O‘zbekiston Respublikasi Korrupsiyaga qarshi kurashish agentligi direktorining

2022 yil 7-iyuldagi 46–sonli buyrug‘iga 1-ilova

O‘ZBEKISTON RESPUBLIKASI KORRUPSIYAGA QARSHI KURASHISH AGENTLIGI HUZURIDAGI

JAMOATCHILIK KENGASHI TO‘G‘RISIDAGI

NIZOM

1- bob. UMUMIY QOIDALAR

1. Mazkur nizom O‘zbekiston Respublikasi Korrupsiyaga qarshi kurashish agentligi (keyingi o‘rinlarda - Agentlik) huzuridagi Jamoatchilik kengashining (keyingi o‘rinlarda - Jamoatchilik kengashi) asosiy vazifalari, funksiyalari, vakolatlarini va faoliyatini tashkil etish tartibini belgilaydi.

2. Jamoatchilik kengashi o‘z ishini jamoatchilik asosida olib boradigan, doimiy faoliyat yurituvchi maslahat-kengash organi hisoblanadi.

3. Jamoatchilik kengashi Agentlik huzurida tashkil etiladi.

4. Jamoatchilik kengashi Agentlik direktori buyrug‘i bilan tashkil etiladi.

5. Jamoatchilik kengashining qarorlari tavsiyaviy xususiyatga ega.

6. Jamoatchilik kengashi o‘z faoliyatida O‘zbekiston Respublikasining Konstitutsiyasi va qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, Agentlik direktorining buyruqlariga, mazkur Nizomga hamda boshqa qonun hujjatlariga amal qiladi.

A’zolarining Jamoatchilik kengashining maqsad yoki asosiy vazifalari doirasidan chetga chiqib, Jamoatchilik kengashi Agentlik bilan kelishilmagan holda bildirgan fikr-mulohazalari hamda sodir etgan xatti-harakatlari Jamoatchilik kengashining nuqtai-nazarini anglatmaydi;

7. Jamoatchilik kengashi to‘g‘risidagi Nizom va unga kiritiladigan o‘zgartishlar hamda qo‘shimchalar Agentlik direktori buyrug‘i bilan tasdiqlanadi.

8. Agentlik Jamoatchilik kengashi a’zolarini korrupsiyaga qarshi bilim va ko‘nikmalarini oshirish maqsadida o‘quv kurslarini tashkil etadi.

 

2-bob. JAMOATCHILIK KENGASHINING MAQSADI, ASOSIY VAZIFALARI, FUNKSIYALARI, HUQUQLARI VA MAJBURIYATLARI

9. Jamoatchilik kengashining maqsadi O‘zbekiston Respublikasida korrupsiyaning oldini olish va unga qarshi kurashish bo‘yicha olib borilayotgan siyosat va chora-tadbirlarning samaradorligini oshirishga ko‘maklashishdan iborat.

Mazkur maqsadga erishish uchun Jamoatchilik kengashi quyidagi vazifalarni amalga oshiradi:

Korrupsiyaning oldini olish va unga qarshi kurashish sohasida Agentlik va jamoatchilik o‘rtasida samarali muloqotni yo‘lga qo‘yish;

korrupsiyaga qarshi kurashish siyosati va chora-tadbirlarini takomillashtirish bo‘yicha jamoatchilik muhokamalarini tashkil etish;

fuqarolik jamiyati institutlari va biznes hamjamiyati bilan hamkorlikda korrupsiyaga qarshi kurashish siyosati, strategiyasi va chora-tadbirlari samaradorligini oshirish bo‘yicha takliflar ishlab chiqish;

korrupsiyaga qarshi kurashish sohasida qabul qilingan qarorlar va qonun hujjatlarining natijadorligi, shuningdek, turli darajadagi davlat boshqaruvi va mahalliy davlat hokimiyati organlari, davlat korxonalari va xo‘jalik yurituvchi subyektlar tomonidan o‘z funksiyalari va vazifalarini bajarish sifati va samaradorligi to‘g‘risida Agentlik xabardorligini oshirish;

