Korrupsiyaga qarshi kurashish agentligi direktori boshchiligidagi delegatsiya Avstriyaga tashrifi doirasida Xalqaro aksilkorrupsiya akademiyasi (IACA) vakillari bilan uchrashdi.

Dastlab Korrupsiyaga qarshi kurashish agentligi direktori Akmal Burxanov mezbonlarni so‘nggi yillarda O‘zbekistonda Prezident Shavkat Mirziyoyev rahbarligida amalga oshirilayotgan islohotlar, korrupsiyaga qarshi kurashish sohasida kechayotgan o‘zgarishlar bilan tanishtirdi.

O‘z o‘rnida, IACA rahbari tomonidan Akademiya faoliyati, o‘quv dasturlari, korrupsiyaning oldini olish va unga qarshi kurashish borasida ishlab chiqilayotgan loyihalar yuzasidan batafsil ma’lumot berildi.

Uchrashuv doirasida O‘zbekiston Respublikasi Korrupsiyaga qarshi kurashish agentligi va Xalqaro aksilkorrupsiya akademiyasi o‘rtasida o‘zaro anglashuv Memorandumi imzolandi. 

Mazkur Memorandumda  hamkorlik aloqalarini yanada kuchaytirish va xalqaro tajriba almashishga yo‘naltirilgan chora-tadbirlarni birgalikda amalga oshirish masalalariga e’tibor qaratilgan. Tomonlar, xususan, korrupsiyaga qarshi kurashish sohasida salohiyatni oshirish dasturlarini qo‘llab-quvvatlash, qo‘shma loyihalarni ishga tushirish, qolaversa, Agentlik xodimlari malakasini oshirish maqsadida Akademiyaning o‘quv kurslari va yozgi maktablariga yuborish, shuningdek,  O‘zbekistonni IACA a’zoligiga qo‘shilish masalasini ko‘rib chiqishga kelishib oldilar.