцияга қарши курашиш соҳасидаги давлат ва бошқа дастурларнинг амалга оширилишини ташкил этиш;

тегишли ҳудудда коррупцияга қарши курашиш бўйича фаолиятни амалга оширувчи ва унда иштирок этувчи органлар ҳамда ташкилотларнинг фаолиятини мувофиқлаштириш ва ҳамкорлигини таъминлаш;

аҳолининг ҳуқуқий онги ва ҳуқуқий маданиятини юксалтиришга, жамиятда коррупцияга нисбатан муросасиз муносабатни шакллантиришга доир чора-тадбирларнинг ишлаб чиқилиши ҳамда амалга оширилишини ташкил этиш;

коррупцияга оид ҳуқуқбузарликларнинг олдини олиш, уларни аниқлаш, чек қўйиш, оқибатлари ҳамда имкон берувчи сабаблар ва шарт-шароитларни бартараф этишга доир чора-тадбирлар самарадорлиги оширилишини таъминлаш;

коррупциянинг ҳолати ва тенденциялари тўғрисидаги ахборотни йиғиш ҳамда таҳлил этиш;

коррупцияга қарши курашиш бўйича чора-тадбирларнинг амалга оширилиши юзасидан мониторингни амалга ошириш, ушбу соҳадаги мавжуд ташкилий-амалий ва ҳуқуқий механизмларнинг самарадорлигини баҳолаш учун тегишли ҳудудда қилинган ишлар ижроси ҳақида Миллий кенгаш ишчи органига ахборот тақдим этиш;

коррупцияга қарши курашиш тўғрисидаги қонун ҳужжатларини такомиллаштириш, ушбу соҳадаги ишларни яхшилаш юзасидан таклифлар тайёрлаш ва Миллий кенгашга киритиш.

III. ҲУДУДИЙ КЕНГАШНИНГ ҲУҚУҚ ВА МАЖБУРИЯТЛАРИ

5. Ҳудудий кенгаш қуйидаги ҳуқуқларга эга:

- тегишли ҳудудда коррупцияга қарши курашиш бўйича фаолиятни амалга оширувчи ва унда иштирок этувчи органлар ва ташкилотлар фаолияти самарадорлигини оширишга қаратилган қарорлар қабул қилиш;

- вазирликлар, давлат қўмиталари ва идораларнинг ҳудудий тузилмалари, маҳаллий давлат ҳокимияти органлари, бошқа давлат органлари, фуқароларнинг ўзини ўзи бошқариш органлари, нодавлат ташкилотлар ва фуқаролардан Ҳудудий кенгаш ваколатига тааллуқли бўлган ахборотни белгиланган тартибда сўраш ва олиш;

- Миллий кенгашга коррупцияга қарши курашиш соҳасида қонун ҳужжатларини ва ҳуқуқни қўллаш амалиётини такомиллаштириш юзасидан таклифлар киритиш;

- коррупцияга қарши курашиш бўйича фаолиятни амалга оширувчи ҳудудий давлат органлари раҳбарларининг ҳисоботларини ва маърузаларини эшитиш;

- Ҳудудий кенгаш фаолиятининг муҳим масалалари юзасидан ўрганишлар ўтказиш ва таклифлар тайёрлаш учун ишчи комиссиялар ва (ёки) эксперт гуруҳлари тузиш, шунингдек ушбу комиссиялар ва гуруҳлар ишига мутахассисларни, бундан ташқари, агарда зарурат туғилганда илғор хорижий давлатларнинг малакали экспертларини жалб этиш;

- Миллий кенгаш ишчи органининг топшириғи билан ҳудудий давлат органлари томонидан коррупцияга қарши курашиш бўйича қабул қилинган стратегия ва давлат дастурлари ижросини ўрганиш;

- коррупциянинг олдини олиш ва унга қарши курашиш соҳасида оммавий-ахборот воситалари, нодавлат-нотижорат ташкилотлари, фуқаролик жамияти институтлари ва фуқароларнинг биргаликдаги самарали фаолиятини таъминлаш;

- ҳудудларда ёшларда коррупцияга қарши иммунитетни мустаҳкамлаш мақсадида мактаблар, касб-ҳунар коллежлари ва олий ўқув юртларида коррупциянинг олдини олиш ва унга қарши курашиш фанларининг ўтилишини ташкил этиш ва уни назорат қилиб бориш;

- ҳудудларда «Коррупциясиз соҳа» дастурини мунтазам тарзда жорий этиш ва соҳалар қамровини кенгайтириш;

