Ўзбекистон Республикаси Коррупцияга қарши курашиш агентлиги директорининг

2022 йил 7-июлдаги 46–сонли буйруғига 1-илова

ЎЗБЕКИСТОН РЕСПУБЛИКАСИ КОРРУПЦИЯГА ҚАРШИ КУРАШИШ АГЕНТЛИГИ ҲУЗУРИДАГИ

ЖАМОАТЧИЛИК КЕНГАШИ ТЎҒРИСИДАГИ

НИЗОМ

 

1- боб. УМУМИЙ ҚОИДАЛАР

1. Мазкур низом Ўзбекистон Республикаси Коррупцияга қарши курашиш агентлиги (кейинги ўринларда - Агентлик) ҳузуридаги Жамоатчилик кенгашининг (кейинги ўринларда - Жамоатчилик кенгаши) асосий вазифалари, функциялари, ваколатларини ва фаолиятини ташкил этиш тартибини белгилайди.

2. Жамоатчилик кенгаши ўз ишини жамоатчилик асосида олиб борадиган, доимий фаолият юритувчи маслаҳат-кенгаш органи ҳисобланади.

3. Жамоатчилик кенгаши Агентлик ҳузурида ташкил этилади.

4. Жамоатчилик кенгаши Агентлик директори буйруғи билан ташкил этилади.

5. Жамоатчилик кенгашининг қарорлари тавсиявий хусусиятга эга.

6. Жамоатчилик кенгаши ўз фаолиятида Ўзбекистон Республикасининг Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, Агентлик директорининг буйруқларига, мазкур Низомга ҳамда бошқа қонун ҳужжатларига амал қилади.

Аъзоларининг Жамоатчилик кенгашининг мақсад ёки асосий вазифалари доирасидан четга чиқиб, Жамоатчилик кенгаши Агентлик билан келишилмаган ҳолда билдирган фикр-мулоҳазалари ҳамда содир этган хатти-ҳаракатлари Жамоатчилик кенгашининг нуқтаи-назарини англатмайди;

7. Жамоатчилик кенгаши тўғрисидаги Низом ва унга киритиладиган ўзгартишлар ҳамда қўшимчалар Агентлик директори буйруғи билан тасдиқланади.

8. Агентлик Жамоатчилик кенгаши аъзоларини коррупцияга қарши билим ва кўникмаларини ошириш мақсадида ўқув курсларини ташкил этади.

 

2-боб. ЖАМОАТЧИЛИК КЕНГАШИНИНГ МАҚСАДИ, АСОСИЙ ВАЗИФАЛАРИ, ФУНКЦИЯЛАРИ, ҲУҚУҚЛАРИ ВА МАЖБУРИЯТЛАРИ

9. Жамоатчилик кенгашининг мақсади Ўзбекистон Республикасида коррупциянинг олдини олиш ва унга қарши курашиш бўйича олиб борилаётган сиёсат ва чора-тадбирларнинг самарадорлигини оширишга кўмаклашишдан иборат.

Мазкур мақсадга эришиш учун Жамоатчилик кенгаши қуйидаги вазифаларни амалга оширади:

Коррупциянинг олдини олиш ва унга қарши курашиш соҳасида Агентлик ва жамоатчилик ўртасида самарали мулоқотни йўлга қўйиш;

коррупцияга қарши курашиш сиёсати ва чора-тадбирларини такомиллаштириш бўйича жамоатчилик муҳокамаларини ташкил этиш;

фуқаролик жамияти институтлари ва бизнес ҳамжамияти билан ҳамкорликда коррупцияга қарши курашиш сиёсати, стратегияси ва чора-тадбирлари самарадорлигини ошириш бўйича таклифлар ишлаб чиқиш;

