Аввал хабар берганимиздек, мамлакатимизда 9 декабрь — Халқаро коррупцияга қарши курашиш кунига бағишланган кенг кўламли Антикоррупция ҳафталиги ўтказилмоқда.

Бугун мазкур ҳафталик дастуридан ўрин олган навбатдаги тадбир бўлиб ўтди. Видеоконференцалоқа режимида ўтказилган учрашувда Коррупцияга қарши курашиш агентлиги директори Акмал Бурханов, Швейцариянинг Ўзбекистондаги элчиси Оливье Шавэ (Olivier Chave), БМТнинг Ўзбекистондаги доимий координатори Хелена Фрейзер, БМТ Тараққиёт дастурининг Ўзбекистондаги ваколатхонаси раҳбари Матилда Димовска, БМТ Гиёҳванд моддалар ва жиноятчилик бўйича бошқармаси Марказий Осиё ваколатхонаси раҳбари Ашита Миттал ва қатор соҳа мутахассислар иштирок этди.

Учрашувда Агентлик директори Акмал Бурханов томонидан Ўзбекистонда коррупциянинг олдини олиш ва унга қарши қарши курашишда амалга оширилаётган чора-тадбирлар, шу жумладан махсус ваколатли давлат органи – Коррупцияга қарши курашиш агентлиги ташкил этилгани ушбу йўналишда олиб борилаётган ишларни янги поғонага олиб чиқилганини таъкидланди.

Шунингдек, халқаро ҳамкорлар эътиборига Агентлик томонидан БМТнинг Коррупцияга қарши конвенцияси талабларига мувофиқ қонунчиликда амалга оширилаётган ўзгартиш ва қўшимчалар, тайёрланаётган таклифлар тақдим этилди.

Учрашув доирасида томонлар Ўзбекистон коррупцияга қарши курашиш ва уни олдини олишга қаратилган қатор янги лойиҳаларни ҳамкорликда амалга ошириш имкониятларини муҳокама қилдилар. Ушбу лойиҳа доирасида қонунчиликни янада такомиллаштириш, Агентлик фаолиятини институционал ва ташкилий асосларини янада ривожлантириш, ходимлар малакасини ошириш, коррупцияга қарши курашишда қўлланиладиган халқаро тажриба, шу жумладан давлат органларида “комплаенс назорат” тизимини фаол жорий этиш, тизимда замонавий ахборот-коммуникация технологияларини қўллаш ҳамда жамоатчиликда коррупцияга қарши тоқатсизлик муҳитини шакллантиришга қаратилган тарғибот ишлари амалга ошириш режалаштирилган.

Ўз навбатида, Швейцариянинг Ўзбекистондаги элчиси Оливье Шавэ ва БМТ вакиллари Ўзбекистонда коррупциянинг олдини олиш ва унга қарши курашиш борасида амалга оширилаётган ислоҳотларни тўлиқ қўллаб-қувватлашга тайёр эканликларини билдириб, янги ташкил этилган Коррупцияга қарши курашиш агентлиги билан яқиндан ишлашдан мамнун эканликларини билдирдилар.