- ҳудудларда инвестиция лойиҳаларини амалга оширишда «Коррупцияга қарши экспертиза» ўтказиш тизимини ишлаб чиқиш ва уни назорат қилиб бориш;

- ҳудудларда давлат ва хўжалик бошқаруви органлари, давлат корхоналари ва устав капиталида давлат улуши бўлган корхонлар, шу жумладан банкларда коррупцияга қарши ички назорат тизими («комлаенс назорат») ҳамда коррупцияга қарши курашишнинг бошқа халқаро воситаларини жорий этиш ишлари бўйича маърузаларни тинглаш;

- ҳудудларда давлат ва хўжалик бошқаруви соҳаларида замонавий усуллар ва ахборот-коммуникация технологиялари асосида коррупцияга қарши мониторинг олиб бориш ва уларнинг мазкур соҳадаги фаолияти бўйича рейтингини тузиш ишларини кузатиш;

- коррупцияга қарши чоралар кўришнинг самарадорлиги юзасидан социологик, илмий ва бошқа тадқиқотлар лойиҳалари юзасидан таклифлар бериш;

- ҳудудларда давлат ҳокимияти ва бошқаруви органларининг коррупцияга қарши курашиш соҳасидаги фаолияти, шунингдек, ушбу соҳадаги давлат ва бошқа дастурлар самарадорлигини мониторинг қилиш ҳамда баҳолаш имконини берувчи «E-Anticor.uz» электрон платформасини ва коррупция ҳолатлари ҳақида Ўзбекистон Республикаси Коррупцияга қарши курашиш агентлигини (кейинги ўринларда – Агентлик) хабардор қилиш имконини берувчи махсус мобил дастурни такомиллаштириб бориш чораларини кўриш;

- ҳудудларда коррупцияга қарши курашиш соҳасидаги ишларнинг ҳолатини комплекс ўрганиш.

Ҳудудий кенгаш қонун ҳужжатларига мувофиқ бошқа ҳуқуқларга ҳам эга бўлиши мумкин.

6. Ҳудудий кенгаш қуйидагиларга мажбур:

- Ўзбекистон Республикаси Президенти ва Ўзбекистон Республикаси Ҳукуматининг ҳамда Миллий кенгашнинг коррупцияга қарши курашишга доир ишлар самарадорлигини оширишга қаратилган тадбирларни ташкил этиш бўйича қарорларини ижро этиш;

- фуқаролик жамияти институтлари билан биргаликда ҳудудлар, иқтисодиёт тармоқлари ва бошқа соҳалар кесимида коррупциянинг даражасини баҳоловчи Коррупцияни қабул қилиш миллий индексини ишлаб чиқиш ва такомиллаштириш ишларини мувофиқлаштириш бўйича Агентликка маълумотлар тақдим этиш;

- жойларда коррупциянинг олдини олишга қаратилган ҳудудий дастурлар ишлаб чиқиш ва уни амалга ошириш;

- Ҳудудий кенгаш томонидан қабул қилинган қарорларнинг ўз вақтида ижро этилиши юзасидан назоратни ва мониторингни амалга ошириш;

- Миллий кенгашга ҳар чоракда Ҳудудий кенгаш томонидан амалга оширилган ишлар тўғрисида ахборот бериш.

Ҳудудий кенгашнинг зиммасида қонун ҳужжатларига мувофиқ бошқа мажбуриятлар ҳам бўлиши мумкин.

IV. ҲУДУДИЙ КЕНГАШ ИШИНИ ТАШКИЛ ЭТИШ

7. Ҳудудий кенгаш таркиби жойлардаги давлат ҳокимияти ва бошқаруви органлари, маҳаллий кенгаш депутатлари, нодавлат ташкилотлари раҳбарларидан шакллантирилади ҳамда Миллий кенгаш қарори билан тасдиқланади.

8. Ҳудудий кенгаш ўз фаолиятини доимий асосда олиб боради ва ўз мажлисларини заруратга қараб, аммо йилнинг ҳар чорагида камида бир марта ўтказади. Ҳудудий кенгаш мажлис ўтказишдан камида 5 кун олдин Миллий кенгашга амалга оширилган ишлар, шунингдек мажлис кун тартибига қўйилган масалалар юзасидан ахборот тақдим этади.

