Жорий йилнинг 25 сентябрь куни “ISO 37001:2016 ҳалқаро стандарти асосида коррупцияга қарши курашиш тизимини яратиш” мавзусида онлайн семинар бўлиб ўтди. Тадбир Республикаси Ҳисоб палатаси, Коррупцияга қарши курашиш агентлиги ва “Ўзстандарт” агентлиги томонидан ташкил этилиб, унда «комплаенс-назорат» тизими жорий этилаётган 20дан зиёд вазирлик ва идоралар вакиллари иштирок этди.

Ўзбекистон Республикаси Президенти Ш.М. Мирзиёев раҳбарлигида 2020 йил 27 июль куни яширин иқтисодиётни қисқартириш ва коррупциянинг олдини олиш масалаларига бағишланган йиғилиш бўлиб ўтказилган эди. Ушбу йиғилишда соҳалар ва йўналишлар кесимида хуфиёна иқтисодиёт ва коррупцияга қарши мувофиқлик тизими (“комплаенс назорат)ни жорий этиш, бунинг учун кенг қамровли “йўл хариталари”ни ишлаб чиқиш, шунингдек, ушбу тизимда фаолият олиб борувчи кадрларни тайёрлаш ва тегишли ташкилотлар ходимлари малакасини ошириш тизимини ташкил қилиш лозимлиги таъкидланган.

Шу муносабат билан, Ўзбекистон Республикаси Ҳисоб палатаси ва Коррупцияга қарши курашиш агентлиги ҳамкорликда коррупциянинг олдини олиш ва унга қарши курашиш бўйича саъй-ҳаракатларни тизимли йўлга қўйиш мақсадида 26 та вазирлик, давлат ва хўжалик бошқаруви органлари ҳамда давлат улушига эга тижорат банкларида «комплаенс-назорат» тизимини кенг жорий этиш ишлари бошланди.

Бугунги кунда рўйхатга киритилган барча ташкилотларда “комплаенс назорат” тизимини жорий этиш бўйича “йўл хариталари” ишлаб чиқилди ва унда белгиланган талабларни амалга оширишга киришилди. Эндиликда, Коррупцияга қарши курашиш агентлиги Ҳисоб палатаси билан биргаликда ҳар ойда коррупцияга қарши курашиш бўйича олиб борилаётган ишларнинг самарадорлигини тегишли индикаторлар асосида баҳолаб боради.

Шу билан бирга, 26 та вазирлик, давлат ва хўжалик бошқаруви органлари ҳамда давлат улушига эга тижорат банкларида Коррупцияга қарши курашиш агентлиги, Ҳисоб палатаси, Бош прокуратура, Адлия вазирлиги ва бошқа мутасадди ташкилотлар вакилларидан иборат “комплаенс-назорат”  тизимини жорий бўйича ишчи гуруҳлар ўз фаолиятини бошлаган.

Коррупцияга қарши курашиш агентлиги, Ҳисоб палатаси ва “Ўзстандарт” агентлиги томонидан ташкил этилган семинар мазкур ишчи гуруҳ аъзоларининг “комплаенс-назорат” тизими бўйича билимларини ошириш мақсадида ташкил этилди. Унда “СЕRТ Academy”нинг халқаро стандартлар бўйича эксперти  томонидан “ISO 37001:2016 ҳалқаро стандарти асосида коррупцияга қарши курашиш тизимини яратиш” мавзусида онлайн тақдимот ўтказди.

Семинар давомида вазирлик ва ташкилотларда ISO 37001:2016 халқаро стандартининг долзарблиги ва уни жорий этиш механизмлари ҳақида сўз юритилди. Шунингдек, стандарт талаблари ва унинг ривожланган давлатлардаги ижроси юзасидан Ўзбекистон мисолида қиёсий  таҳлил ўтказилди.

Таъкидланганидек, коррупция глобал муаммо экани, ушбу салбий иллат оқибатида жаҳон иқтисодига ҳар йили 2,6 триллион доллар зарар етказилмоқда.

Эксперт томонидан корхона ва ташкилотларда Коррупцияга қарши курашиш менежменти тизимини жорий этиш ва уни муваффақиятли амалга ошириш йўллари, баҳолаш мезонлари ҳақида батафсил маълумот берилди. Семинар якунида, ташкилотлар коррупцияга қарши курашиш менежменти тизимининг адекватлиги, яроқлилиги, натижадорлиги доимий яхшилаб борилиши муҳимлиги алоҳида таъкидланди.

Вазирлик ва идораларда коррупцияга қарши курашиш бўйича мазкур янги тизим жорий этиш борасидаги бу каби ўқув курсларини доимий равишда ўтказиб бориш, келгусида семинарларга ҳалқаро экспертларни фаол жалб қилиш режалаштирилган.