BMT Korrupsiyaga qarshi konvensiya obzori jarayoniga fuqarolik jamiyati institutlarining jalb etilishiga ko‘maklashish;

korrupsiyaga qarshi kurashish yo‘nalishidagi targ‘ibotga ko‘maklashish
va unda fuqarolik jamiyati institutlarining ishtirokini muvofiqlashtirish;

Jamoatchilik kengashlarining tartib-qoidalarini takomillashtirish yuzasidan ilg‘or tajriba asosida tavsiyalar ishlab chiqish;

davlat organlari tomonidan oshkor qilinadigan ma’lumotlarning hisobdorligi, ochiqligi va sifati to‘g‘risida ma’lumotlar tayyorlash;

fuqarolik jamiyati bilan bog‘liq loyihalarni monitoring qilish;

Agentlik faoliyati to‘g‘risida jamoatchilik fikrini kuzatib borish, tahlil qilish va ular orasida ijobiy fikr shakllantirishda Agentlikka yaqindan ko‘mak berish;

Agentlik faoliyatining shaffofligini monitoring qilish;

birgalikda muloqot qilish, Agentlikning nodavlat notijorat tashkilotlari, ommaviy axborot vositalari va fuqarolik jamiyatining boshqa institutlari bilan samarali hamkorligini ta’minlash uchun Agentlikni fuqarolar bilan bog‘lab turadigan “ko‘prik” rolini bajarish;

mamlakatda korrupsiyaning tarqalish darajasi (turli-xil davlat xizmatlarini ko‘rsatish jarayonidagi korrupsiyaviy holatlar, ularning turlari, shakllari, sxemalari) to‘g‘risida Agentlikni xabardor qilish;

fuqarolar va tadbirkorlik subyektlari tomonidan davlat xizmatlari ko‘rsatish yoki tadbirkorlik faoliyatini davlat tomonidan tartibga solish tizimining ishlashi bilan bog‘liq bo‘lgan murojaatlar yuzasidan Agentlikni xabardor qilish;

O‘zbekiston Respublikasi Prezidenti huzuridagi Jamoatchilik palatasiga korrupsiyaning oldini olish va unga qarshi kurashish sohasida jamoatchilik nazoratining samarali tizimini shakllantirish, “jamoatchilik eshituvi”, “jamoatchilik ekspertizasi”, “jamoatchilik monitoringi” kabi ta’sirchan zamonaviy nazorat shakllarini amalda joriy etishga ko‘maklashish;

Agentlik faoliyatini jamoatchilik fikri va ommaviy axborot vositalarida yoritish bo‘yicha bajarilayotgan ishlarning natijalarini tahlil qilish, ularning samaradorligini oshirish va mavjud kamchiliklarni bartaraf etish yuzasidan takliflar ishlab chiqish.

10. Jamoatchilik kengashi zimmasiga yuklatilgan vazifalar
va funksiyalarni bajarish uchun:

kun tartibidagi masalalar, hujjatlar loyihalari, korrupsiyaga qarshi kurashish siyosatini muayyan hudud, soha va tarmoqlarda amalga oshirilishi natijalari bo‘yicha og‘zaki yoki yozma ravishda o‘zining ekspert fikrini bildirish hamda muhokama qilish;

jamoatchilik fikri va ommaviy axborot vositalarida e’lon qilingan materiallarni Jamoatchilik kengashi va Agentlik rahbariyatiga ko‘rib chiqish uchun taqdim etish;

Agentlik tomonidan tashkil etiladigan bo‘lajak ochiq majlislar va boshqa ommaviy tadbirlar to‘g‘risidagi axborotni oldindan olish hamda mazkur tadbirlarda ishtirok etish;

Agentlik direktoriga jamoatchilik kengashi vakolatiga kiradigan masalalar yuzasidan takliflar kiritish;