коррупцияга қарши курашиш соҳасида қабул қилинган қарорлар ва қонун ҳужжатларининг натижадорлиги, шунингдек, турли даражадаги давлат бошқаруви ва маҳаллий давлат ҳокимияти органлари, давлат корхоналари ва хўжалик юритувчи субъектлар томонидан ўз функциялари ва вазифаларини бажариш сифати ва самарадорлиги тўғрисида Агентлик хабардорлигини ошириш;

БМТ Коррупцияга қарши конвенция обзори жараёнига фуқаролик жамияти институтларининг жалб этилишига кўмаклашиш;

коррупцияга қарши курашиш йўналишидаги тарғиботга кўмаклашиш
ва унда фуқаролик жамияти институтларининг иштирокини мувофиқлаштириш;

Жамоатчилик кенгашларининг тартиб-қоидаларини такомиллаштириш юзасидан илғор тажриба асосида тавсиялар ишлаб чиқиш;

давлат органлари томонидан ошкор қилинадиган маълумотларнинг ҳисобдорлиги, очиқлиги ва сифати тўғрисида маълумотлар тайёрлаш;

фуқаролик жамияти билан боғлиқ лойиҳаларни мониторинг қилиш;

Агентлик фаолияти тўғрисида жамоатчилик фикрини кузатиб бориш, таҳлил қилиш ва улар орасида ижобий фикр шакллантиришда Агентликка яқиндан кўмак бериш;

Агентлик фаолиятининг шаффофлигини мониторинг қилиш;

биргаликда мулоқот қилиш, Агентликнинг нодавлат нотижорат ташкилотлари, оммавий ахборот воситалари ва фуқаролик жамиятининг бошқа институтлари билан самарали ҳамкорлигини таъминлаш учун Агентликни фуқаролар билан боғлаб турадиган “кўприк” ролини бажариш;

мамлакатда коррупциянинг тарқалиш даражаси (турли-хил давлат хизматларини кўрсатиш жараёнидаги коррупциявий ҳолатлар, уларнинг турлари, шакллари, схемалари) тўғрисида Агентликни хабардор қилиш;

фуқаролар ва тадбиркорлик субъектлари томонидан давлат хизматлари кўрсатиш ёки тадбиркорлик фаолиятини давлат томонидан тартибга солиш тизимининг ишлаши билан боғлиқ бўлган мурожаатлар юзасидан Агентликни хабардор қилиш;

Ўзбекистон Республикаси Президенти ҳузуридаги Жамоатчилик палатасига коррупциянинг олдини олиш ва унга қарши курашиш соҳасида жамоатчилик назоратининг самарали тизимини шакллантириш, “жамоатчилик эшитуви”, “жамоатчилик экспертизаси”, “жамоатчилик мониторинги” каби таъсирчан замонавий назорат шаклларини амалда жорий этишга кўмаклашиш;

Агентлик фаолиятини жамоатчилик фикри ва оммавий ахборот воситаларида ёритиш бўйича бажарилаётган ишларнинг натижаларини таҳлил қилиш, уларнинг самарадорлигини ошириш ва мавжуд камчиликларни бартараф этиш юзасидан таклифлар ишлаб чиқиш.

10. Жамоатчилик кенгаши зиммасига юклатилган вазифалар
ва функцияларни бажариш учун:

кун тартибидаги масалалар, ҳужжатлар лойиҳалари, коррупцияга қарши курашиш сиёсатини муайян ҳудуд, соҳа ва тармоқларда амалга оширилиши натижалари бўйича оғзаки ёки ёзма равишда ўзининг эксперт фикрини билдириш ҳамда муҳокама қилиш;

жамоатчилик фикри ва оммавий ахборот воситаларида эълон қилинган материалларни Жамоатчилик кенгаши ва Агентлик раҳбариятига кўриб чиқиш учун тақдим этиш;

Агентлик томонидан ташкил этиладиган бўлажак очиқ мажлислар ва бошқа оммавий тадбирлар тўғрисидаги ахборотни олдиндан олиш ҳамда мазкур тадбирларда иштирок этиш;