Ҳудудий кенгашнинг мажлислари, агар уларда таркибининг камида учдан икки қисми иштирок этган бўлса, ваколатли деб ҳисобланади. Қарорлар Ҳудудий кенгашнинг мажлисида иштирок этган аъзоларнинг кўпчилик овози билан қабул қилинади. Овозлар тенг бўлган тақдирда, Ҳудудий кенгаш раисининг овози ҳал қилувчи ҳисобланади. Ҳудудий кенгаш қарорлари ҳудудий кенгаш раиси томонидан тасдиқланадиган ва котиб томонидан имзоланадиган баённома билан расмийлаштирилади. Баённомага Ҳудудий кенгаш аъзолари алоҳида фикр билдириш ва уни ёзма тарзда баён этиш ҳуқуқига эга.

9. Ҳудудий кенгашнинг мажлисларига давлат органлари ва бошқа ташкилотлар вакилларини таклиф этиш мумкин. Ҳудудий кенгашлар мажлисларида Миллий кенгаш аъзолари, шунингдек, Миллий кенгаш ишчи органи вакиллари иштирок этиши мумкин.

10. Ҳудудий кенгаш раиси:

Ҳудудий кенгаш фаолиятига раҳбарлик қилади;

Ҳудудий кенгаш мажлисларини чақиради ва уларга раислик қилади;

Ҳудудий кенгаш мажлислари кун тартибини тасдиқлайди;

Ҳудудий кенгаш иш режаларини тасдиқлайди.

Ҳудудий кенгаш раиси ўз ўрнида бўлмаганида унинг вазифасини Ҳудудий Кенгаш раисининг ўринбосари амалга оширади.

11. Ҳудудий кенгашларнинг ишчи органи функциясини тегишинча Қорақалпоғистон Республикаси Жўқорғи Кенгеси, вилоятлар ва Тошкент шаҳар халқ депутатлари кенгашлари котибиятлари бажаради.

Ишчи орган қуйидагиларни амалга оширади:

- Ҳудудий кенгаш фаолиятини ташкилий-техник жиҳатдан таъминлаш;

- Ҳудудий кенгашнинг ҳар ярим йиллик иш режасини ишлаб чиқиш, унинг ижросини назорат қилиш, шунингдек Ҳудудий кенгашнинг кундалик фаолиятини тасдиқланган режага мувофиқ ташкил қилиш;

- вазирлик, давлат қўмиталари ва идораларнинг ҳудудий тузилмалари, маҳаллий давлат ҳокимияти органлари, фуқароларнинг ўзини ўзи бошқариш органлари, жамоат бирлашмалари ва бошқа ташкилотлар билан биргаликда Давлат дастурининг ижроси юзасидан мониторингни амалга ошириш
ва назорат қилиш, шунингдек Миллий кенгаш ва Ҳудудий кенгашлар қабул қилган қарорлар бўйича ахборотларни жамлаш ва умумлаштириш, Миллий кенгаш ишчи органига ҳамда Ҳудудий кенгаш раисига тегишли ахборот ва таклифларни киритиш;

- келиб тушаётган хат ва ҳужжатларни кўриб чиқиш ва Ҳудудий кенгаш ваколатига кирадиган масалалар юзасидан қарорлар тайёрлаш;

- коррупцияга қарши курашишга қаратилган чора-тадбирларни амалга ошириш, бу борадаги фаолиятни такомиллаштириш бўйича таклифлар тайёрлаш ва Миллий Кенгашга киритишни ташкил этиш.

Ишчи орган қонун ҳужжатлари, Миллий кенгаш ва Ҳудудий кенгашнинг қарорларига мувофиқ бошқа функцияларни ҳам амалга ошириши мумкин.

12. Ҳудудий кенгаш котиби:

Ҳудудий кенгаш мажлислари кун тартиби масалалари бўйича ўтказилишини ташкил этади;

барча зарур ҳужжатлар навбатдаги мажлисга тўпланиши, умумлаштирилиши ва Ҳудудий кенгаш раисига тақдим этилишини таъминлайди;

Ҳудудий кенгаш раиси билан мажлиснинг муддати ва жойини ҳамда таклиф этиладиган шахслар рўйхатини келишади;

Ҳудудий кенгаш аъзолари ва таклиф этилган шахсларга мажлис ўтказиладиган сана, вақти, жойи тўғрисида хабар беради;

Ҳудудий кенгаш қарорлари бажарилиши мониторингини олиб боради ва унинг натижаларини Ҳудудий кенгаш мажлисида кўриб чиқиш учун тақдим этади;

Ҳудудий кенгаш мажлислари баённомаларини расмийлаштиради ва тасдиқланган баённомаларни Миллий кенгашга, манфаатдор вазирликлар ва идораларга юборади.