Agentlik yoki uning xodimlari ustidan kelib tushadigan shikoyatlarni talab qilib olish, o‘rganish va natijasi bo‘yicha Agentlik tomonidan ko‘rib chiqilishi majburiy bo‘lgan tavsiyalar berish, shuningdek, korrupsiyaga qarshi kurashish siyosati hamda Agentlik faoliyatining samaradorligini oshirishga qaratilgan fuqarolarning takliflari bilan tanishib chiqish;

Agentlik faoliyati samaradorligini oshirish bo‘yicha taklif va tavsiyalarni ishlab chiqish hamda amalga oshirish uchun zarur bo‘lgan Agentlikning axborotlari, statistika va boshqa materiallarini belgilangan tartibda olish;

Agentlik tomonidan ishlab chiqilgan normativ-huquqiy hujjatlar loyihalarining jamoatchilik va ekspertlar muhokamasini ta’minlashda ishtirok etish;

Jamoatchilik kengashi o‘z faoliyatiga doir masalalar, bu borada qilinayotgan ishlar hamda majlislarida muhokama qilinadigan masalalarni yoritish bo‘yicha ommaviy axborot vositalari bilan hamkorlik qilish;

yuklatilgan vazifalarni bajarish uchun konferensiyalar, forumlar, seminarlar, davra suhbatlari va boshqa tadbirlarni tashkil etish huquqiga ega.

Jamoatchilik kengashi a’zolari o‘z vakolatlariga kiritilgan masalalar yuzasidan vaqtinchalik ishchi guruh, ekspertlar guruhlarini tuzishlari mumkin.

11. Jamoatchilik kengashi o‘z faoliyatini amalga oshirishda:

jamoatchilik nazorati to‘g‘risidagi qonun hujjatlari talablariga rioya qilishi;

Agentlik xodimlarining o‘z vakolatlari doirasida amalga oshiradigan faoliyatiga aralashmasligi;

Agentlik xodimlari faoliyat ko‘rsatishi uchun to‘sqinlik qilmasligi;

fuqarolarning or-nomusi va qadr-qimmatini tahqirlashga, ularning shaxsiy hayotiga aralashishga yo‘l qo‘ymasligi;

jismoniy va yuridik shaxslarning korrupsiyaga aloqadorligi to‘g‘risida tasdiqlanmagan ma’lumotlarni tarqatmasligi hamda aybsizlik prezumpsiyasi prinsipiga amal qilishi;

jamoatchilik nazoratini amalga oshirish davomida olingan axborotning, agar bunday axborotni tarqatish qonun bilan cheklangan bo‘lsa, maxfiyligiga rioya qilishi shart;

Jamoatchilik kengashi nomidan intervyu berish, uchrashuv, o‘rganish va boshqa ommaviy tadbirlarda ishtirok etish faqatgina kengash raisini xabardor qilgan holda amalga oshirish;

Jamoatchilik kengashining zimmasida qonun hujjatlariga muvofiq boshqa majburiyatlar ham bo‘lishi mumkin.

Yuqoridagi talablarni bajarish Jamoatchilik kengashi tarkibiga kiruvchi barcha a’zolar uchun majburiydir.

 

3-bob. JAMOATCHILIK KENGASHI TARKIBINI SHAKLLANTIRISH VA A’ZOLARNING HUQUQ VA MAJBURIYATLARI 

12. Jamoatchilik kengashi a’zoligiga, qoida tariqasida, oliy ma’lumotga ega, korrupsiyaga qarshi kurashish sohasida alohida bilim, ko‘nikmalarga ega bo‘lgan, shuningdek, sohani rivojlantirishga qaratilgan amaliy takliflarni bera oladigan, sudlanmagan, zarur kasbiy fazilatlari bo‘lgan, jamiyatda alohida e’tiborga ega bo‘lgan, sohada namunali xizmat ko‘rsatgan mehnat faxriylari, jamoatchilik faoliyati sohalarida katta amaliy tajribaga ega obro‘-e’tiborli fuqarolar, shuningdek nodavlat notijorat tashkilotlari, ommaviy axborot vositalari va fuqarolik jamiyatining boshqa institutlari vakillari orasidan tanlov asosida qabul qilinadi.

