Korrupsiyaga qarshi kurashish agentligi mutaxassislaridan iborat guruh tomonidan korrupsiyaning oldini olish hamda unga qarshi kurashish borasida amalga oshirilayotgan ishlar bilan yaqindan tanishish maqsadida joriy yilning 1-mart kunidan boshlab Toshkent viloyatida oʻrganish ishlari olib borilmoqda.

Mazkur jarayonda viloyat hokimligi, shahar-tuman hokimliklari va hokimlik tasarrufidagi tashkilotlarda ichki nazorat tuzilmalari faoliyatining yoʻlga qoʻyilganligi, viloyatda qurilish, maktabgacha taʼlim, bank, aholi bandligi, sogʻliqni saqlash va yoʻl harakati xavfsizligi sohalarida Davlat dasturlari ijrosi, byudjet mablagʻlaridan samarali foydalanish hamda korrupsiyaning oldini olish borasidagi ishlar holati oʻrganilmoqda. 

Xususan, ishchi guruh tomonidan viloyatda Vazirlar Mahkamasining 2011-yil 25-maydagi 149-son qarori bilan tasdiqlangan “Qonun hujjatlari buzilganligi uchun ushlangan transport vositalarini toʻxtash joylariga olib kelish, joylashtirish va saqlash tartibi toʻgʻrisida”gi Nizom talablari asosida qonun hujjatlari buzilganligi uchun ushlangan transport vositalarini toʻxtash joylariga olib kelish, joylashtirish va saqlash tartibini yoʻlga qoʻyish jarayonida yuzaga kelayotgan tizimli muammolarni aniqlash va ularni bartaraf etish choralari tahlil qilinmoqda. 

Dastlabki oʻrganishlar mobaynida qonun hujjatlari buzilganligi uchun ushlangan transport vositalarini toʻxtash joylariga olib kelish, joylashtirish, saqlash boʻyicha masʼul boʻlgan tadbirkorlik subyektlari bilan Yoʻl harakati xizmati oʻrtasida yagona elektron tizim mavjud emasligi hamda hisobotlar yuritish yoʻlga qoʻyilmaganligi maʼlum boʻldi. 

Aniqlangan korrupsiyaviy xavf-xatarlarning  oldini olish va kamchiliklarni bartaraf etish maqsadida ishchi guruh tomonidan tegishli takliflar ishlab chiqilmoqda.
 
Toshkent viloyatida oʻtkazilayotgan oʻrganish ishlarining toʻliq tafsiloti Agentlikning rasmiy sahifalarida yoritib boriladi. 

Korrupsiyaga qarshi kurashish agentligi
 Axborot xizmati