Агентлик директорига жамоатчилик кенгаши ваколатига кирадиган масалалар юзасидан таклифлар киритиш;

Агентлик ёки унинг ходимлари устидан келиб тушадиган шикоятларни талаб қилиб олиш, ўрганиш ва натижаси бўйича Агентлик томонидан кўриб чиқилиши мажбурий бўлган тавсиялар бериш, шунингдек, коррупцияга қарши курашиш сиёсати ҳамда Агентлик фаолиятининг самарадорлигини оширишга қаратилган фуқароларнинг таклифлари билан танишиб чиқиш;

Агентлик фаолияти самарадорлигини ошириш бўйича таклиф ва тавсияларни ишлаб чиқиш ҳамда амалга ошириш учун зарур бўлган Агентликнинг ахборотлари, статистика ва бошқа материалларини белгиланган тартибда олиш;

Агентлик томонидан ишлаб чиқилган норматив-ҳуқуқий ҳужжатлар лойиҳаларининг жамоатчилик ва экспертлар муҳокамасини таъминлашда иштирок этиш;

Жамоатчилик кенгаши ўз фаолиятига доир масалалар, бу борада қилинаётган ишлар ҳамда мажлисларида муҳокама қилинадиган масалаларни ёритиш бўйича оммавий ахборот воситалари билан ҳамкорлик қилиш;

юклатилган вазифаларни бажариш учун конференциялар, форумлар, семинарлар, давра суҳбатлари ва бошқа тадбирларни ташкил этиш ҳуқуқига эга.

Жамоатчилик кенгаши аъзолари ўз ваколатларига киритилган масалалар юзасидан вақтинчалик ишчи гуруҳ, экспертлар гуруҳларини тузишлари мумкин.

11. Жамоатчилик кенгаши ўз фаолиятини амалга оширишда:

жамоатчилик назорати тўғрисидаги қонун ҳужжатлари талабларига риоя қилиши;

Агентлик ходимларининг ўз ваколатлари доирасида амалга оширадиган фаолиятига аралашмаслиги;

Агентлик ходимлари фаолият кўрсатиши учун тўсқинлик қилмаслиги;

фуқароларнинг ор-номуси ва қадр-қимматини таҳқирлашга, уларнинг шахсий ҳаётига аралашишга йўл қўймаслиги;

жисмоний ва юридик шахсларнинг коррупцияга алоқадорлиги тўғрисида тасдиқланмаган маълумотларни тарқатмаслиги ҳамда айбсизлик презумпсияси принципига амал қилиши;

жамоатчилик назоратини амалга ошириш давомида олинган ахборотнинг, агар бундай ахборотни тарқатиш қонун билан чекланган бўлса, махфийлигига риоя қилиши шарт;

Жамоатчилик кенгаши номидан интервью бериш, учрашув, ўрганиш ва бошқа оммавий тадбирларда иштирок этиш фақатгина кенгаш раисини хабардор қилган ҳолда амалга ошириш;

Жамоатчилик кенгашининг зиммасида қонун ҳужжатларига мувофиқ бошқа мажбуриятлар ҳам бўлиши мумкин.

Юқоридаги талабларни бажариш Жамоатчилик кенгаши таркибига кирувчи барча аъзолар учун мажбурийдир.

 

3-боб. ЖАМОАТЧИЛИК КЕНГАШИ ТАРКИБИНИ ШАКЛЛАНТИРИШ ВА АЪЗОЛАРНИНГ ҲУҚУҚ ВА МАЖБУРИЯТЛАРИ

12. Жамоатчилик кенгаши аъзолигига, қоида тариқасида, олий маълумотга эга, коррупцияга қарши курашиш соҳасида алоҳида билим, кўникмаларга эга бўлган, шунингдек, соҳани ривожлантиришга қаратилган амалий таклифларни бера оладиган, судланмаган, зарур касбий фазилатлари бўлган, жамиятда алоҳида эътиборга эга бўлган, соҳада намунали хизмат кўрсатган меҳнат фахрийлари, жамоатчилик фаолияти соҳаларида катта амалий тажрибага эга обрў-эътиборли фуқаролар, шунингдек нодавлат нотижорат ташкилотлари, оммавий ахборот воситалари ва фуқаролик жамиятининг бошқа институтлари вакиллари орасидан танлов асосида қабул қилинади.