Tanlov Agentlik tomonidan belgilangan muddatlar, talablar va shakllarga muvofiq o‘tkaziladi.

Jamoatchilik kengashi a’zolarining soni 15 nafardan 25 nafargacha etib belgilanishi mumkin.

Bunda jamoatchilik kengashi tarkibining kamida 20 foizini ayollar,
50 foizini nodavlat notijorat tashkiloti vakillari bo‘lishi lozim.

13. Jamoatchilik kengashining tarkibi Agentlik direktori buyrug‘i bilan har
2 (ikki) yilda tasdiqlanadi.

Jamoatchilik kengashining vakolat muddati yakunlanganidan so‘ng o‘z faoliyatini tugatadi va Agentlik tomonidan belgilangan tartibda Kengashning yangi tarkibi shakllantiriladi.

14. Jamoatchilik kengashining tarkibiga uning raisi, rais o‘rinbosari va a’zolari kiradi.

15. Jamoatchilik kengashining raisi, rais o‘rinbosari Agentlik direktori tavsiyasiga asosan, jamoatchilik kengashining a’zolari orasidan saylanadi.

Saylangan rais, rais o‘rinbosari, vakolat muddati Jamoatchilik kengashi a’zolari tomonidan belgilanadi.

Agentlikning Jamoatchilik kengashi ishini tashkil etishga mas’ul xodimi bir vaqtning o‘zida kengash kotibi vazifasini ham bajaradi.

16. Quyidagi holatlarda jamoatchilik kengashining raisi, rais o‘rinbosari va a’zolari uning tarkibidan chiqarilishi mumkin:

kengash tarkibidan chiqish to‘g‘risida ariza bilan murojaat qilganida;

huquqbuzarlik, shuningdek jamiyatda o‘rnatilgan axloq qoidalari, hamda umum e’tirof etilgan normalarni qo‘pol ravishda buzuvchi va kengash a’zosi nomiga dog‘ tushiruvchi hamda jamoatchilik kengashi obro‘siga putur yetkazuvchi harakatlar, nojo‘ya ishlar sodir etganda;

Kengash yoki Agentlik nomidan shaxsiy yoki boshqa manfaatlari yo‘lida foydalanganda;

Kengashi a’zolarining ko‘pchilik fikri bilan ovozga qo‘yilganda va oddiy ko‘pchilik ovozi bilan ma’qullanganda;

Nizomda nazarda tutilgan o‘z vazifalarini uzrli sabablarsiz muntazam ravishda, bajarmaganda, shu jumladan jamoatchilik kengashning majlislarida ishtirok etmaganda;

vafot etganda, shuningdek sudning qonuniy kuchga kirgan hal qiluv qarori asosida muomalaga layoqatsiz, bedarak yo‘qolgan yoki vafot etgan deb topilganda;

mazkur nizomning 11-bandida belgilangan majburiyatlarni bajarmaganda.

17. Jamoatchilik kengashining tarkibi to‘g‘risidagi ma’lumotlar va unga kiritilgan o‘zgartishlar ular tasdiqlangan paytdan boshlab 5 (besh) kun ichida Agentlikning rasmiy veb-saytida e’lon qilinadi.

18. Jamoatchilik kengashi raisi o‘z vakolatlari doirasida:

Jamoatchilik kengashi faoliyatini tashkil etadi;

Majlislarga raislik qiladi;

Jamoatchilik kengashi nomidan hujjatlarni imzolaydi;

Jamoatchilik kengashi qarorlarini amalga oshirish bo‘yicha faoliyatni muvofiqlashtiradi;

Agentlik majlislarida maslahat ovozi huquqi bilan ishtirok etadi;

Jamoatchilik kengashining samarali ishini ta’minlash bo‘yicha boshqa vakolatlarni amalga oshiradi.