Танлов Агентлик томонидан белгиланган муддатлар, талаблар ва шаклларга мувофиқ ўтказилади.

Жамоатчилик кенгаши аъзоларининг сони 15 нафардан 25 нафаргача этиб белгиланиши мумкин.

Бунда жамоатчилик кенгаши таркибининг камида 20 фоизини аёллар,
50 фоизини нодавлат нотижорат ташкилоти вакиллари бўлиши лозим.

13. Жамоатчилик кенгашининг таркиби Агентлик директори буйруғи билан ҳар 2 (икки) йилда тасдиқланади.

Жамоатчилик кенгашининг ваколат муддати якунланганидан сўнг ўз фаолиятини тугатади ва Агентлик томонидан белгиланган тартибда Кенгашнинг янги таркиби шакллантирилади.

14. Жамоатчилик кенгашининг таркибига унинг раиси, раис ўринбосари ва аъзолари киради.

15. Жамоатчилик кенгашининг раиси, раис ўринбосари Агентлик директори тавсиясига асосан, жамоатчилик кенгашининг аъзолари орасидан сайланади.

Сайланган раис, раис ўринбосари, ваколат муддати Жамоатчилик кенгаши аъзолари томонидан белгиланади.

Агентликнинг Жамоатчилик кенгаши ишини ташкил этишга масъул ходими бир вақтнинг ўзида кенгаш котиби вазифасини ҳам бажаради.

16. Қуйидаги ҳолатларда жамоатчилик кенгашининг раиси, раис ўринбосари ва аъзолари унинг таркибидан чиқарилиши мумкин:

кенгаш таркибидан чиқиш тўғрисида ариза билан мурожаат қилганида;

ҳуқуқбузарлик, шунингдек жамиятда ўрнатилган ахлоқ қоидалари, ҳамда умум эътироф этилган нормаларни қўпол равишда бузувчи ва кенгаш аъзоси номига доғ туширувчи ҳамда жамоатчилик кенгаши обрўсига путур етказувчи ҳаракатлар, ножўя ишлар содир этганда;

Кенгаш ёки Агентлик номидан шахсий ёки бошқа манфаатлари йўлида фойдаланганда;

Кенгаши аъзоларининг кўпчилик фикри билан овозга қўйилганда ва оддий кўпчилик овози билан маъқулланганда;

Низомда назарда тутилган ўз вазифаларини узрли сабабларсиз мунтазам равишда, бажармаганда, шу жумладан жамоатчилик кенгашнинг мажлисларида иштирок этмаганда;

вафот этганда, шунингдек суднинг қонуний кучга кирган ҳал қилув қарори асосида муомалага лаёқатсиз, бедарак йўқолган ёки вафот этган деб топилганда;

мазкур низомнинг 11-бандида белгиланган мажбуриятларни бажармаганда.

17. Жамоатчилик кенгашининг таркиби тўғрисидаги маълумотлар ва унга киритилган ўзгартишлар улар тасдиқланган пайтдан бошлаб 5 (беш) кун ичида Агентликнинг расмий веб-сайтида эълон қилинади.

18. Жамоатчилик кенгаши раиси ўз ваколатлари доирасида:

Жамоатчилик кенгаши фаолиятини ташкил этади;

Мажлисларга раислик қилади;

Жамоатчилик кенгаши номидан ҳужжатларни имзолайди;

Жамоатчилик кенгаши қарорларини амалга ошириш бўйича фаолиятни мувофиқлаштиради;

Агентлик мажлисларида маслаҳат овози ҳуқуқи билан иштирок этади;

Жамоатчилик кенгашининг самарали ишини таъминлаш бўйича бошқа ваколатларни амалга оширади.

19. Жамоатчилик кенгашининг раиси бўлмаган тақдирда, унинг ваколатлари ва мажбуриятларини раис ўринбосари бажаради.

20. Жамоатчилик кенгаши раисининг ўринбосари:

раис йўқлигида жамоатчилик кенгашининг мажлисларида раислик қилади;

Жамоатчилик кенгаши қарорларининг ижросини назорат қилиш бўйича ишларни ташкил этади;

Жамоатчилик кенгашининг ваколатига кирадиган масалалар билан боғлиқ мурожаатларни кўриб чиқади ва натижалари бўйича тегишли ҳужжатларни тайёрлайди;

Жамоатчилик кенгаши ишини самарали ташкил этиш бўйича бошқа ваколатларни амалга оширади.

21. Жамоатчилик кенгашининг котиби:

Жамоатчилик кенгаши фаолиятини услубий, ташкилий-ҳуқуқий ва ташкилий-техник жиҳатдан таъминлаш масалаларини ҳал қилади;

Жамоатчилик кенгашининг навбатдаги мажлисига барча зарур материаллар ўз вақтида тайёрланишини таъминлайди, Агентлик ходимларидан зарур ҳужжатлар ва маълумотларни сўраб олади;

кун тартибига мувофиқ Жамоатчилик кенгаши мажлислари ўтказилишини ташкил этади;

Жамоатчилик кенгаши ўтказиладиган сана, жой ва таклиф этиладиган шахслар рўйхатини жамоатчилик кенгашининг раиси билан келишади;

Жамоатчилик кенгаши аъзоларини ва таклиф этилган шахсларни жамоатчилик кенгаши мажлиси ўтказиладиган жой, сана ва вақт ҳақида хабардор қилади;

Жамоатчилик кенгаши қарорларининг ижро этилиши устидан мониторинг олиб боради ва унинг натижаларини жамоатчилик кенгаши мажлисида кўриб чиқиш бўйича таклифлар киритади;

Жамоатчилик кенгаши мажлисининг баённомасини расмийлаштиради ва тасдиқланган баённоманинг Жамоатчилик кенгаши аъзолари ҳамда бошқа манфаатдор шахсларга жўнатилишини таъминлайди;

Агентликнинг расмий веб-сайтида Жамоатчилик кенгашининг тасдиқланган аъзолари ҳақидаги маълумотларни, шунингдек уларнинг алоқа маълумотлари (телефон, почта ва электрон манзиллари)ни тайёрлайди ва ҳар чоракда Агентликка тақдим этиб боради;

Жамоатчилик кенгашининг йиғилишлари ва кун тартибидаги масалалар тўғрисидаги маълумотларни Агентликнинг расмий веб-сайтида эълон қилиш учун агентликка тақдим этади;

Овоз бериш натижаларини инобатга олган ҳолда кўриб чиқилаётган масала бўйича Жамоатчилик кенгаши тавсияси лойиҳасини тайёрлайди ва имзолаш учун Жамоатчилик кенгаши раисига киритади;

Жамоатчилик кенгаши котиби Жамоатчилик кенгаши таркибига кирмайди.

22. Жамоатчилик кенгашининг аъзолари ўз мажлисларида кўриб чиқиладиган масалаларни муҳокама қилиш ва ҳал қилишда ўз ваколатини бошқаларга ўтказиш ҳуқуқига эга эмас.