19. Jamoatchilik kengashining raisi bo‘lmagan taqdirda, uning vakolatlari va majburiyatlarini rais o‘rinbosari bajaradi.

20. Jamoatchilik kengashi raisining o‘rinbosari:

rais yo‘qligida jamoatchilik kengashining majlislarida raislik qiladi;

Jamoatchilik kengashi qarorlarining ijrosini nazorat qilish bo‘yicha ishlarni tashkil etadi;

Jamoatchilik kengashining vakolatiga kiradigan masalalar bilan bog‘liq murojaatlarni ko‘rib chiqadi va natijalari bo‘yicha tegishli hujjatlarni tayyorlaydi;

Jamoatchilik kengashi ishini samarali tashkil etish bo‘yicha boshqa vakolatlarni amalga oshiradi.

21. Jamoatchilik kengashining kotibi:

Jamoatchilik kengashi faoliyatini uslubiy, tashkiliy-huquqiy va tashkiliy-texnik jihatdan ta’minlash masalalarini hal qiladi;

Jamoatchilik kengashining navbatdagi majlisiga barcha zarur materiallar o‘z vaqtida tayyorlanishini ta’minlaydi, Agentlik xodimlaridan zarur hujjatlar va ma’lumotlarni so‘rab oladi;

kun tartibiga muvofiq Jamoatchilik kengashi majlislari o‘tkazilishini tashkil etadi;

Jamoatchilik kengashi o‘tkaziladigan sana, joy va taklif etiladigan shaxslar ro‘yxatini jamoatchilik kengashining raisi bilan kelishadi;

Jamoatchilik kengashi a’zolarini va taklif etilgan shaxslarni jamoatchilik kengashi majlisi o‘tkaziladigan joy, sana va vaqt haqida xabardor qiladi;

Jamoatchilik kengashi qarorlarining ijro etilishi ustidan monitoring olib boradi va uning natijalarini jamoatchilik kengashi majlisida ko‘rib chiqish bo‘yicha takliflar kiritadi;

Jamoatchilik kengashi majlisining bayonnomasini rasmiylashtiradi va tasdiqlangan bayonnomaning Jamoatchilik kengashi a’zolari hamda boshqa manfaatdor shaxslarga jo‘natilishini ta’minlaydi;

Agentlikning rasmiy veb-saytida Jamoatchilik kengashining tasdiqlangan a’zolari haqidagi ma’lumotlarni, shuningdek ularning aloqa ma’lumotlari (telefon, pochta va elektron manzillari)ni tayyorlaydi va har chorakda Agentlikka taqdim etib boradi;

Jamoatchilik kengashining yig‘ilishlari va kun tartibidagi masalalar to‘g‘risidagi ma’lumotlarni Agentlikning rasmiy veb-saytida e’lon qilish uchun agentlikka taqdim etadi;

Ovoz berish natijalarini inobatga olgan holda ko‘rib chiqilayotgan masala bo‘yicha Jamoatchilik kengashi tavsiyasi loyihasini tayyorlaydi va imzolash uchun Jamoatchilik kengashi raisiga kiritadi;

Jamoatchilik kengashi kotibi Jamoatchilik kengashi tarkibiga kirmaydi.

22. Jamoatchilik kengashining a’zolari o‘z majlislarida ko‘rib chiqiladigan masalalarni muhokama qilish va hal qilishda o‘z vakolatini boshqalarga o‘tkazish huquqiga ega emas.