Жамоатчилик кенгашининг аъзолари:

ўз зиммаларига юклатилган вазифаларни бажариш учун Агентлик томонидан ташкил этиладиган ҳайъат мажлисларида ва бошқа оммавий тадбирларда иштирок этади;

Жамоатчилик кенгаши иш режаларининг лойиҳаларини тайёрлайди, уларни Жамоатчилик кенгашида кўриб чиқиш учун киритади ва тасдиқланган иш режалари бажарилишини таъминлайди;

Агентлик фаолиятининг самарадорлигини ошириш бўйича таклиф ва тавсияларни ишлаб чиқишда ҳамда амалга оширишда қатнашади;

Агентлик ходимлари, уларнинг оила аъзолари билан учрашувлар ўтказади ва уларнинг ҳуқуқлари, эркинликлари ҳамда қонуний манфаатларини таъминлаш бўйича таклифларни Жамоатчилик кенгашига киритади;

Жамоатчилик кенгашининг кун тартибига киритилган масалалар юзасидан таҳлилий материаллар тайёрлайди;

Жамоатчилик кенгашининг зиммасига юкланган вазифалар ва функцияларга мувофиқ бошқа ваколатларни амалга оширади.

 

 

4-боб. ЖАМОАТЧИЛИК КЕНГАШИ ЙИҒИЛИШИНИ ТАШКИЛ ЭТИШ ВА ЎТКАЗИШ ТАРТИБИ

23. Жамоатчилик кенгаши фаолиятининг асосий масалалари унинг мажлисида кўриб чиқилади. Жамоатчилик кенгашининг мажлиси  Кенгаш раиси у йўқлигида эса унинг ўринбосари томонидан заруратга қараб, бироқ йилига камида тўрт марта чақирилади.

Жамоатчилик кенгашининг навбатдан ташқари мажлиси Жамоатчилик кенгаши аъзоларининг учдан бир қисмининг ёзма мурожаати асосида чақирилиши мумкин.

24. Жамоатчилик кенгашининг мажлиси ўтказиладиган вақт, сана, жой ва кун тартиби аъзолар эътиборига мажлис бўлишидан камида уч кун олдин етказилади.

Мажлис бўлиши ҳақидаги хабар Кенгаш аъзоларига ижтимоий тармоқдаги саҳифасига хабарнома жўнатиш, уяли алоқа воситасига қўнғироқ қилиш, иш жойига расмий хабарнома жўнатиш, агентлик расмий веб-сайтида эълон бериш ва бошқа алоқа воситалари орқали маълум қилиниши мумкин.

25. Жамоатчилик кенгашининг мажлиси, агар унда жамоатчилик кенгаши аъзоларининг камида 50 фоиздан ортиғи (кворум) иштирок этган тақдирда ваколатли ҳисобланади.

Мажлисни ўтказиш учун кворум шаклланмаган тақдирда, жамоатчилик кенгашининг янги мажлиси ўтказиладиган сана эълон қилинади.

26. Жамоатчилик кенгашининг мажлисида иштирок этиш имкони бўлмаган ҳолатларда, унинг аъзоси мажлис кун тартибидаги масалалар бўйича ўз фикрини ёзма шаклда юбориши мумкин. Бунда унинг фикри мажлисда кўриб чиқилади ва овоз беришда ҳисобга олинади.

27. Жамоатчилик кенгашининг мажлисларига бошқа давлат органлари, нодавлат нотижорат ташкилотлари ва фуқаролик жамияти институтларининг вакиллари, оммавий ахборот воситалари таклиф этилиши мумкин.

28. Жамоатчилик кенгаши мажлислари онлайн, офлайн ёки гибрид форматда ҳам ўтказилиши мумкин.

29. Жамоатчилик кенгаши мажлиси кун тартибининг лойиҳаси котиб томонидан Жамоатчилик кенгаши аъзоларининг таклифлари ва жамоатчилик кенгаши раисининг топшириғи асосида шакллантирилади.

Шунингдек, Агентлик ва кенгаш аъзоларининг таклифига кўра, Жамоатчилик кенгаш мажлисларида алоҳида муҳим аҳамиятга эга бўлган масалалар кун тартибига киритилиши мумкин.

30. Жамоатчилик кенгашининг қарори мажлисда иштирок этаётган жамоатчилик кенгаши аъзоларининг оддий кўпчилик овози билан қабул қилинади. Овозлар тенг бўлиб қолган тақдирда, Кенгаш раисининг овози ҳал қилувчи ҳисобланади.

31. Жамоатчилик кенгашининг ҳар бир аъзоси қабул қилинаётган қарорлар бўйича ўзининг фикрини ёзма шаклда ифодалашга ҳақли. Унинг фикри жамоатчилик кенгаши мажлисининг баённомасига мажбурий тартибда қўшиб қўйилади.

32. Жамоатчилик кенгаши аъзолари мажлис якуни бўйича агентлик томонидан кўриб чиқилиши ва қарорлар қабул қилиниши мажбурий бўлган тавсиялар қабул қилади.

33. Жамоатчилик кенгашининг мажлисида қабул қилинган қарор баённома билан расмийлаштирилади. Жамоатчилик кенгаши мажлисининг баённомаси котиб томонидан имзоланади, мажлисга раислик қилувчи томонидан тасдиқланади ва уч кун муддатда Агентликка, жамоатчилик кенгаши аъзоларига ва манфаатдор шахсларга юборилади.

34. Жамоатчилик кенгашининг қарорини тезлик билан қабул қилиш зарурияти туғилганда, унинг раиси ташаббуси билан қарор жамоатчилик кенгашининг аъзолари билан келишилган ҳолда сўров йўли расмийлаштирилади.

Агентлик Жамоатчилик кенгашининг қабул қилган қарорига қўшилмаган ҳолларда, жамоатчилик кенгашининг қарорини олган кундан бошлаб ўн кундан кечикмай унга асослантирилган эътирозини ёзма шаклда юборади.

35. Жамоатчилик кенгашининг котиби кенгаш аъзолари кўмагида Жамоатчилик кенгаши қарорлари ижросининг боришини ўрганади ва кўриб чиқади, зарур бўлган ҳолларда, Жамоатчилик кенгашининг раисига тегишли таклифлар киритади.

36. Қуйидаги ҳолатлар Жамоатчилик кенгаши фаолияти тугатилишига сабаб бўлади:

Низомда белгиланган ваколат муддати якунланганидан сўнг;

Ўз зиммасига юклатилган вазифа ва функцияларни етарли даражада бажармаганда;

Агентлик фаолияти ва ишчанлик обрўсига путур етказилишга сабаб бўлувчи ҳаракат ёки ҳаракатсизликни содир этганда;

Кенгаш аъзолари умумий сонининг 30 фоиздан ортиқ қисми аъзоликни тарк этганда;

Жамоатчилик кенгаши мажлисида иштирок этган кенгаш аъзоларининг кенгаш фаолиятини тугатиш тўғрисидаги кўпчилик овози билан маъқулланган қарори белгиланган тақдирда тасдиқланганда;

Қонунда кўрсатилган бошқа шу каби агентлик фаолиятига салбий таъсир ўтказувчи ноқонуний ҳаракат ёки ҳаракатсизликлар содир этилганда.

37. Агентлик директорининг буйруғи Жамоатчилик кенгаши фаолиятининг тугатиш учун асос бўлиб хизмат қилади.

 

5-боб. ЯКУНЛОВЧИ ҚОИДАЛАР

38. Жамоатчилик кенгашининг фаолиятини моддий-техник жиҳатдан таъминлаш Агентлик томонидан, шунингдек қонун ҳужжатларида тақиқланмаган бошқа манбалар ҳисобидан амалга оширилади.

39. Жамоатчилик кенгашининг фаолияти унинг Низомига ва Ўзбекистон Республикасининг қонун ҳужжатларига мувофиқлиги Агентлик директори томонидан назорат қилинади.

40. Жамоатчилик кенгашининг қарорлари устидан белгиланган тартибда шикоят қилиниши мумкин.


Жамоатчилик кенгашининг тасдиқланган Низоми