Jamoatchilik kengashining a’zolari:

o‘z zimmalariga yuklatilgan vazifalarni bajarish uchun Agentlik tomonidan tashkil etiladigan hay’at majlislarida va boshqa ommaviy tadbirlarda ishtirok etadi;

Jamoatchilik kengashi ish rejalarining loyihalarini tayyorlaydi, ularni Jamoatchilik kengashida ko‘rib chiqish uchun kiritadi va tasdiqlangan ish rejalari bajarilishini ta’minlaydi;

Agentlik faoliyatining samaradorligini oshirish bo‘yicha taklif va tavsiyalarni ishlab chiqishda hamda amalga oshirishda qatnashadi;

Agentlik xodimlari, ularning oila a’zolari bilan uchrashuvlar o‘tkazadi va ularning huquqlari, erkinliklari hamda qonuniy manfaatlarini ta’minlash bo‘yicha takliflarni Jamoatchilik kengashiga kiritadi;

Jamoatchilik kengashining kun tartibiga kiritilgan masalalar yuzasidan tahliliy materiallar tayyorlaydi;

Jamoatchilik kengashining zimmasiga yuklangan vazifalar va funksiyalarga muvofiq boshqa vakolatlarni amalga oshiradi.

 

4-bob. JAMOATCHILIK KENGASHI YIG‘ILISHINI TASHKIL ETISH VA O‘TKAZISH TARTIBI

23. Jamoatchilik kengashi faoliyatining asosiy masalalari uning majlisida ko‘rib chiqiladi. Jamoatchilik kengashining majlisi  Kengash raisi u yo‘qligida esa uning o‘rinbosari tomonidan zaruratga qarab, biroq yiliga kamida to‘rt marta chaqiriladi.

Jamoatchilik kengashining navbatdan tashqari majlisi Jamoatchilik kengashi a’zolarining uchdan bir qismining yozma murojaati asosida chaqirilishi mumkin.

24. Jamoatchilik kengashining majlisi o‘tkaziladigan vaqt, sana, joy va kun tartibi a’zolar e’tiboriga majlis bo‘lishidan kamida uch kun oldin yetkaziladi.

Majlis bo‘lishi haqidagi xabar Kengash a’zolariga ijtimoiy tarmoqdagi sahifasiga xabarnoma jo‘natish, uyali aloqa vositasiga qo‘ng‘iroq qilish, ish joyiga rasmiy xabarnoma jo‘natish, agentlik rasmiy veb-saytida e’lon berish va boshqa aloqa vositalari orqali ma’lum qilinishi mumkin.

25. Jamoatchilik kengashining majlisi, agar unda jamoatchilik kengashi a’zolarining kamida 50 foizdan ortig‘i (kvorum) ishtirok etgan taqdirda vakolatli hisoblanadi.

Majlisni o‘tkazish uchun kvorum shakllanmagan taqdirda, jamoatchilik kengashining yangi majlisi o‘tkaziladigan sana e’lon qilinadi.

26. Jamoatchilik kengashining majlisida ishtirok etish imkoni bo‘lmagan holatlarda, uning a’zosi majlis kun tartibidagi masalalar bo‘yicha o‘z fikrini yozma shaklda yuborishi mumkin. Bunda uning fikri majlisda ko‘rib chiqiladi va ovoz berishda hisobga olinadi.

27. Jamoatchilik kengashining majlislariga boshqa davlat organlari, nodavlat notijorat tashkilotlari va fuqarolik jamiyati institutlarining vakillari, ommaviy axborot vositalari taklif etilishi mumkin.

28. Jamoatchilik kengashi majlislari onlayn, oflayn yoki gibrid formatda ham o‘tkazilishi mumkin.

29. Jamoatchilik kengashi majlisi kun tartibining loyihasi kotib tomonidan Jamoatchilik kengashi a’zolarining takliflari va jamoatchilik kengashi raisining topshirig‘i asosida shakllantiriladi.

Shuningdek, Agentlik va kengash a’zolarining taklifiga ko‘ra, Jamoatchilik kengash majlislarida alohida muhim ahamiyatga ega bo‘lgan masalalar kun tartibiga kiritilishi mumkin.

30. Jamoatchilik kengashining qarori majlisda ishtirok etayotgan jamoatchilik kengashi a’zolarining oddiy ko‘pchilik ovozi bilan qabul qilinadi. Ovozlar teng bo‘lib qolgan taqdirda, Kengash raisining ovozi hal qiluvchi hisoblanadi.

31. Jamoatchilik kengashining har bir a’zosi qabul qilinayotgan qarorlar bo‘yicha o‘zining fikrini yozma shaklda ifodalashga haqli. Uning fikri jamoatchilik kengashi majlisining bayonnomasiga majburiy tartibda qo‘shib qo‘yiladi.

32. Jamoatchilik kengashi a’zolari majlis yakuni bo‘yicha agentlik tomonidan ko‘rib chiqilishi va qarorlar qabul qilinishi majburiy bo‘lgan tavsiyalar qabul qiladi.

33. Jamoatchilik kengashining majlisida qabul qilingan qaror bayonnoma bilan rasmiylashtiriladi. Jamoatchilik kengashi majlisining bayonnomasi kotib tomonidan imzolanadi, majlisga raislik qiluvchi tomonidan tasdiqlanadi va uch kun muddatda Agentlikka, jamoatchilik kengashi a’zolariga va manfaatdor shaxslarga yuboriladi.

34. Jamoatchilik kengashining qarorini tezlik bilan qabul qilish zaruriyati tug‘ilganda, uning raisi tashabbusi bilan qaror jamoatchilik kengashining a’zolari bilan kelishilgan holda so‘rov yo‘li rasmiylashtiriladi.

Agentlik Jamoatchilik kengashining qabul qilgan qaroriga qo‘shilmagan hollarda, jamoatchilik kengashining qarorini olgan kundan boshlab o‘n kundan kechikmay unga asoslantirilgan e’tirozini yozma shaklda yuboradi.

35. Jamoatchilik kengashining kotibi kengash a’zolari ko‘magida Jamoatchilik kengashi qarorlari ijrosining borishini o‘rganadi va ko‘rib chiqadi, zarur bo‘lgan hollarda, Jamoatchilik kengashining raisiga tegishli takliflar kiritadi.

36. Quyidagi holatlar Jamoatchilik kengashi faoliyati tugatilishiga sabab bo‘ladi:

Nizomda belgilangan vakolat muddati yakunlanganidan so‘ng;

O‘z zimmasiga yuklatilgan vazifa va funksiyalarni yetarli darajada bajarmaganda;

Agentlik faoliyati va ishchanlik obro‘siga putur yetkazilishga sabab bo‘luvchi harakat yoki harakatsizlikni sodir etganda;

Kengash a’zolari umumiy sonining 30 foizdan ortiq qismi a’zolikni tark etganda;

Jamoatchilik kengashi majlisida ishtirok etgan kengash a’zolarining kengash faoliyatini tugatish to‘g‘risidagi ko‘pchilik ovozi bilan ma’qullangan qarori belgilangan taqdirda tasdiqlanganda;

Qonunda ko‘rsatilgan boshqa shu kabi agentlik faoliyatiga salbiy ta’sir o‘tkazuvchi noqonuniy harakat yoki harakatsizliklar sodir etilganda.

37. Agentlik direktorining buyrug‘i Jamoatchilik kengashi faoliyatining tugatish uchun asos bo‘lib xizmat qiladi.

 

5-bob. YAKUNLOVCHI QOIDALAR

38. Jamoatchilik kengashining faoliyatini moddiy-texnik jihatdan ta’minlash Agentlik tomonidan, shuningdek qonun hujjatlarida taqiqlanmagan boshqa manbalar hisobidan amalga oshiriladi.

39. Jamoatchilik kengashining faoliyati uning Nizomiga va O‘zbekiston Respublikasining qonun hujjatlariga muvofiqligi Agentlik direktori tomonidan nazorat qilinadi.

40. Jamoatchilik kengashining qarorlari ustidan belgilangan tartibda shikoyat qilinishi mumkin.


Jamoatchilik kengashining tasdiqlangan Nizomi